قازاقستان مەن البانيا قانداي سالادا ىنتىماقتاستىقتى دامىتا الادى

استانا. قازاقپارات - بۇگىن اقوردادا ق ر مەملەكەتتىك حاتشىسى گۇلشارا ءابدىقالىقوۆا البانيانىڭ ەۋروپالىق جانە سىرتقى ىستەر ءمينيسترى ديتمير بۋشاتيمەن كەزدەستى، دەپ حابارلايدى قازاقپارات ءتىلشىسى.

 اڭگىمەلەسۋ بارىسىندا تاراپتار ساياسي، ساۋدا- ەكونوميكالىق جانە مادەني- گۋمانيتارلىق ىنتىماقتاستىقتىڭ قازىرگى جاي - كۇيى مەن كەلەشەگىن تالقىلاپ، قاندايدا ءبىر ساياسي نەمەسە وزگە سيپاتتاعى كەلىسپەۋشىلىكتەر جوق ەكەندىگىنە توقتالىپ ءوتتى. قۇرىلىس، ەنەرگەتيكا، اۋىل شارۋاشىلىعى جانە تۋريزم ىنتىماقتاستىقتىڭ پەرسپەكتيۆالى سالالارى قاتارىندا اتالدى.

 مەملەكەتتىك حاتشى قازاقستان پرەزيدەنتى نۇرسۇلتان نازاربايەۆتىڭ حالىقارالىق قاقتىعىستاردى رەتتەۋدەگى جەكە ۇلەسىن، سونىمەن قاتار تاياۋدا «Astana Club" وتىرىسىندا جاريا ەتكەن باستامالارىن اتاپ ءوتتى.

گ. ءابدىقالىقوۆا البان دەلەگاتسياسىن قازاقستاندا بيزنەس جۇرگىزۋگە قولايلى جاعداي جاسالعانىن، سونىمەن قاتار «استانا» حالىقارالىق قارجى ورتالىعى اياسىندا ىنتىماقتاستىق ورناتۋ مۇمكىندىگى بار ەكەنى جونىندە حاباردار ەتتى. قازاقستاننىڭ Doing Business-2018 رەيتينگى بويىنشا 28-ورىن الىپ وتىرعانىن ايتتى.

سونداي- اق، مەملەكەتتىك حاتشى الباندىق سەرىكتەستەردى نازاربايەۆ ۋنيۆەرسيتەتى جانىنداعى «استانا بيزنەس- كامپۋس» عىلىمي پاركى اۋماعىنان عىلىمي- زەرتتەۋ ينستيتۋتىن اشۋ جۇمىسى بويىنشا ىنتىماقتاستىق ورناتۋعا شاقىردى.

كەزدەسۋ سوڭىندا مەملەكەتتىك حاتشى البانيانىڭ ەۋروپالىق جانە سىرتقى ىستەر ءمينيسترى ديتمير بۋشاتيگە ەكىجاقتى ىنتىماقتاستىقتىڭ ودان ءارى جالعاسىن تابۋى جولىندا تابىس تىلەدى.