قاتتى دىبىستى مۋزىكا قۇلاققا قالاي اسەر ەتەدى؟

استانا. قازاقپارات - مۋزىكانى ۇزدىكسىز ءارى دىبىسىن تىم قاتتى تىڭداۋ قۇلاققا زيانىن تيگىزبەي قويمايدى.

 دەگەنمەن، ونى قۇلاققاپ ارقىلى نەمەسە مۋزىكا باعانى(كولونكا) ارقىلى تىڭداۋدىڭ وزدەرىنە ءتان ايىرماشىلىعى بار. قۇلاققاپتىڭ تىڭداۋ جۇيەسىنە اسەرى جوعارى. اسىرەسە، كىشكەنتاي تىعىن قۇلاقتاعى دابىل جارعاعىنا دىبىس تولقىندارىنا قاتتى اسەر ەتەدى. مىسالى، دەنساۋلىققا قاۋىپتى اسەر ەتەتىن فاكتورلاردى زەرتتەيتىن ەۋروپالىق عىلىمي وداق بەس جىل بويىنا كۇنىنە ءبىر ساعاتتان ارتىق ۋاقىت دىبىسى قاتتى مۋزىكا (85 د ب- دەن جوعارى) تىڭدايتىن جاستاردى باقىلاعان. زەرتتەۋشىلەر جاستاردىڭ %5-10 دا ەستۋ قابىلەتى ناشارلاعانىن بايقاعان. ءبىر قىزىعى، ءارتۇرلى جانر ادامنىڭ ەستۋ جۇيەسىنە ءارتۇرلى اسەر ەتەدى. روك جانە رەپ سەكىلدى مۋزىكانىڭ اگرەسسياعا تولى جانرلارى ەستۋ قابىلەتىنە ايتارلىقتاي زيانىن تيگىزەدى. ال، لاتىنامەريكالىق باعىتتاعى جانە كلاسسيكانىڭ اسەرى اسا بايقالمايدى. ارينە، بۇل ارقىلى مۋىزكا مەن ەستۋ جۇيەسى ءبىر- بىرىنە تاۋەلدى دەگەن قورىتىندى شىعارۋعا بولمايدى.

 مۋزىكانى قانشا ساعات تىڭداۋعا بولادى؟ كۇندەلىكتى مولشەرگە ساي، 85 د ب جيىلىكتەگى مۋزىكانى 8 ساعاتتان ارتىق تىڭداۋعا بولمايدى. بۇنى ەڭبەكتى قورعاۋ ۇلتتىق ينستيتۋتىنىڭ (NIOSH) ماماندارى مەن اقش ەڭبەك پەن دەنساۋلىقتى ساقتاۋ اسسوتسياتسياسى (OSHA) بەكىتكەن. دەگەنمەن، قۇلاققاپ ءۇشىن دىبىس جيىلىگى 79 د ب- دەن اسپاۋى ءتيىس. مۋزىكا تىڭداۋعا ارنالعان قۇرىلعىلاردىڭ باسىم كوپشىلىگى 120 د ب جانە ودان جوعارى دىبىس جيىلىگىندە جۇمىس ىستەيتىنىن دە ەسكەرگەيسىز. ارينە، ادام دىبىس جيىلىگى قاي دەڭگەيدە ەكەنىن اڭعارا المايدى. سوندىقتان، مۋزىكا تىڭدايتىن باعدارلامالاردا ارنايى بەلگىلەر ورنالاسادى. ودان بولەك، ۇيالى تەلەفونداردا مۋزىكانىڭ دىبىسى ارنايى دەڭگەيدەن جوعارى ەكەنىن ەسكەرتەتىن قىزمەت ءتۇرى دە بار. تەك مۋزىكا عانا ەمەس، ارنايى ساباقتار مەن اۋديوكىتاپتاردى تىڭداعاندا دا وسى ەرەجەنى ۇستانعانىڭىز ءجون.

سىرتقى شۋ قالاي اسەر ەتەدى؟ ۇلكەن ماسەلەلەردىڭ ءبىرى -  مۋزىكانى مەترودا تىڭداۋ. سىرتقى شۋ قۇلاقتىڭ جاسۋشالارىنا، ەستۋ تۇتىگىنە اسەر ەتەدى دە، ەستۋ قابىلەتىنىڭ ناشارلاۋىنا الىپ كەلەدى. سونىمەن قاتار، كونتسەرتتەر، مۋزىكالىق فەستيۆالدار دا وسىلاي اسەر ەتەدى.

 ەستۋ قابىلەتىنىڭ ناشارلاعانىن قايدان بىلەمىن؟ ادامدار ەستۋ قابىلەتىنىڭ ناشارلاعانىن بىردەن اڭعارا قويمايدى. الدىمەن، داۋىستى ەستىسە دە، تۇسىنبەگەندىكتەن قايتا سۇراي باستايدى. ەگەر ەستۋ قابىلەتى اسقان جىلدامدىقپەن ناشارلاي باستاسا، قۇلاقتا شۋ پايدا بولادى. وكىنىشكە وراي، ەستۋ قابىلەتىن قايتا قالپىنا كەلتىرۋ تەك باستاپقى كەزەڭدە عانا ىسكە اسادى. ەمدەۋدىڭ ءتيىمدى ءادىسى -  جۇيەلى گليۋكوكورتيكوستەرويد. ال، دارۋمەن مەن وزگە دە ەمدىك ۇردىستەر پايداسىز. ەستۋ جۇيەسىندە جۇيكەلەر مەن جاسۋشالار جىلدام زاقىمدانادى، قايتا قالپىنا كەلە قويۋى قيىن. سوندىقتان، قۇلاقتاعى شۋ، شانشۋ سەكىلدى بەلىگىلەر بايقالعان بويدا دارىگەردىڭ قابىلداۋىنا جازىلىپ، ەمدەتۋدى ەرتەرەك باستاعانىڭىز ءجون.

Massaget.kz