ۇلتتىق ونەرىمىزدى ۇلىقتايتىن جاڭا تەلەجوبانىڭ ءتۇسىرىلىمى باستالدى
بۇگىن «قازمەديا» ورتالىعىندا جوبانىڭ العاشقى ءتۇسىرىلىمى باستالدى. ونىڭ ماڭىزى مەن ماقساتى تۋرالى تەلەراديوكورپوراتسيانىڭ ءتوراعاسى ەرلان قارين ايتىپ بەردى، دەپ حابارلايدى قازاقپارات ءتىلشىسى.
اتاپ وتىلگەندەي، جاڭا تەليەۆيزيالىق جوبانىڭ ماقساتى - ءتول ونەرىمىز - ءداستۇرلى ءان، جىر- تەرمەلەر مەن كۇيلەردى ناسيحاتتاۋ، ونى بولاشاق ۇرپاققا رۋحاني- مادەني مۇرا رەتىندە ساقتاۋ، ۇلتتىق ونەردى دارىپتەۋ.
بۇگىن «قازمەديا» ورتالىعىندا باستالعان العاشقى ءتۇسىرىلىم جۇمىسىنا ۇلتتىق مۋزىكاعا ەڭبەك ءسىڭىرىپ جۇرگەن بەلگىلى تۇلعالار سەكەن تۇرىسبەكوۆ پەن ساۋلە جانپەيىسوۆا قاتىستى. الداعى ۋاقىتتا جوباعا قاجىبەك بەكبوسىنوۆ، ءبىلال ىسقاقوۆ، رامازان ستامعازيەۆ سىندى وزگە دە ءداستۇرلى انشىلەر مەن كۇيشىلەر شاقىرىلىپ، ولار قالىڭ كورەرمەنگە ونەرلەرىن تارتۋ ەتپەك.
ايتا كەتەيىك، «ءىنجۋ- مارجان» تەلەباعدارلاماسىنا تانىمال تۇلعالار عانا ەمەس، ءداستۇرلى مۋزىكانى جانىنا سەرىك ەتكەن قازاقستاننىڭ تۇكپىر- تۇكپىرىندەگى ازاماتتار قاتىساتىن بولادى.
جوبا قانشا ۋاقىت تۇسىرىلەتىنى جانە ونىڭ كورەرمەنگە قاشان جول تارتاتىنى ازىرگە بەلگىسىز.
«ۇلتتىق ونەردى دارىپتەيتىن كوپتەگەن تەليەۆيزيالىق جوبالار بار، سونىڭ ءبىرى وتكەن جىلى باستالعان «مەن قازاقپىن» جوباسى. ال بۇگىنگى جوبانىڭ ءجونى بولەك، ءبىز بۇعان ۇزاق دايىندالدىق. ەلىمىزدەگى ءداستۇرلى انشىلەر، جىرشى- تەرمەشىلەر مەن كۇيشىلەردىڭ باسىن ۇلتتىق ارنادا توعىستىرۋدامىز. باعدارلاماعا ەلىمىزدىڭ بارلىق وڭىرىنەن ءداستۇرلى ونەردى ايتىپ قانا قويماي، ونى بۇگىنگى ۇرپاققا تۇتاستاي جەتكىزۋشى ونەرپازداردى شاقىردىق. قازىر العاشقى ءتۇسىرىلىم جۇمىستارى باستالدى. كورەرمەنگە قاشان جول تارتاتىنى كەيىن بەلگىلى بولادى» ، - دەدى «قازاقستان» تەلەراديوكورپوراتسياسىنىڭ ءتوراعاسى ەرلان قارين.
ونىڭ ايتۋىنشا، اتالعان جوبانى قولعا الۋداعى تاعى ءبىر ماقسات - ۇلتتىق ارنادا ءداستۇرلى شىعارمالاردىڭ ارحيۆتىك ۆيدەوقورىن جيناقتاۋ.
ۇيىمداستىرۋشىلاردىڭ سوزىنە قاراعاندا، «ءىنجۋ- مارجان» ۇلتتىق جوباسى كورەرمەندەردىڭ ەستەتيكالىق تالعامى مەن دۇنيەتانىمىنىڭ دامۋىنا ءوز ۇلەسىن قوسپاق.