ن. نازاربايەۆ: ءبىزدىڭ باتىرلار مەن ويشىلدار - الەم ەلىكتەۋگە لايىق تۇلعالار

None
None
استانا. قازاقپارات - جاڭا تاريحي تەلە- كينو تۋىندىلاردىڭ جانرلارىنا ۇلى دالانىڭ باي ميفولوگيالىق جانە فولكلورلىق ماتەريالدارىن پايدالانۋعا بولادى. بۇل جايىندا ق ر پرەزيدەنتى نۇرسۇلتان نازاربايەۆ بۇگىن جاريالانعان «ۇلى دالانىڭ جەتى قىرى» اتتى ماقالاسىندا جازدى.

ق ر پرەزيدەنتىنىڭ جازۋىنشا، قازىرگى زامانداعى حالىقتاردىڭ تاريحي تانىم- تۇيسىگىندە كينو ونەرى ەرەكشە ورىن الادى. جالپى حالىقتىڭ ساناسىندا فيلمدەردەگى جارقىن كينووبرازدار ىرگەلى عىلىمي مونوگرافيالارداعى دەرەكتى پورترەتتەردەن گورى ماڭىزدىراق ءرول اتقارادى.

 «سوندىقتان، تەز ارادا قازاقستاننىڭ وركەنيەت تاريحىنىڭ ۇزدىكسىز دامۋىن كورسەتەتىن دەرەكتى- قويىلىمدىق فيلمدەردىڭ، تەليەۆيزيالىق سەريالدار مەن تولىقمەتراجدى كوركەم كارتينالاردىڭ ارنايى سيكلىن وندىرىسكە ەنگىزۋ كەرەك. اتالعان جوبالار كەڭ حالىقارالىق ىنتىماقتاستىق اياسىندا وتاندىق جانە شەتەلدىك ۇزدىك ستسەناريستەردى، رەجيسسەرلەردى، اكتەرلەردى، پروديۋسەرلەردى جانە زاماناۋي كينو ءوندىرىسىنىڭ باسقا دا ماماندارىن تارتۋ ارقىلى جۇزەگە اسىرىلۋعا ءتيىس»، - دەپ اتاپ وتەدى ەلباسى.

مەملەكەت باسشىسى قىزىقتى ءارى مەلودرامالىق سارىندارمەن قاتار، كورەرمەندەر ءۇشىن تانىمال فەنتەزي جانە شىتىرمان وقيعالى بلوكباستەرلەردىڭ ەلەمەنتتەرىن قوسا وتىرىپ، جاڭا تاريحي تەلە- كينو تۋىندىلاردىڭ جانرلارىن بارىنشا كەڭەيتۋ قاجەتتىگىن دە اتاپ وتەدى.

 «وسى ماقساتپەن ۇلى دالانىڭ باي ميفولوگيالىق جانە فولكلورلىق ماتەريالدارىن پايدالانۋعا بولادى. ۇلت قاھارماندارىن ۇلگى تۇتۋ ءۇردىسىن قالىپتاستىرۋعا جول اشاتىن ساپالى بالالار فيلمدەرى مەن مۋلتيپليكاتسيالىق سەريالداردى اسا قاجەت ەتەتىن وسكەلەڭ ۇرپاقتىڭ دا تالعامىنا ەرەكشە نازار اۋدارۋ كەرەك. ءبىزدىڭ داڭقتى باتىرلارىمىز، ويشىلدارىمىز بەن ەل بيلەۋشىلەرىمىز - تەك قازاقستان عانا ەمەس، سونداي- اق، بۇكىل الەم بويىنشا ەلىكتەۋگە لايىقتى تۇلعالار»، - دەپ تۇيىندەيدى ويىن نۇرسۇلتان نازاربايەۆ.

 ايتا كەتەيىك، پرەزيدەنت اتالمىش ماقالاسىندا «ۇلى دالانىڭ كونە سارىندارى» جيناعىن باسىپ شىعارۋدى ۇسىنعان بولاتىن. ەلباسى سونداي- اق، «ۇلى دالا» اتتى ەجەلگى ونەر جانە تەحنولوگيالار مۋزەيىن اشۋ كەرەكتىگىن ايتتى.

اۆتور: مارلان جيەمباي

سوڭعى جاڭالىقتار