تالعات ەشەن ۇلى. جۇرەگى بار جالعىز ءۇي
سودان بارىپ تۇيسىكتەن - ەستيار ويعا، ويدان - اۋەزدى دىبىسقا، دىبىستان - كوركەم تىلگە، تىلدەن - ءبادىز تاسقا، تاستان - بالدىر شوپكە، بالدىردان بىلعارى كىتاپقا كوشكەن دەيدى. اقىرىندا كىتاپتاردىڭ جۇماعىنان ماڭگىلىك ءوز ورنىن تاۋىپتى.
قاراشا ورتان بەلىنە اۋىپ بارا جاتسا دا ءال- ازىرگە ىزعارى بىلىنبەيدى. استانانىڭ ماي توڭعىسىز كەشى. اعىلعان كولىكپەن جارىسا جۇيتكىگەن ويلار سان- ساققا جۇگىرەدى. كۇندە جانە ءار كەش سايىن ۇيگە ورالاتىن جولىمدا، توعايلى بۋلۆاردىڭ وڭ قاپتالىندا قۇرىلىس سۇيەگى اسىل، قاس بەتى ماڭعاز، ونە بويى نەشەمە ايمۇيىزدەرمەن ادىپتەلگەن ءبىر ءۇي قالىپ بارا جاتادى. ۇلكەن دە، كىشى دە، بيىك تە، الاسا دا ەمەس. ءسان- سالتاناتى جاڭا قالاداعى ىرعىن قۇرىلىستاردان ارتىق تا، كەم دە ەمەس. ءبىراق، ءبىر كەرىم. ءارى جازىقتىڭ بۇلتىن ءشالى، سامالىن جەلپۋىش قىپ، اي ساۋلەسىن شىنىسىنا شاعىپ ويناپ تۇرعان وسى ماڭداعى كوپ ۇيدەن ەرەك، ۇستامدى ءھام پاراساتتى. تەرەزەلەرى جۇمباق تا تىلسىم سىر جاسىرىپ، باسپالداقتارى بەلگىسىز، ەسەسىنە قىزىقتى دا الىس ساپارلارعا شاقىراتىنداي، توڭىرەگىنە راۋانداپ، جىلۋ شاشىپ تۇرادى. وسى ماڭداعى جۇرەگى بار جالعىز عيمارات، عيمارات ەمەس، عيبادات ورنىنداي اسەر قالدىرادى.
ءسىرا، اقمەشىت پەن دوستىق كوشەلەرىنىڭ قيىلىسىنداعى اكادەميالىق كىتاپحانانىڭ تۇسىنان وتكەن سايىن وقۋى بار، وقۋعا ادالدىعى بار جانداردىڭ كوكىرەكتەرى جىليتىن بولار، كوڭىلدەرى قوزعالاتىن شىعار. مەن دە كىتاپحانانىڭ جانىنان وتكەن سايىن ءسوز بەن كىتاپ تۋرالى نەشە الۋان ءتاتتى ءارى شىتىرمان ويعا شومام. ونداي ساتتەردە جۇرەگىمە ءماز- ءمايرام بوپ قۋانىش ۇيالايدى، ارقاما جالدانىپ قانات بىتەدى. ەسىل سيراعىمنان كەلگەندەي، «بايتەرەك» يىعىمدا كوكتەگەندەي بولادى. كىتاپحاناعا ءوزىڭنىڭ دە الدەقانداي قاتىسىڭ بارىن سەزىنۋ ءبىر عانيبەت، كەيدە وسى. باسقا نە كەرەك؟ !. راسىندا، «قارا باسىڭا كوپ نارسە كەرەك پە؟ » . ءبىراق، تولستويدىڭ نەمەسە تاقۋانىڭ دەگەنى بولا بەرمەيدى عوي. و، ءبىزدىڭ استانالىق جۇرتقا كەرەك ەمەس نارسە جوق. وتباسىڭا - باقۋاتتى تۇرمىس، تۋىس- جۇراعاتىڭا - جايلى جۇمىس، ۇلىقتارعا - كاسىبي مامان، دوستارىڭا - قولى مەن جولى اشىق ادال سەرىك كەرەك.
بىرەۋ اتاققا، بىرەۋ اقشاعا مۇقتاج. بىرەۋدىڭ تالكەك تاعدىرى كومەديانى قالايدى، بىرەۋ دراماعا ءزارۋ. بىرەۋ ءۇشىن تۇككە تۇرعىسىز نارسە بىرەۋ ءۇشىن اۋاداي قاجەت. بۇل، ەندى، اسا قىزىق ەمەس. مەنى وسى كىتاپحاناعا كىرىپ- شىعىپ جاتاتىن جۇرتتىڭ تاعدىر- تالايى، تالعامى قىزىقتىرادى. بۇلاردىڭ ءبارى ول جەردەن نە ىزدەيدى؟ مەن ىزدەگەندى ىزدەي مە؟ جانە سولاردىڭ ءبارى مەن قۇساپ كىتاپحاناعا سۇراق بەلگىسىمەن كىرىپ، لەپ بەلگىسىمەن شىعا ما؟ كىتاپتار دا قۇددى ادام سياقتى - وزىنشە باقىتتى، وزىنشە باقىتسىز، تاعدىرلارى دا، مازمۇندارى دا ەشقاشان ءبىر- بىرىنە ۇقسامايدى. جاراتۋشى مەن جاراتىلعاننىڭ، كوك پەن جەردىڭ، اق پەن قارانىڭ، قوعام مەن ادامنىڭ، شىعىس پەن باتىستىڭ قۇپياسىن جاسىرعان قۇدىرەتى بولا تۇرا، كىتاپتار دا ءبىز سياقتى - قورعانسىز. ىقىلىمنان جەتكەن كەپ، نيپپۋر، اششۋربانيپالا، پەرگاما، الەكساندريا، وتىرار قاجەتى جوقتىعىنان ەمەس، قورعانسىزدىعىنان ورتەندى، تونالدى، جوعالدى.
