شالا تۋعان شاقالاق: الەمدەگى ەڭ كىشكەنتاي سابيلەر

 استانا. قازاقپارات - ءومىر سۇرۋگە اسىعىپ، جۇكتىلىكتىڭ جەتىنشى، سەگىزىنشى ايلارىندا دۇنيەگە كەلگەن سابيلەر جايلى كوپ ەستيمىز.

الايدا، جۇكتىلىكتىڭ جيىرما ءبىرىنشى نەمەسە جيىرما ەكىنشى اپتالارىندا تۋىلىپ، ءولىم اۋزىنان امان قالعان باتىر بوبەكتەردى بىلە بەرمەيمىز.

Stan.kz اقپاراتتىق اگەنتتىگى نازارلارىڭىزعا سالماقتارى 200 گرام بولىپ تۋىلعان شاقالاقتار جايلى قىزىقتى مالىمەتتەردى ۇسىنادى

فلوريدا شتاتىنىڭ تۇرعىنى سونيا تەيلور جۇكتىلىگىنىڭ جيىرما ەكىنشى اپتاسىندا 284 گرامدىق اماليا ەسىمدى قىز بالانى دۇنيەگە اكەلگەن. ءسابي 2006-جىلدىڭ 24- قازانىندا تۋىلدى. ونىڭ بويى 24,13 سانتيمەتردى قۇرادى.

اماليانىڭ اناسى ونى كوتەرمەس بۇرىن بىرنەشە جىلدار بويى بەدەۋلىكپەن كۇرەسكەن. جۇكتىلىكتىڭ توعىزىنشى ايىندا كوپتەن كۇتكەن سابيىنە ءومىر سىيلاۋدى جوسپارلاعان. ءتىپتى دارىگەرلەر دە بوساناتىن ۋاقىتتى كەيىنگە شەگەرۋگە ۇمتىلعان. الايدا، اماليا جارىق دۇنيەنى كورۋگە اسىعىپ، مەرزىمىنەن بۇرىن تۋىلعان. ومىرىندەگى العاشقى جارتى جىلداي ۋاقىتىن ينكۋباتوردا وتكىزگەن. بۇگىندە اماليانىڭ دەنساۋلىعى جاقسى.

1987-جىلدىڭ 20- مامىرىندا كانادادا دۇنيەگە 624 گرامدىق دجەيمس دجيلل ەسىمدى ەر بالا كەلدى. ءسابيدىڭ اناسى برەندا اۋرۋحاناعا وتە ناشار حالدە تۇسكەن. دارىگەرلەر وعان بالانىڭ جەتىلمەگەنىن، ونىڭ امان قالمايتىنىن بىردەن ەسكەرتكەن. الايدا قولدارىنان كەلگەنشە بالا ءومىرى ءۇشىن كۇرەسىپ، ءسابيدى وكپە جەلدەتۋشى اپپاراتقا جالعاپ امان الىپ قالعان. بۇگىندە شاقالاق دەنساۋلىعى مىقتى ازاماتتاردىڭ ءبىرى.

2010-جىلدىڭ 7- قاراشاسىندا دۇنيەگە ەرتە كەلگەن شاقالاقتاردىڭ ءتىزىمى تاعى دا ءبىر سابيمەن تولىقتى. جۇكتىلىكتىڭ 21 اپتاسىندا تۋىلعان فريدا مانگولدتىڭ سالماعى 450 گرام، ال بويى 27,94 سانتيمەتر بولعان. نەگىزى، 33 جاستاعى انا ەگىزدەردى تۋعان. الايدا، التى اپتادان سوڭ قىزدىڭ ەگىزىنىڭ، ياعني كيلليان ەسىمدى ۇل بالانىڭ جۇرەگى، ىشەكتەرى قاتتى اۋىرعان. ءسويتىپ ءسابي شەتىنەپ كەتكەن.

فريدانى اتا-اناسى اۋرۋحانادان شىعارعاندا مەكەمەنىڭ باس دارىگەرى ءسابيدىڭ دەنساۋلىعى جاقسى ەكەنىن مالىمدەگەن. جانە فريدانىڭ وقيعاسىن «مەديتسينالىق عاجايىپ دۇنيە» دەپ اتاعان.

الەمدەگى ەڭ كىشكەنتاي سابيلەردىڭ ءبىرى ەميليا گرابارچيك 2016-جىلى باتىس گەرمانيادا، ۆيتتەندە دۇنيەگە كەلگەن. دارىگەرلەر ونى امان قالمايدى دەپ ويلاعان. اۋرۋحانادا «كىشكەنتاي سارباز» دەگەن اتتى يەلەنگەن ول، بۇگىنگى كۇنى باسقا بالالاردان قالىسپاي جاقسى ءومىر سۇرۋدە.

