ەلباسى ءدىنزۋحرا تىلەنديەۆامەن ۇلتتىق ونەرگە قولداۋ كورسەتۋ جايىن تالقىلادى

 استانا. قازاقپارات - نۇرسۇلتان نازاربايەۆ  «وتىرار سازى» مەملەكەتتىك اكادەميالىق فولكلورلىق- ەتنوگرافيالىق وركەسترىنىڭ جەتەكشىسى ءدىنزۋحرا تىلەنديەۆانى قابىلدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

كەزدەسۋ بارىسىندا مەملەكەت باسشىسى «رۋحاني جاڭعىرۋ» باعدارلاماسىن جۇزەگە اسىرۋ اياسىندا مادەنيەت پەن ونەر سالاسىنا تۇراقتى تۇردە قولداۋ كورسەتۋدىڭ ماڭىزدى ەكەنىن اتاپ ءوتتى.

- ءسىزدىڭ اكەڭىزبەن ۇزاق جىلدار بويى جاقسى تانىس بولدىق. اكادەميالىق دەگەن اتاعى بار «وتىرار سازى» وركەسترى سول كىسىنىڭ ەسىمىمەن اتالادى. كەزىندە بۇل وركەستردە 6 ادام بار ەدى، قازىر 66 مۋزىكانت جۇمىس ىستەيدى، - دەدى قازاقستان پرەزيدەنتى.

نۇرسۇلتان نازاربايەۆ رۋحاني جاڭعىرۋ باعدارلاماسىندا كورسەتىلگەن مىندەتتەردى ورىنداۋ ىسىندە فولكلورلىق- ەتنوگرافيالىق وركەستردىڭ ءرولى ەرەكشە ەكەنىن ايتتى.

- گاسترولمەن فرانسياعا باردىڭىزدار، استانادا ونەر كورسەتتىڭىزدەر. حالقىمىزدىڭ مۋزىكالىق اسپاپتارىن بۇكىل الەمگە تانىتىپ جۇرسىزدەر. ءتول ونەرىمىزدى دارىپتەۋ ماقساتىمەن ۇلتتىق دومبىرا كۇنى دە بەكىتىلدى. ونى مەرەكەلەۋگە 1 مىڭنان استام دومبىراشى قاتىستى. مۇنىڭ ءبارى «رۋحاني جاڭعىرۋ» باعدارلاماسىنىڭ باعىتتارىنا ساي كەلەدى. ءسىز ۇلى كومپوزيتور نۇرعيسا تىلەنديەۆتىڭ ءىسىن جالعاستىرىپ كەلەسىز، سول ءۇشىن العىس ايتامىن، - دەدى ەلباسى.

ءدىنزۋحرا تىلەنديەۆا ۇلتتىق ونەر سالاسىن دامىتۋعا زور ءمان بەرىپ وتىرعانى ءۇشىن قازاقستان پرەزيدەنتىنە العىس ءبىلدىرىپ، ەلىمىزدە جۇزەگە اسىرىلىپ جاتقان دامۋ باعدارلامالارىن قولدايتىنىن ايتتى.