قانات يسلام باستاعان قازاقتىڭ بەتكە ۇستار بوكسشىلارى نەگە رينگتە كورىنبەي كەتتى؟

 استانا. قازاقپارات - قازاقستاندا كاسىپقوي بوكس ءتۇرى وتە قارقىندى دامۋ ۇستىندە.

وتاندىق بوكسشىلار بىرىنەن سوڭ ءبىرى مۇحيت اسىپ، مانسابىن ا ق ش- تا جەتىلدىرىپ جاتىر.

ولاردىڭ مۇنداي تالپىنىسىنا گەننادي گولوۆكيننىڭ جەتىستىگى سەبەپكەر بولسا كەرەك. الايدا وسىدان بىرەر جىل بۇرىن ەلىنىڭ اتىن شىعارىپ، قارسىلاستارىنىڭ قورقىنىشتى تۇسىنە اينالعان قازاق بوكسشىلارىنىڭ ءبىرقاتارى بۇگىندە رينگتەن كورىنبەي كەتتى دەپ جازادى prosport.ru.

بولاشاعىنان ۇلكەن ءۇمىت كۇتتىرگەن وتاندىق بوكسشىلار بۇگىندە سپورتتان الشاقتاپ كەتكەن. كوپشىلىك ولاردى بىلعارى قولعاپپەن قوش ايتىستى دەپ ويلاپ جۇرگەنى دە جاسىرىن ەمەس.

قانات يسلام، 34 جاس.

ءبىرىنشى ورتا سالماق (69 كەلىگە دەيىن)

جەتىستىگى: 25 - 0، 20 ك و

سوڭعى جەكپە-جەگى: 9- قىركۇيەك 2017-جىل، برەندون كۋكقا قارسى.

تانىمالدىلىعى بويىنشا ەكىنشى ورىندى يەلەنەتىن وتاندىق بوكسشى قانات يسلام بۇگىندە مانسابىنداعى اسا اۋىر كۇندەرىن باسىنان وتكىزىپ جاتىر.

ول بوكس الەمىندەگى اسا بەدەلدى ەگيس كليماس اتتى مەنەدجەرمەن كەلىسىمشارتقا وتىرعان كەزدە، بارلىعى وعان تيتۋلدىق جەكپە-جەك بەرىلەدى دەپ كۇتتى. الايدا قانات ا ق ش- تا جاراقات الىپ قالۋىنا بايلانىستى ەلگە قايتىپ، جوسپارلاعانى ىسكە اسپاي قالدى.

قازاقستاندا وعان جاراقاتىنىڭ ءوزى ويلاعانىنان دا اۋىر ەكەنىن ايتقان. قانات يسلامنىڭ رينگكە شىقپاي كەتكەنىنە وسىمەن ءبىر جىل بولدى.

جانكۇيەرلەر «قازاق باتىرى مانسابىن اياقتاۋعا جاقىن» دەگەن بولجام جاساپ تا ۇلگەردى. ءبىراق، قازاقستاندىق بوكسشى ولاردى سابىرعا شاقىرىپ، جاقىندا قايتا ورالاتىنىنا سەندىرگەن.

يسا اكبەربايەۆ، 35 جاس

ءبىرىنشى ورتا سالماق (90 كەلىگە دەيىن)

جەتىستىگى: 20 - 0، 15 ك و

سوڭعى جەكپە-جەگى: 16- جەلتوقسان 2017-جىلى، ميرنەس دەناديچكە قارسى.

كوپشىلىك گەننادي گولوۆكيننىڭ دوسى جۇلدە ءۇشىن جۇدىرىقتاسادى دەپ ۇزاق كۇتتى. الايدا ا ق ش- تا بىرنەشە مارتە جەكپە-جەك وتكىزىپ كورگەن يسا قازىرگى تاڭدا الماتىعا ورالعان.

ول قازاقستانمەن كورشىلەس ەلدەردە عانا جەكپە-جەككە شىعىپ ءجۇر. ونىڭ سوڭعى كەزدەسۋى كيەۆ قالاسىندا وتكەن بولاتىن. يسا بوسنيالىق ميرنەس دەناديچتى تورەشىلەر شەشىمىمەن جەڭىپ كەتتى.

بيىل وتاندىق بوكسشى مۇلدە جۇدىرىقتاسقان جوق. يسا اكبەربايەۆتىڭ ءتىپتى العان جاراقاتى دا جوق. ونىڭ رينگتە كورىنبەي كەتۋىنە ۇيىمداستىرۋشىلىق جاعى اسەر ەتكەن كورىنەدى.

جانقوش تۇراروۆ، 27 جاس

جارتىلاي ورتاشا سالماق (66 كەلىگە دەيىن)

جەتىستىگى: 22 - 0، 18 كو

سوڭعى جەكپە-جەگى: 9- قىركۇيەك 2017-جىلى، برۋنو لەوناردو رۋمايعا قارسى.

قانات يسلامعا قاراعاندا جانقوش تۇراروۆ جايلى اقپاراتتىق پورتالدار كوپتەپ جازۋدا. ءبىراق بوكسشىنىڭ جاقسى اتى شىقپاي ءجۇر. جاقىندا عانا ول اتىس وقيعاسى بويىنشا سوت الدىنا كەلگەن بولاتىن.

ءوزىنىڭ سوڭعى جەكپە-جەگىن قازاق باتىرى وتكەن جىلدىڭ قىركۇيەك ايىندا وتكىزدى. قارسىلاسىن جەڭۋ وعان وڭاي تيمەگەن. وتاندىق بوكسشى بۇل كەزدەسۋدەن كەيىن اسا اۋىر جاراقات الىپ، ءبىراز ۋاقىت بوكستان الىستاپ كەتتى.

ونى دا قانات يسلام سياقتى ۇزدىك بوكسشىلار رەيتينگىسىنەن الىپ تاستاعان. الايدا جانقوش تۇراروۆ وزىنە تيەسىلى ورىندى جاقىن ارادا قايتارىپ الۋعا نيەتتى. جاسى ەندى 27 گە كەلگەن سپورتشىنىڭ باعىندىرار بەلەستەرى ءالى دە كوپ دەگەن ۇمىتتەمىز.

بەكمان سويلىبايەۆ، 28 جاس

ەكىنشى جارتىلاي ورتا سالماق (58 كەلىگە دەيىن)

جەتىستىگى: 12 - 0، 4 ك و

سوڭعى جەكپە-جەگى: 19- قاراشا 2017-جىلى، فەرناندو ۆارگاس پارراعا قارسى.

جوعارىدا ايتىلىپ وتكەن بوكسشىلارعا قاراعاندا بەكمان سويلىبايەۆ رينگكە تۇراقتى تۇردە شىعىپ تۇردى. الايدا سوڭعى جەكپە-جەكتەن كەيىن وعان نە بولعانى بەلگىسىز.

وتكەن جىلدىڭ قاراشاسىندا فەرناندو ۆارگاس پاررانى جەڭگەن ول ءبىر جىلدان بەرى بوي كورسەتپەي كەتتى. وعان بوكسشىنىڭ جاراقاتتارى سەبەپ بولعانى انىقتالدى.

وعان قوسا، بۇل سپورتشىعا دا جانقوش تۇراروۆ سياقتى مەنەدجەر اۋىستىرعان ابزال.