ءسابيدىڭ اناسى جۇكتىلىكتىڭ 26 اپتاسىندا دارىگەرمەن كەڭەسىپ، كەسار وتاسىن جاساتۋ تۋرالى ماڭىزدى شەشىمدى قابىلداۋعا ءماجبۇر بولعان. دارىگەرلەردىڭ سوزىنشە، ەگەر ول وتانى جاساتپاعاندا ءسابي جاتىردا قاجەتتى قورەكتىڭ جەتىسپەۋىنەن شەتىنەپ كەتەتىن ەدى. ادەتتە جۇكتىلىكتىڭ 26 اپتاسىندا جاتىرداعى بالانىڭ سالماعى 566 گرامدى قۇرايدى. الايدا، قورەكتىڭ جەتىسپەۋىنەن ەميليانىڭ سالماعى بار بولعانى 226 گرام بولعان.

2004-جىلدىڭ 19- قىركۇيەگىندە لويول ۋنيۆەرسيتەتىنىڭ مەديتسينالىق ورتالىعىندا، يللينويس شتاتىندا سالماعى 244 گرامدىق رۋمايسا راحمان ەسىمدى ارۋ دۇنيەگە كەلدى. ونىڭ ەگىزى حيبانىڭ سالماعى 563 گرامدى قۇراعان. رۋمايسا كەسار وتاسى ارقىلى تۋىلعان. قىزدىڭ اناسىنىڭ قان قىسىمى كوتەرىلىپ كەتكەندىكتەن، دارىگەرلەر ءسابيدى قۇتقارىپ قالۋ ءۇشىن وتانى جاساۋعا ءماجبۇر بولعان.

ءسابي دۇنيەگە كەلگەننەن كەيىن دارىگەرلەر ونى بىردەن وكپە جەلدەتۋشى اپپاراتقا جالعاعان. اۋرۋحانادا وتكىزگەن ءۇش ايدىڭ ىشىندە رۋمايسا 1,18 كەلى، ال ونىڭ سىڭارى حيبا 2,25 كەلى جيناعان. 10 اپتالىق كەزەڭدەرىندە ولار ەشبىر قيىندىقسىز ءسۇتتى بوتەلكەمەن ىشە باستادى. بۇگىنگى كۇنى فيزيكالىق دامۋ جاعىنان سالىستىرعاندا رۋمايسا قاتارلاستارىنان وزىپ كەتكەن. 5 جاستا ونىڭ سالماعى 15 كيلوگرامدى، ال بويى ءبىر مەتردى قۇرادى.

مەليندا ستار گۆيدو 2011-جىلدىڭ 30- تامىزىندا، لوس-اندجەلەستەگى مەديتسينالىق ورتالىقتا تۋىلعان. باسىندا ونىڭ سالماعى 270 گرام عانا بولعان. سوسىن ول اۋرۋحانادا 5 اي وتكىزگەننەن كەيىن، ونى 2,05 كيلوگرامعا دەيىن كوتەرگەن.

ناتان سيبەرراس جۇكتىلىكتىڭ جيىرما ءتورتىنشى اپتاسىندا، 2008-جىلدىڭ جازىندا، ۇلى بريتانيادا تۋىلدى. دارىگەرلەر بالانىڭ امان قالاتىنىنا كۇمان كەلتىرگەن. ءبىراق ءسابي الاقانعا سىيىپ كەتەتىندەي كىشكەنتاي عانا بولسا دا، ەشقانداي اپپاراتسىز، وزدىگىمەن دەمالۋدى بىلگەن. تابەتى دە كەرەمەت بولعان، سالماقتى تەز جيناعان. بۇگىنگى كۇنى بالانىڭ دەنساۋلىعى جاقسى.

ۋيللوۋ ليۋددەن- برۋكس 2009-جىلى جۇكتىلىكتىڭ 23 اپتاسىندا تۋىلعان. جۇكتىلىكتىڭ 23 اپتاسىندا قىزدىڭ اناسىنىڭ جاتىرىندا ينفەكسيا باستالىپ كەتكەن. ءسويتىپ ول مەرزىمىنەن بۇرىن بوسانۋعا ءماجبۇر بولعان. دارىگەرلەر بالانىڭ تولعاق كەزىندە شەتىنەپ كەتەتىنىنە سەنىمدى ەدى. ءبىراق ءسابي جارىق دۇنيەگە كەلگەن ساتتە، تەرەڭ تىنىس الىپ، جىلاي باستاعان. قازىر ونىڭ دەنساۋلىعى جاقسى.