كىتاپتار دا - جالعىز، ءبىز قۇساپ سەرىك ىزدەيدى. ولاردىڭ كوڭىلىن سارعايعان پاراقتاردان رۋحىنا ازىق، كوڭىلىنە مەدەت ىزدەگەن، جاردەم تىلەگەن جاندار عانا مارقايتادى. ءدال سونداي سەرىك تابىلا قالسا ەكەۋى ەشقاشان ءبىر- ءبىرىنىڭ ءىشىن پىستىرمايدى، ءبىر- ءبىرىن جالىقتىرمايدى. كىتاپ ساعان، سەن كىتاپقا اينالىپ جۇرە بەرەسىڭ. كەيدە كىتاپپەن وتىرعان ءبىر ساعاتىڭدى كىسىمەن وتىرعان ءبىر كۇنىڭە قيمايتىن ساتتەر بولادى. جۇتقان اۋاڭ، كورگەن اسپانىڭ، باسقان توپىراعىڭ، قورشاعان ورتاڭ - ءبارى ادىرا قالادى. قاس قارايعانىن كەزەكشى كىتاپحاناشى دىگىرلەتىپ قۋىپ شىققاندا عانا بارىپ بىلەسىڭ. بىزگە كەرەگى - تاڭبالار، بەلگىلەر، ارىپتەر، سوزدەر، ماتىندەر، سيۋجەتتەر، وبرازدار، كەيىپكەرلەر جانە ت. ت. ءبىزدىڭ ىزدەگەنىمىز ماتەريا دا، مەينستريم دە ەمەس. ءبىزدىڭ ىزدەيتىنىمىز - ادام جانىنىڭ ميستەرياسى. سودان بولار، كىتاپتى جاقسى كورەتىن، كىتاپتىڭ قادىرىن بىلەتىن، كىتاپحاناعا ءۇيىر ادام ءاردايىم ەتەنە جاقىنىڭ، تۋىس- باۋىرىڭ بوپ شىعادى.
جان قاجەتى وتەلسە عانا كوڭىلىڭ تىنشيدى. ال، جان قاجەتىنىڭ وتەۋى، كوڭىل تىنىشتىعىنىڭ جۇماعى كىتاپحانا عانا. ويلى ساناسى تاستاي قاتقاننىڭ، شەرلى كوكىرەگى مۇزداي سۋىعاننىڭ مەكەنى. وسىدان شىعار، «جۇرەگى بار ۇيگە» سەن دە جۇرەگىڭدى قالدىرىپ كەتكىڭ كەپ تۇرادى. ارينە، ءسوز اۋەلدەن وتانىن ىزدەگەن جوق. ول بالاڭ جادى مەن بىلعارى كىتاپتىڭ اراسىن جول قىلىپ جۇرگەن دە قويعان. ءسويتىپ جاڭاعى مازاسىز تۇيسىكتى - ءپاني مەن باقيدىڭ كوزى، كەڭىستىك پەن ۋاقىتتىڭ تىزگىنى بولعان، شەكسىزدىك پەن مالىمسىزدىكتىڭ اقسوڭكە سوقپاعىنا جانە ون سەگىز مىڭ عالامعا اينالعان تۇيسىكتى وزىنە عانا ۇعىنىقتى، وزىنە عانا قىمبات، وزىنە عانا جايلى كىتاپحانا جاساپ العان.
ويلار - جۇيتكىگەن كولىكتەردەي. قاراشا ورتان بەلىنەن اۋعاندا، استانانىڭ ماي توڭعىسىز كەشىندە تاعى دا اكادەميالىق كىتاپحانانىڭ جانىنان ءوتىپ بارامىن. ەسىمە تاعى دا «ۆاۆيلون كىتاپحاناسىنىڭ» - ادامزات كىتاپحاناسىنىڭ ۇلى شىراقشىسىنا اينالعان حورحە لۋيس بورحەس ءتۇستى. يە، ونىڭ كوپ سوزىنە كەلىسپەسكە شاراڭ جوق. ال، مىنا سوزىنە تىك تۇرىپ قول شاپالاقتاۋ كەرەك قوي: «مەن جۇماقتى كىتاپحاناعا ۇقساتتىم» .
«ەگەمەن قازاقستان»