يزرايلدە مەملەكەتتىك دەڭگەيدە سۋ ساقتايتىن باعدارلامالار قابىلدانعان

استانا. قازاقپارات -  سۋ ماسەلەسىن شەتەلدىكتەر قالاي شەشۋدە؟ ماسەلەن، يزرايلدىڭ سۋ قورى از بولعانىمەن تۇرعىندارىن تازا اۋىزسۋمەن، ونەركاسىبى مەن اۋىل شارۋاشىلىعىن تۇشى سۋمەن تولىق قامتاماسىز ەتىپ وتىر.

بۇگىندە بۇل ەل تىرشىلىك ءنارىن ساقتايتىن تەحنولوگيالاردى شىعارىپ، قولدانىسقا ەنگىزۋ بويىنشا الەمدە ءبىرىنشى ورىندا تۇر. سۋسىز تىرشىلىك بولمايتىنىن يزرايل حالقى جاقسى بىلەدى. شاعىن ەلدىڭ سۋ قورى تىم از. سولتۇستىگىندە كينەرەت كولى جانە تەڭىز سۋىن تۇشىتاتىن بىرنەشە قوندىرعىسى بار. دەگەنمەن يزرايل ءوزىن تىرشىلىك كوزىمەن تولىق قامتىپ قانا قويماي، كورشىلەس يوردانياعا دا سۋ جەتكىزىپ وتىر. مۇنىڭ ءبارى ۇنەمدەگىش تەحنولوگيالاردىڭ ارقاسى.

 الەكس ۆيجنيتسەر، سۋ ساقتايتىن تەحنولوگيالار بويىنشا ساراپشى:

 - اعىن سۋدى وڭدەپ، 95 پايىزىن شارۋاشىلىقتا قايتا پايدالانىپ جۇرگەن الەمدەگى جالعىز ەلمىز. دۇنيەجۇزىندە وسىنداي كورسەتكىشكە ەشكىم جەتكەن جوق. ال قازىر وسى سۋدى اۋىل شارۋاشىلىعىنىڭ بۇكىل قاجەتتىلىگىنە قولدانۋعا بولاتىنداي ساپاسىن جاقسارتۋ جۇمىستارى ءجۇرىپ جاتىر. ەل ورتالىعى مەن وڭتۇستىگىن سۋمەن بىرنەشە ءىرى سۋ تۇشىتاتىن قوندىرعى قامتىپ وتىر. بۇل وسى ماسەلەنىڭ كەرەمەت شەشىمى بولعان.

يزرايل جەرورتا تەڭىزى جاعالاۋىندا ورنالاسقان، ياعني سۋ تۇشىتۋعا تاۋسىلماس شيكىزات قورى بار. وسى تەحنولوگيالارىن يزرايل شەتەلگە، ونىڭ اراسىندا قازاقستانعا دا ەكسپورتتايدى. الايدا، ەڭ باستىسى، قاراپايىم تۇتىنۋشىلاردىڭ تىرشىلىك كوزىن ۇنەمدەۋى بولىپ وتىر. ماسەلەن، 2005 -جىلدان بەرى پاتەرلەردەگى بۇكىل شۇمەكتەر سۋ بۇرىككىشپەن جابدىقتالعان. تۇرعىندار سۋ قىسىمىنىڭ ازايعانىن سەزبەسە دە، بۇل 30 پايىزدان اساتىن ۇنەم بەرەدى. جالپى، يزرايلدىكتەر بالالارىن دا كىشكەنتاي كەزىنەن باستاپ سۋدى ۇنەمدەۋگە تاربيەلەيدى. مەملەكەتتىك دەڭگەيدە سۋ ساقتايتىن باعدارلامالار قابىلدانعان.

 ميراۆ ومري، قۇرىلىستاعى ەكوتەحنولوگيالار مامانى:

- جاڭا ءۇيدى پايدالانۋعا تاپسىرعاندا، ونىڭ قانشا سۋ تۇتىناتىنىن ناقتى بىلەمىز. ويتكەنى ەندى ۇيلەر سۋ ۇنەمدەيتىن شۇمەكتەردەن باستاپ باقشانى تامشىلاپ سۋاراتىن زاماناۋي جۇيەلەرمەن جابدىقتالعان. جانە ءار ليترىن ەسەپتەيتىن قۇرالدار بار.

 ال ەلدىڭ ەڭ باستى جەتىستىگى، تۇتىنۋشىلارعا جەتكىزۋ بارىسىندا سۋدىڭ شىعىنىن بارىنشا ازايتۋ بولىپ وتىر. ەگەر قۇبىر ءشىرىپ كەتسە نەمەسە شۇمەكتەردەن سۋ اعىپ جاتسا، ەشبىر تەحنولوگيانىڭ ونى ساقتاپ قالا الماسى انىق. ال يزرايلدە ءار پاتەرگە تىرشىلىك كوزىن جەتكىزۋ بارىسىندا سۋدىڭ تەك 3 پايىزى عانا شىعىندالادى ەكەن. بۇل -  الەم بويىنشا رەكوردتىق كورسەتكىش.

www.24.kz