استانادا «مەنىڭ ءتۇس الەمىم» اتتى سۋرەت كورمەسى ءوتتى
استانا تورىندە اشىلعان بۇل ونەر كورمەسىنە بەينەلەۋ ونەرىنىڭ ءتۇرلى جانرىندا سالىنعان، قوعامعا وي سالاتىن، تاربيەلىك مازمۇنى بار، كوركەمدىك مانەرىمەن ەرەكشەلەنەتىن شىعارمالار قويىلعان. كورمەگە كەلگەن جۇرت اتالعان تۋىندىلارعا قىزعۋشىلىق تانىتىپ، ىستىق ىقىلاسپەن قاراپ شىقتى.
اۆتور كورمەگە قوعامنىڭ ءارتۇرلى تاقىرىپتارىن ارقاۋ ەتكەن تۋىندىلارىنىڭ ءبىر بولىگىن كوپشىلىك نازارىنا ۇسىنعانىن جەتكىزدى.
«مەن وسى ۋاقىتقا دەيىن شىعارماشىلىعىمدا اقپاراتتىق كاريكاتۋراعا باسىمدىق بەرىپ كەلەمىن. بۇل جانر ومىردەگى جاعىمسىز قۇبىلىستاردى، كىلەڭسىزدىكتەردى اشىپ كورسەتىپ، قوعامدى ونىمەن كورەسۋگە، كەمشىلىكتەردى تۇزەتۋگە ۇندەيدى. مىسالى، «مادەنيەتتى قالانىڭ، مادەنيەتسىز تۇرعىنى بولۋدان ساقتانايىق!» دەپ اتالاتىن تۋىندىم وسىنداي تاقىرىپقا ارنالعان. سونىمەن بىرگە كورمەگە «قازاق ەلى»، «ەركىندىكتىڭ سيمۆولى»، «مەنىڭ بالالىق شاعىم»، «كوكپار تارتۋ»، «اتامەكەن» سەكىلدى مايلى بوياۋمەن سالىنعان شىعارمالارىم قويىلعان. بۇل تۋىندىلاردىڭ ءاربىرىنىڭ وزىندىك ەرەكشە مازمۇنى، كوتەرگەن تاقىرىبى بار. جالپى شىعارمالارىما مەنىڭ تاعدىرىم، وتانىما، ەلىمە دەگەن ماحابباتىم، كوڭىل- كۇي تەبىرەنىسىم، ۇلتىمنىڭ جاۋھار مادەنيەتى، سالت- ءداستۇرى، تىرشىلىك داعدىسى، قازاقتىڭ بايتاق دالاسىنىڭ اسەم كورىنىسى ارقاۋ بولعان»، - دەيدى سۋرەتشى قايرات جايىربەك ۇلى.
كورمەنىڭ اشىلۋىنا ارنايى كەلىپ قاتىسقان قازاقستان سۋرەتشىلەر وداعىنىڭ مۇشەسى، بەلگىلى ءمۇسىنشى توقتار ەرمەكوۆ، قازاقستاننىڭ مادەنيەت قايراتكەرى ءومىرالى تىلەۋليەۆ سياقتى بەلگىلى سۋرەتشىلەر قايرات جايىربەك ۇلىنىڭ ەڭبەكتەرىنە ءوز باعالارىن بەرىپ، شىعارماشىلىق جولىنىڭ ناتيجەلى، جەمىستى بولۋىن تىلەدى.
«قايراتتىڭ جۇمىستارى سان- سالالى اۋقىمدىلىعىمەن، حالىقتىڭ كوزىن اشاتىن، وي سالاتىن ۇشقىرلىعىمەن ەرەكشەلەنەدى. ول جان- جاقتى سۋرەتشى، شىعارمالارىندا ۇلتتىڭ بولمىسىن كورسەتكەن مايلى بوياۋ كەسكىندەمەلەرى، گرافيكالارى، بەلگىلى ادامداردى بەينەلەگەن شارجدارى، قوعامنىڭ ءمىنىن اشقان كاريكاتۋرالارى مەن پلاكاتتارى كورىنىس تاپقان. بولاشاقتا تاعى دا تالعامى بيىك تۋىندىلار ومىرگە اكەلە بەرەدى دەپ سەنەمىن»، - دەيدى بەلگىلى ءمۇسىنشى توقتار ەرمەكوۆ.
قايرات جايىربەك ۇلىنىڭ قازاق حالقىنىڭ بولمىسىن بەينەلەگەن كوپتەگەن تۋىندىلارى قىتاي جەرىندە وتكەن سۋرەتشىلەر فەستيۆالدەرىندە كورسەتىلىپ، جوعارى باعالانىپ، ماراپاتتالعان. ال، قازاقستان ەلىنە قونىس اۋدارعاننان كەيىندە شىعارماشىلىق جۇمىسپەن بەلسەندى اينالىسىپ، رەسپۋبليكالىق، حالقارالىق سۋرەتشىلەر فەستيۆالدەرىنە ۇزبەي قاتىسىپ كەلەدى. ونىڭ تالعامدى، ورەسى بيىك شىعارمالارىنىڭ ءبىرقاتارى، سۋرەتشىلەر شىعارمالارىن توپتاستىرعان ءارتۇرلى ارنايى جيناق كاتالوگقا ەنگەن.
سونداي- اق، ول ق ر مادەنيەت جانە سپورت مينيسترلىگىنىڭ تاپسىرماسىمەن، قازاقتىڭ ميفتىك كەيىپكەرلەرىن بىرىزدىلەندىرۋ ماقساتىندا وتكەن رەسپۋبليكالىق بايقاۋعا قاتىناسىپ، جۇلدەگەر اتانعان. وسى بايقاۋ ناتيجەسىندە ىركتەلىنىپ الىنعان تۋىندىلار نەگىزىندە قۇراستىرىلعان «قازاقتىڭ ميفتىك كەيىپكەرى» اتتى جيناققا شىعارمالارى كىرگىزىلگەن. سونىمەن قاتار نازاربايەۆ زياتكەرلىك مەكتەپتەرىنە ارنالعان «ادەبيەتتىك وقۋ» كىتابىن قاتىستى سۋرەتتەرمەن بەزەندىرۋگە اتسالىسقان.
اۆتور: باقىتجول كاكەش