قايىرىمدى قالا تۇرعىندارى تەگىن دۇكەن اشتى

 استانا. قازاقپارات - قايىرىمدىلىقتىڭ ۇلكەن كىشىسى بولمايدى. انىعىندا، شىن كوڭىلمەن بەرىلگەن ءبىر جۇتىم سۋ دا، مۇقتاج جانعا ۇسىنعان ءبىر ءۇزىم نان دا قامكوڭىلدىڭ جانىنا ىزگىلىك نۇرىن سەبە السا بولعانى.

قوعام نارىقتىق زاماندا قاتىگەزدەنىپ كەتتى دەپ كۇستانالاعانمەن ادامدار اراسىندا جاقسىلىق جاساۋعا اسىعاتىن جاندار از ەمەس. سونداي جەكەلەگەن ازاماتتاردىڭ يگى باستامالارى ءبىر ارناعا توعىسىپ، ۇلكەن باستاۋلارعا اينالىپ جاتقانى قۋانتادى. مىنە سونداي يگىلىكتى جوبالاردىڭ ءبىرى رەتىندە شىمكەنت قالاسىندا مۇقتاج جاندار ءۇشىن «IZGILIK» دەپ اتالاتىن تەگىن دۇكەن اشىلدى. اتالعان دۇكەن كۇن كورىس دەڭگەيى تومەن وتباسىلار مەن جەتىم- جەسىرلەردى ازىق- تۇلىك، كيىم- كەشەكپەن قامتاماسىز ەتۋدى ماقسات ەتكەن. مۇندا تەك ماتەريالدىق كومەك كورسەتىلىپ عانا قويماي، جۇمىسسىز ازاماتتاردى قابىلەتىنە قاراي جۇمىسقا ۇيرەتەدى. وسىلايشا ولاردىڭ قوعامدا ءوز ورنىن تابۋىنا سەپتىگىن تيگىزەدى. «ىزگىلىكتە جارىسايىق» قايىرىمدىلىق قوعامدىق قورىنىڭ ۇيىمداستىرۋىمەن جۇمىس باستاعان بۇل الەۋمەتتىك ۇيدەن مۇقتاج جاندار اپتانىڭ 6 كۇنىندە قاجەتتى زاتتارىن تەگىن الۋىنا مۇمكىندىك بار. ول ءۇشىن وزىمەن بىرگە جەكە كۋالىگىن، الەۋمەتتىك از قامتىلاتىن توپ ەكەندىگىن انىقتايتىن قۇجاتىن الىپ كەلسە جەتكىلىكتى.

 دۇكەننىڭ ىشكى ەرەجەسى بويىنشا ايىنا ءبىر مۇقتاج جان تەك ءبىر عانا كيىمگە يە بولماق. ازىق تۇلىكتى دە وتباسىنداعى ادام سانىنا قاراي شامالاپ الىپ كەتە الادى. ال، دۇكەن سورەلەرىندەگى زاتتار قايىرىمدى قالا تۇرعىندارىنىڭ كۇندەلىكتى وسى الەۋمەتتىك ۇيگە الىپ كەلگەن تارتۋلارى. اينالاسىنا قارايلاسقاندى ازاماتتىق پارىز سانايتىن جاندار شىمشاھارداعى ەلشىبەك باتىر كوشەسىندە ورنالاسقان 88 ۇيگە ات باسىن بۇرىپ، قاجەتتى تۇرمىستىق زاتتاردى اكەلىپ وتكىزۋگە بولادى.

- تەك كيىم- كەشەك تاراتىپ قانا قويماي، قىستىڭ كوزى قىراۋدا جاۋراماس ءۇشىن وتىنى جوق جانۇيالارعا كومىر ءتۇسىرىپ بەرۋدى جوسپارلار وتىرمىز. ارينە، بۇل ۋاقىتشا عانا كومەك. دەگەنمەن، وسىنداي ساۋاپتى ىستەردى كوپتەپ ۇيىمداستىرۋ ارقىلى قوعام نازارىن الەۋمەتتىك جاعدايى تومەن وتباسىلارعا، مۇگەدەك جاندارعا اۋدارۋ. ءتىپتى، ەڭبەككە قابىلەتتىلىگى جوق اعايىنعا قايىرىمدىلىق قور ارقىلى باسپانامەن امتاماسىز ەتۋدى قولعا الدىق. وسى جىلى كاسىپكەرلەردىڭ قارجىلاي قولداۋىمەن 2 ءۇي ساتىپ الدىق. الداعى ۋاقىتتا سونى ءۇيسىز- كۇيسىز جۇرگەن وتباسىلارعا تابىستايتىن بولامىز» ، دەيدى «ىزگىلىكتە جارىسايىق» قايىرىمدىلىق قوعامدىق قورىنىڭ باسشىسى اسقار ماۋلەنوۆ.

دۇكەن اشىلعان 10 كۇن ىشىندە 250 وتباسىعا كيىم- كەشەك، 50 دەن استام جانۇياعا الەۋمەتتىك، تۇرمىستىق زاتتار ۇلەستىرىلگەن. الداعى ۋاقىتتا دۇكەن جەلىلەرىن اۋدانداردان اشىپ، اۋىلداعى الەۋمەتتىك جاعدايى تومەن وتباسىلارعا كومەك قولىن سوزۋدى جوسپارلاپ وتىر ەكەن. كەيدە كۇندەلىكتى قوقىس جاشىگىنىڭ قاسىندا ءۇيىلىپ جاتقان جاماۋ- جاسقاۋسىز كيىم- كەشەك پەن قالتا تولى اق نان قالدىقتارىن كورگەندە قايىرىمدىلىققا مويىنى بۇرىلماي جۇرگەن ادامداردىڭ قىلىعىنا ىشتەي ءىشىڭ اشيدى. «وزىنەن ارتىلعاندى دالاعا تاستاعانشا نەگە مۇقتاج جاندارعا ۇلەستىرمەدى ەكەن؟ » ، دەگەن سۇراق تۋىندايدى.. . مۇمكىن بۇل جاندار «كەرەكسىز» زاتتارىن كىمگە بەرەرىن بىلمەي جۇرگەن شىعار. ەندەشە، ءسىز سول جاندارعا «IZGILIK» دەگەن دۇكەننىڭ مەكەن- جايىن كورسەتىپ جىبەرسەڭىز، سونىڭ ءىزى دە قايىرىمدىلىققا پاراپار ءىس بولماق.

 نۇرشات توكەن، «ەگەمەن قازاقستان»