حالىقارالىق قىلمىستىق پوليتسيانىڭ باسشىسى بولۋعا كىمدەر تالاسىپ جاتىر

استانا. قازاقپارات - ا ق ش مەملەكەتتىك حاتشىسى مايك پومپەو ۆاشينگتوننىڭ ينتەرپول پرەزيدەنتتىگىنە كانديدات، وڭتۇستىك كورەيالىق كيم چەن ياندى قولدايتىنىن مالىمدەدى.

 كيم چەن يان قازىر ينتەرپول پرەزيدەنتى مىندەتىن ۋاقىتشا اتقارادى. بۇل قىزمەت ينتەرپولدىڭ بۇرىنعى باسشىسى مەن حۋنۆەي قىركۇيەكتە جوعالىپ، كەيىن وتستاۆكاعا كەتكەن سوڭ بوساپ قالعان. مەن حۋنۆەيدى قىتاي بيلىگى بەيجىڭگە ۇشىپ بارعان بويدا ۇستاپ، پارا الدى دەپ ايىپتاعان.

قاراشانىڭ 21- كۇنى دۋبايدا ينتەرپولدىڭ جىل سايىنعى كونفەرەنسياسى وتەدى. جيىندا اسسوتسياتسياعا مۇشە 192 ەلدىڭ وكىلدەرى ينتەرپولدىڭ جاڭا باسشىسىن سايلايدى.

سوڭعى كۇندەرى حالىقارالىق ب ا ق- تا ماسكەۋدىڭ ينتەرپولدىڭ قازىرگى ءتورت ۆۆيتسە- پرەزيدەنتىنىڭ ءبىرى، رەسەيلىك گەنەرال الەكساندر پروكوپچۋكتىڭ كانديداتۋراسىن قولداۋعا تالپىنىپ جاتقانى تۋرالى ماقالالار جاريالانىپ جاتىر. ماسكەۋ كرەمل پروكوپچۋكتىڭ ينتەرپول باسشىسى بولىپ سايلانعانىن قولدايتىنىن رەسمي تۇردە مالىمدەگەن.

بۇل مالىمدەمەنى رەسەي وپپوزيتسياسى مەن امەريكالىق ساياساتكەرلەر قاتاڭ سىنادى. شەتەلدە تۇراتىن وپپوزيتسيونەر ميحايل حودوركوۆسكي مەن رەسەي قۇقىق قورعاۋ ورگاندارى ىزدەۋ جاريالاعان بريتاندىق قارجىگەر بيلل براۋدەر الەكساندر پروكوپچۋكتى ينتەرپول باسشىسى قىلىپ سايلاۋدىڭ قاۋىپتى ەكەنىن ەسكەرتتى.

الەكساندر پروكوپچۋكتىڭ سايلانۋىنا قارسىلار ول ينتەرپول باسشىسى بولسا، ۇيىمدى رەسەي پرەزيدەنتى ۆلاديمير پۋتيننىڭ ساياسي قارسىلاستارىن قۋدالاۋعا پايدالانادى دەپ سانايدى.

رەسەي بۇعان دەيىن پۋتيندى ەڭ قاتتى سىنايتىنداردىڭ ءبىرى بيلل براۋدەردى ينتەرپول ارقىلى تۇتقىنداۋعا بىرنەشە رەت تالپىنعان. ينتەرپول مۇنىڭ ساياسي استارى بار دەپ، تاپسىرىستى ورىنداۋدان باس تارتقان.

**

ينتەرپول -  1923 -جىلى قۇرىلعان قىلمىستىق پوليتسيانىڭ حالىقارالىق ۇيىمى. 1972 -جىلدان باستاپ شتاب- پاتەرىنىڭ ورنالاسۋ ورنى فرانسيا (ليون قالاسى) بولىپ انىقتالدى. ينتەرپول قىلمىسكەرلەردى تىركەۋدىڭ حالىقارالىق ورتالىعى رەتىندە ارەكەت ەتەدى، سونداي- اق قىلمىسكەرلەردى (كۇدىكتى، حابار- وشارسىز جوعالعان ادامداردى، ۇرلانعان كۇندىلىقتاردى) حالىقارالىق ىزدەستىرۋ جۇمىسىن ۇيلەستىرۋدى جۇزەگە اسىرادى. قازىرگى ۋاقىتتا ينتەرپول 190 ەلدىڭ وكىلدەرىنەن، الەمنىڭ بارلىق ەلدەرىنىڭ پوليتسيا وفيتسەرلەرى جۇمىس ىستەيتىن باس حاتشىلىقتان تۇرادى. 

azattyq.org