ەرلان سايروۆ: بىزگە تاريح ارقىلى بولاشاعىمىزعا جول سالۋ قاجەت

None
None
استانا. قازاقپارات - ءوزىمىزدىڭ تولاعاي تاريحىمىزدى تۇلەتۋ - وتە وزەكتى. الەۋمەت تانۋشى ءارى ساياساتتانۋشى، ق ر كاسىپوداقتار فەدەراتسياسى ءتوراعاسىنىڭ ورىنباسارى ەرلان سايروۆ ەلباسىنىڭ «ۇلى دالانىڭ جەتى قىرى» اتتى ماقالاسىنا وراي وسىلاي پىكىر ءبىلدىردى، دەپ حابارلايدى قازاقپارات ءتىلشىسى.

«كوڭىلگە قونىمدى. ءوزىڭنىڭ تاريحىڭمەن ماقتانىپ قانا قويماي، سول تاريحتىڭ قىر-سىرلارىن ساراپتاپ، عىلىمي نەگىزدە بولاشاققا باعدار جاساۋ وتە وزەكتى. ءبىز جاھاندانۋ زامانىنا ءوزىمىزدىڭ تامىرىمىزبەن، سول تامىرىمىزدى تەرەڭدەتە وتىرىپ ەنۋىمىز وزەكتى. وسى تۇرعىدا، ءوزىمىزدىڭ تولاعاي تاريحىمىزدى تۇلەتۋ كۇن تارتىبىندە جانە وزەكتى. وتارلاۋ كەزەڭىندە، ءبىزدى، قازاقتاردى، تاريحى بولماعان، بولمىسى، بەت-الپەتى جوق، دالانى كەزىپ جۇرگەن حالىق رەتىندە كورسەتۋ ارەكەتتەرى بولدى. ءبىز سول جۇيەلى ارەكەتتەردىڭ كەسىرىنەن ءوزىمىزدىڭ تاريحىمىزدان ايرىلىپ قالدىق، تاريحتى ەسىمىزگە العىمىز كەلمەدى، «تاريحتان شارشاۋ» سيندرومىنا ىلىكتىك... «حالىقتى قۇرتقىڭ كەلسە، ونىڭ تاريحىن قۇرتۋ كەرەك، تاريحىن بىلمەگەن حالىق توبىرعا اينالادى» دەگەن اسپەكت بار. ءبىز وسىناۋ «ماڭگۇرتتىك» زاماندى دا باسىمىزدان وتكەردىك... جاھاندانۋ پروتسەستەرى ۇلتتىڭ وتكەنى مەن وتكەرگەنىن باسقاشا كوزقاراسپەن ساراپتاي وتىرىپ، بولاشاققا باعدار جاساۋدى تالاپ ەتەدى...»، - دەپ جازدى ە. سايروۆ ءوزىنىڭ فەيسبۋكتەگى پاراقشاسىندا.

بۇل تۇرعىدا ساراپشى ۇلى دالا كەڭىستىگىندەگى جوبالاردى ەل يگىلىگىنە پايدالانۋ كەرەكتىگىن اتاپ ءوتتى.

«جاھاندانۋ ءارقاشان بولعان... حالىقتاردىڭ ۇلى كوشى، التىن وردا، دەلي سۇلتاناتى ۇلى دالانىڭ سەناريىمەن بولعان جاھاندانۋدىڭ جوبالارى... وسى تاريحي جوبالاردىڭ جەتىستىكتەرىن ءالى كۇنگە دەيىن باتىس يەلەنىپ، پايدالانىپ كەلەدى... اتتى قولعا ۇيرەتۋ، ۇزەڭگى، مەتاللۋرگيا، التىن وڭدەۋ تەحنولوگيالارى ءبىزدىڭ قاسيەتتى جەردە پايدا بولعان... وسى جايت باتىس تاريحناماسىندا جابۋلى قازان بولىپ تۇر. عىلىمي-تەحنيكالىق پروگرەسستىڭ تاريحشىسى لينن ۋايت «ۇزەڭگىنى جاساۋ ادامزات تاريحىندا ۇشاق، اۆتوموبيلدى جاساۋمەن تەڭ ريەۆوليۋتسيا جاسادى» دەيدى... بىزگە تاريح ارقىلى، ءوزىمىزدىڭ بولاشاعىمىزعا جول سالۋ قاجەت...»، - دەدى ەرلان سايروۆ.

سوڭعى جاڭالىقتار