اقتوبەدە جەدەل جاردەم وبلىس اكىمىنىڭ شاقىرۋىن قابىلدامادى

اقتوبە. قازاقپارات - اقتوبە وبلىسىنىڭ اكىمى بەردىبەك ساپاربايەۆ جەدەل جاردەم ستانساسىنىڭ عيماراتىندا تۇرىپ، ديسپەتچەرلەردىڭ جۇمىسىن تەكسەردى.

اكىمنىڭ نۇسقاۋىمەن قوڭىراۋ شالىنعانىمەن، ديسپەتچەرلەر قابىلدامادى، دەپ حابارلايدى قازاقپارات ءتىلشىسى.

وبلىس اكىمى بەردىبەك ساپاربايەۆ جەدەل جاردەم قىزمەتىنىڭ باسشىلىعىمەن، ەمحانانىڭ باس دارىگەرلەرىمەن كەزدەسۋ وتكىزدى. كەزدەسۋ كەزىندە وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆكە ەرەكشە تاپسىرما بەردى.

«جەدەل جاردەمگە تەلەفون شالىپ، ديسپەتچەردىڭ تىركەۋى مەن جەدەل جاردەم كولىگىنىڭ كەلۋىن جاسىرىن تەكسەرۋگە تاپسىرما بەرىلدى. سول كەزدە ناقتى كورىنىس بەلگىلى بولادى. ءار مامان ءوز قىزمەتى ءۇشىن اقى الادى، ءارى حالىق الدىنداعى جاۋاپكەرشىلىگى بار»، - دەدى وبلىس اكىمى بەردىبەك ساپاربايەۆ.

جيىن سوڭىندا ديسپەتچەرلەردىڭ وتىراتىن ارنايى بولمەسىنە كىرىپ، جۇمىستى تەكسەردى. وبلىس اكىمى بەردىبەك ساپاربايەۆتىڭ نۇسقاۋىمەن 103 نومىرىنە قوڭىراۋ شالىندى. ءبىراق العاشقى قوڭىراۋ ديسپەتچەرلەرگە تۇسپەي، جاۋاپ بولمادى.