ديماش لوندونداعى كونسەرتىندە ءان شىرقاعان اقتوبەلىك وقۋشىعا ساتتىلىك تىلەدى

اقتوبە. قازاقپارات - ديماش قۇدايبەرگەن لوندونداعى جەكە كونسەرتىندە ءان شىرقاعان اقتوبەلىك وقۋشىعا ساتتىلىك تىلەدى، دەپ حابارلايدى قازاقپارات ءتىلشىسى.

بۇعان دەيىن ءانشى ديماش قۇدايبەرگەننىڭ ارنايى جۇلدەسىنە يە بولىپ، لوندونداعى كونسەرتىنە جولداما العان اقتوبەلىك وقۋشى نارعىز جانۇزاقوۆا تۋرالى جازعان بولاتىنبىز. ول Indigo at the O2 كونسەرت زالىندا ونەر كورسەتىپ، ۇمىتىلماس سىي جاساعان ديماش قۇدايبەرگەنگە العىسىن جەتكىزدى.

«ديماش اعامەن ءبىر ساحنادا ءارى Indigo at the O2 كونسەرت زالىندا ونەر كورسەتتىم. مەن باقىتتىمىن. ءدال وسىنداي باق بۇيىرعانى ءۇشىن اللاعا سانسىز ماداق. كەيىن ماعان سەنىپ، مەنى قولداعان انام مەن اپاما، قانات، سۆەتا ايتبايەۆتارعا العىس ايتامىن. ماعان سەنىپ، قولداعان بارشاعا العىسىم شەكسىز. ارماندار ورىندالادى، سەنۋ كەرەك»، - دەپ جازدى جاس تالانت نارعىز جانۇزاقوۆا. ول لوندون ساحناسىندا «ەلىمنىڭ جۇرەگى - استانا» ءانىن ورىندادى.

جاس ءانشىنىڭ لەبىزىنە ديماش قۇدايبەرگەن دە ءوز پىكىرىن قالدىرعان.

«جارايسىڭ، بالاپان! وتە كەرەمەت ورىنداپ شىقتىڭ! بولاشاقتا «مەنىڭ كونسەرتىمە الەمدەگى 1№ ءانشى نارعىز قاتىسقان ەدى كەزىندە» دەپ ماقتانىپ وتىرارمىز»، - دەدى ديماش قۇدايبەرگەن.