وڭتۇستىك كورەيا ونلاين-قىزمەت كورسەتۋدە الەمدە قالاي كوش باستادى؟
وڭتۇستىك كورەيانىڭ ۇلتتىق اقپاراتتىق قوعامدىق اگەنتتىگىنىڭ اقپاراتتىق-كوممۋنيكاتسيالىق تەحنولوگيالار سالاسىنداعى جاھاندىق ىنتاماقتاستىق دەپارتامەنتىنىڭ باس عىلىمي قىزمەتكەرى، عىلىم دوكتورى مەنگۆون سونگ بۇگىن استاناداعى «سيفرلاندىرۋ جاعدايىندا مەملەكەتتىك قىزمەتتەردى كورسەتۋ سالاسىن دامىتۋ پەرسپەكتيۆالارى» شاراسىنا قاتىستى. اتالمىش كونفەرەنسيانى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ۇيىمداستىرىپ وتىر.
«كورەيانىڭ ەلەكتروندى ۇكىمەت جۇيەسىن بىرنەشە كەزەڭگە ءبولىپ قاراستىرۋعا بولادى. ءبىرىنشى كەزەڭ 1967-جىلدان 1994-جىلعا دەيىنگى ارالىقتى قامتيدى. ول شاق - ەلەكتروندى ۇكىمەت جۇيەسىن قۇرۋدىڭ ەڭ باستاپقى ۋاقىتى. وسى ارالىقتا اقپاراتتاردى وڭدەۋ ءۇشىن تۇڭعىش رەت پەرسونالدى كومپيۋتەرلەر ەنگىزىلە باستادى. 1995-2002-جىلدار ارالىعىن قامتيتىن ەكىنشى كەزەڭدە ەلەكتروندى ۇكىمەتتىڭ ينستيتۋتسيونالدىق بازاسى بەكىتىلدى. وسىدان كەيىن ءبىز ساتى-ساتى بويىنشا اقپاراتتاردى سيفرلاندىرۋعا قادام جاساي باستادىق. ەكىنشى كەزەڭدە ءبىز سيفرلاندىرۋدى دامىتۋدىڭ بىردەن-ءبىر الاڭى - كەڭ اۋقىمدى ينتەرنەت جەلىسىن ىسكە قوسۋ ەكەنىن تۇسىندىك تە، وسى باعىتقا قارجىلىق ينۆەستيتسيا كوپتەپ سالىنا باستادى. ەكىنشى كەزەڭدە ەلەكتروندى ۇكىمەت تۋرالى قۇجات كۇشىنە ەندى. وسى الاڭنىڭ ارقاسىندا كورەيا ۇكىمەتى ەلەكتروندى قىزمەتتەردىڭ ءتىزىمىن ەداۋىر ارتتىرۋعا قول جەتكىزدى»، - دەيدى مەنگۆون سونگ.
ونىڭ ايتۋىنشا، كورەيا ۇكىمەتى قازىرگى پروگرەسكە جەتۋ ءۇشىن ءبىرقاتار قيىنشىلىقتارمەن بەتپە-بەت كەلگەن. ناقتىراق ايتقاندا، اقپاراتتاردى ينتەگراتسيالاۋدا جانە ازاماتتار اقپاراتتىق قىزمەتتى الۋ كەزىندە كەدەرگىلەر بار بولىپ شىققان.
«سوندىقتان، ازاماتتاردىڭ ونلاين-قىزمەتتەردى الۋىن جەڭىلدەتۋ ءۇشىن 2008-جىلدان باستاپ مەملەكەتتىك قىزمەتتەردىڭ ينتەگراتسياسى باستالدى. بۇل رەتتە مەملەكەتتىك قىزمەتتەردى كورسەتۋدە اشىقتىققا باسىمدىق بەرىلدى. وسىنىڭ ارقاسىندا ونلاين-قىزمەتتەر بويىنشا وڭتۇستىك كورەيا ءۇش جىل قاتارىنان ءبىرىنشى ورىن العان بولاتىن»، - دەدى كورەيالىق مامان.
مەنگۆون سونگتىڭ ايتۋىنا قاراعاندا، كورەيانىڭ ەلەكتروندى ۇكىمەتى قازىرگى تاڭدا 1400 ەلەكتروندى ۇكىمەتتىك قىزمەتتى بىرىكتىرەدى.
«سىزدەرگە كورەيا ەلەكتروندى ۇكىمەتىنىڭ نەگىزگى جۇيەلەرىن تانىستىرا كەتسەم دەيمىن. «One stop» جۇيەسى ارقىلى كورەيالىق ازامات تۇرعىلىقتى مەكەنجايىن اۋىستىرعان جاعدايدا اتالمىش پورتالعا ەنىپ، مەكەنجايىن وزگەرتۋ تۋرالى ءبىر عانا حابارلاما جىبەرىپ، مەكەنجاي بويىنشا تىركەلە الادى. دەمەك، وعان مىندەتتى تۇردە مەملەكەتتىك ورگاندارعا بارىپ، ءوتىنىم بەرۋدىڭ قاجەتى جوق. سول سەكىلدى «Hometax» ۇلتتىق ەلەكتروندى سالىق جۇيەسى ارقىلى ازاماتتار بانكتەرگە نەمەسە سالىق ورگاندارىنا بارماي-اق ونلاين-رەجىمدە سالىقتىق قىزمەتتەردى الادى. بۇدان بولەك، «UNI- Pass» كەدەندىك تازارتۋدىڭ ەلەكتروندىق جۇيەسى دە ءوز جەمىسىن بەرىپ وتىر. ءوزىڭىز بىلەتىندەي، كورەيانىڭ نەگىزگى تابىس كوزى - ساۋدا-ساتتىقتا. اتالمىش جۇيە ارقىلى ازاماتتار از ۋاقىت ىشىندە يمپورتتىق-ەكسپورتتىق ماسەلەلەردىڭ ءبارىن رەتتەي الادى. سونىمەن بىرگە، KONEPS ونلاين ساتىپ الۋدىڭ ەلەكتروندى جۇيەسى ارقىلى كورەيالىقتار ينتەرنەت-ساۋدا جۇرگىزەدى»، - دەيدى ول.
مەنگۆون سونگ سونىمەن قاتار، كورەياداعى ۆەدومستۆولار اقپاراتتارىن ءوزارا الماسا الاتىنداي جاعداي جاساعانىن اتاپ ءوتتى. ول ءۇشىن كورەيادا GIDS - ۇكىمەتتىڭ مالىمەتتەرىن ينتەگراتسيالاۋ ورتالىعى اشىلعان ەكەن. اتالمىش جۇيە بەلگىلى ءبىر ازامات تۋرالى بارلىق مالىمەتتەردى ءبىر ورتالىققا جيناي الادى.