ءبىر قازاقستاندىققا قانشا تۇرعىن ۇيدەن كەلەدى؟

استانا. قازاقپارات - ازىرلەۋشىلەر حالىقتى تۇرعىن ۇيمەن قامتاماسىز ەتىپ ۇلگەرمەي جاتىر.

ب ۇ ۇ- نىڭ ستاندارتتارىنا قول جەتكىزۋ ءۇشىن ءار تۇرعىنعا جىلىنا ءبىر شارشى مەتردەن استام جەر ەنگىزۋ (ءبولۋ) قاجەت.

ءبىراق، ازىرگە كورسەتكىش ارەڭ دەگەندە 0,6 شارشى مەترگە جەتتى، دەپ جازادى Ranking.kz اقپاراتتىق اگەنتتىگى.

قازاقستاندا تۇرعىن ءۇي قۇرىلىسى سەنىمدى تۇردە دامىپ كەلەدى. 2018-جىلدىڭ قاڭتار-قىركۇيەك ايلارىندا جاڭا تۇرعىن ۇيلەردى پايدالانۋعا بەرۋ كولەمى جىل باسىنان بەرى 11,6 پايىزعا، ياعني 8,8 ميلليون شارشى مەترگە دەيىن ءوستى. وسى كەزەڭدە جان باسىنا شاققانداعى تۇرعىن ءۇي الاڭىن ەنگىزۋ دە ءبىر جىلدىڭ ىشىندە 10,1 پايىزعا ءوستى. ياعني، ادام باسىنا 0,48 شارشى مەترگە دەيىن.

ەكىنشى جاعىنان، بۇل جەتكىلىكسىز. ب ۇ ۇ- نىڭ الەۋمەتتىك ستاندارتتارىنا سايكەس، ەلىمىزدىڭ ءاربىر تۇرعىنىنا كەمىندە 30 شارشى مەتر باسپانا ءبولىنۋى كەرەك. ال قازاقستاندا جىل باسىنان بەرى بۇل كورسەتكىش 21,6 شارشى مەتردى قۇرادى، بۇل 2016-جىلعا قاراعاندا 0,2 پايىزعا ارتىق، ءبىراق ءوسۋ قارقىنى وتە تومەن. بۇل كورسەتكىش بويىنشا قازاقستان رەسەيدەن جانە قىتايدان دا ارتتا قالىپ وتىر.

ال ءبىرىنشى جارتىجىلدىقتىڭ قورىتىندىسى بويىنشا قازاقستان قالالارىندا 10,5 ميلليون ادام ءومىر سۇرەدى. ول بىلتىرعى جىلعا قاراعاندا 4 پايىزعا كوپ. بۇل قازاقستان حالقىنىڭ جالپى سانىنىڭ 57,6 پايىزىن قۇرايدى.

باسقارىلاتىن ۋربانيزاتسيا - قازاقستان ەكونوميكاسىنىڭ ءوسۋىنىڭ نەگىزگى باعىتتارىنىڭ ءبىرى بولىپ تابىلادى. 2020-جىلعا دەيىن ەلدىڭ اۋماقتىق-كەڭىستىكتىك دامۋىنىڭ بولجاۋ سىزباسىنا سايكەس زاماناۋي پوستيندۋستريالدى ەكونوميكانى قالىپتاستىرۋ ءۇشىن حالىقتىڭ كەم دەگەندە 70 پايىزىن قالالىق جەرلەرگە شوعىرلاندىرۋ كەرەك.

شەت ەلدەردىڭ تاجىريبەسى تۇرعىن ۇيمەن قامتاماسىز ەتۋدى قولايلى مەرزىمدە تۇبەگەيلى جاقسارتۋ ءۇشىن قۇرىلىس بەلسەندىلىگى جىلىنا ءبىر شارشى مەتردى قۇراۋى ءتيىس ەكەنىن كورسەتتى. سونىمەن قاتار، 2017-جىلدىڭ قورىتىندىسى بويىنشا قازاقستاندا ءبىر ادامعا تۇرعىن ءۇي ەنگىزۋ 0,62 شارشى مەتردى عانا قۇرادى. ال بيىلعى جىلى ول 0,7 شارشى مەتردەن ءسال از بولادى جانە بۇل ب ۇ ۇ- نىڭ ستاندارتتارىنا جەتۋ ءۇشىن جەتكىلىكسىز.

بۇل رەتتە، سالىنىپ جاتقان ۇيلەردەگى تۇرعىن ءۇيدىڭ باعاسى سالىنىپ بىتكەن ۇيلەرگە قاراعاندا الدەقايدا تومەن. مىسالى، استانادا سالىنىپ جاتقان جانە 2020-جىلى پايدالانۋعا بەرىلەتىن «شارشىنىڭ» باعاسىنىڭ اراسىنداعى ايىرماشىلىق %21,2 بولسا، الماتىدا %45,2 قۇرايدى.