بوكسشى فيرۋزا ءشارىپوۆا جىل ادامى اتاندى

استانا. قازاقپارات - ەكى سالماق ساناتىندا چەمپيوندىق بەلدىكتەردىڭ يەسى، قازاقستاندىق كاسىپقوي بوكسشى فيرۋزا ءشارىپوۆا «التىن ادام - جىل ادامى» سىيلىعىنىڭ لاۋرەاتى اتاندى، دەپ حابارلايدى قازاقپارات سپورتشىنىڭ باسپا ءسوز قىزمەتىنە سىلتەمە جاساپ.

سالتاناتتى ماراپاتتاۋ ءراسىمى الماتىداعى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا ءوتتى. جىل سايىنعى شارا وسىمەن 19-رەت وتكىزىلىپ وتىر. جەڭىمپازدارعا جوبانىڭ باس جۇلدەسى - «التىن ادام» مۇسىنشەسى، «قوعامدىق مويىنداۋ» جانە «1№ جىل تاڭداۋى» مەدالدارى تاپسىرىلدى.

«قازاقستاندىق كاسىپقوي بوكسشى فيرۋزا ءشارىپوۆا «التىن ادام - جىل ادامى» سىيلىعىنىڭ «جىل سپورتشىسى» نوميناتسياسىندا جەڭىمپاز اتاندى. سپورتشى ءوز كەزەگىندە جانكۇيەرلەرىنە العىسىن بىلدىرە وتىرىپ، ونىڭ باستى ماقساتى - كاسىبي بوكستا ابسوليۋتتى الەم چەمپيونى اتانۋ ەكەندىگىن ايتتى. سونداي-اق ول ەلىمىزدىڭ تۋىن ەڭ جوعارى حالىقارالىق دەڭگەيدە جەلبىرەتىپ جۇرگەنىن جانە ايەلدەر اراسىنداعى قازاقستاندىق بوكستى الەمدە تانىمال ەتۋگە كۇش سالاتىنىن ايتىپ ءوتتى»، - دەلىنگەن حابارلامادا.

سونىمەن قاتار، «التىن ادام - جىل ادامى» سىيلىعىنا وپەرا ءانشىسى زارينا التىنبايەۆا، سۋرەتشى انار ءابجانوۆا، كينورەجيسسەر اقان ساتايەۆ، عىلىم قايراتكەرى ماراتبەك عابدۋللين جانە تاعى باسقالار يە بولدى.

ايتا كەتەيىك، بۇعان دەيىن «جىل سپورتشىسى» اتالىمىندا بوكسشى قانات يسلام، وليمپيادا ويىندارىندا جۇزۋدەن التىن مەدال العان تۇڭعىش قازاقستاندىق دميتري بالاندين، WBC، WBA، IBF، IBO تۇجىرىمدارى بويىنشا بۇرىنعى الەم چەمپيونى گەننادي گولوۆكين، اۋىر اتلەت، ءۇش سالماق ساناتىندا ءتورت دۇركىن الەم چەمپيونى يليا يلين سياقتى سپورتشىلار جەڭىسكە جەتكەن.

فيرۋزا ءشارىپوۆا اتالعان سىيلىقتىڭ لاۋرەاتى اتانۋى مۇمكىندىگىن وسىعان دەيىن حابارلاعان بولاتىنبىز. ەسكە سالايىق، بوكسشى قىز الداعى 22- جەلتوقسان كۇنى WBC تۇجىرىمى بويىنشا الەم چەمپيونى، فينليانديالىق ەۆا ۆالسترەممەن سانكت-پەتەربۋرگتە كەزدەسەدى. ايتۋلى بوكس كەشىن «حابار» تەلەارناسى استانا ۋاقىتىمەن 23:00 دە تىكەلەي ەفيردە كورسەتەدى.