ەلباسى ۇلتتىق بانك ءتوراعاسىنا ءبىرقاتار تاپسىرما بەردى
نۇرسۇلتان نازاربايەۆ ۇلتتىق بانك ءتوراعاسىنىڭ بايانداماسىنان بۇرىن بارشا قازاقستاندىقتاردى ۇلتتىق ۆاليۋتامىز - تەڭگەنىڭ 25 جىلدىعىمەن قۇتتىقتادى.
«بارشا قازاقستاندىقتاردى جانە قارجى سەكتورىنىڭ بۇكىل قىزمەتكەرلەرىن ءتول تەڭگەمىزدىڭ 25 جىلدىعىمەن قۇتتىقتايمىن. كۇردەلى كەزەڭدەردى ەڭسەردىك. تەڭگەنى ەنگىزۋ ارقىلى قازاقستاننىڭ قارجىلىق تاۋەلسىزدىگىنە جول اشتىق. ءقازىر ءبىز دامۋدىڭ جاڭا كەزەڭىنە قادام باستىق» ، - دەدى مەملەكەت باسشىسى.
ۇلتتىق بانك ءتوراعاسى قازاقستان پرەزيدەنتىنە ۆاليۋتا- قارجى نارىعىنداعى قازىرگى احۋال مەن ەلىمىزدىڭ ەكونوميكالىق دامۋىنىڭ نەگىزگى كورسەتكىشتەرى تۋرالى مالىمدەدى.
«2018 -جىلعى قازان ايىندا ينفلياتسيا سوڭعى 3 جىلداعى ەڭ تومەنگى 5,3 پايىز دەڭگەيىندە بولدى. جىل باسىنان بەرگى ينفلياتسيا 3,7 پايىزدى قۇرادى. ءبىزدىڭ 2018 -جىلعا جاساعان بولجامىمىز بويىنشا ونىڭ دەڭگەيى 5 تەن 7 پايىزعا دەيىنگى ارالىقتا بولادى» ، - دەدى د. اقىشيەۆ.
ۇلتتىق بانك ءتوراعاسى مەملەكەت باسشىسىنا ينفلياتسيانىڭ قازىرگى دەڭگەيىنە ىقپال ەتە الاتىن نەگىزگى فاكتورلار جونىندە ايتتى.
«بىرىنشىدەن، بۇل - ەكونوميكاداعى ينفلياتسيالىق قالىپتى ساقتاۋ. ءبىز باعانىڭ وسۋىنە جول بەرمەۋ ءۇشىن ۇكىمەتپەن بىرلەسە جۇمىس ىستەپ جاتىرمىز. باعانىڭ سۋبەكتيۆتى فاكتورلاردىڭ ىقپالىمەن وزگەرىپ وتىرعان نارىقتاردى انىقتاۋ ءۇشىن بەلسەندى جۇمىس جۇرگىزىلۋدە. ەكىنشى فاكتور - ءبىزدىڭ ساۋدا سالاسىنداعى سەرىكتەستەرىمىز سانالاتىن ەلدەردەگى احۋال» ، - دەدى د. اقىشيەۆ.
سونىمەن قاتار، قازاقستان پرەزيدەنتىنە ۇلتتىق ۆاليۋتا باعامى توڭىرەگىندەگى جاعداي جونىندە مالىمدەلدى. ۇلتتىق بانك ءتوراعاسىنىڭ اقپاراتىنا سايكەس، قۋات كوزدەرىنىڭ قازىرگى ۋاقىتتاعى قۇنى قالىپتى، بۇل ايىرباس باعامىنىڭ تۇراقتىلىعىن قامتاماسىز ەتۋگە مۇمكىندىك بەرەدى.
د. اقىشيەۆ ەلىمىزدىڭ التىن- ۆاليۋتا رەزەرۆىنىڭ احۋالى تۋرالى باياندادى. اتاپ ايتقاندا، قازان ايىنىڭ سوڭىنا قاراي التىن- ۆاليۋتا رەزەرۆىنىڭ كولەمى 29 ميلليارد ا ق ش دوللارىنا جەتتى. ال، ۇلتتىق قوردىڭ شەتەلدىك ۆاليۋتاداعى اكتيۆتەرى 57 ميلليارد ا ق ش دوللارىنا جۋىقتادى.
كەزدەسۋ سوڭىندا نۇرسۇلتان نازاربايەۆ ءبىرقاتار ناقتى تاپسىرما بەردى.