ۇلى دالادان ۇلى بريتانياعا: لوندون تورىندە ديماشتىڭ كونسەرتى دۇركىرەپ ءوتتى
ق ر مادەنيەت جانە سپورت مينيسترلىگىنىڭ باسپا ءسوز حاتشىسى ايدار قىرىقباي كونسەرتتەن ۆيدەو ۇزىندىلەرمەن ءبولىستى. شاعىن ۇزىندىلەردە ديماشتىڭ قۇرمانعازى كۇيى «ادايدى» شەبەر ورىنداعانىن، ءوز رەپەرتۋارىنداعى جانە ايگىلى فرانسۋز ءانى «S. O. S» ءانىن شىرقاعانىن كورۋگە بولادى.
ايتا كەتەرلىگى، ءدال وسى «S. O. S» ءانى ورىندالعان كەزدە ساحنانىڭ الىپ ەكرانىنان مانەرلەپ سىرعاناۋشى، مارقۇم دەنيس تەننىڭ مۇز ايدىنىندا ونەر كورسەتكەن ۆيدەوسى كورسەتىلگەن.
تاعى ءبىر ۆيدەو ۇزىندىدە ديماش ورىنداعان «دايديداۋ» ءانىن لوندونداعى كورەرمەندەردىڭ ۇلكەن شوعىرى بىرگە ايتىپ تۇرعانىن كورۋگە بولادى.
كونسەرت ەكى جارىم ساعاتقا سوزىلدى. ديماش ءانىن ورىنداپ، قوشتاسىپ كەتكەننەن كەيىن دە قالىڭ تىڭدارمان ساحنانىڭ الدىن بوساتپاي، جارتى ساعاتقا جۋىق ۋاقىت ديماشتىڭ ەسىمىن اتاپ تۇرىپ الدى. بۇل كەزدە تالانتتى ءانشى ساحنا سىرتىندا جۋرناليستەرمەن جۇزدەسىپ، اسەرىمەن ءبولىسىپ جاتتى.
- مىناداي كورەرمەننىڭ الدىندا، ونەردى تەرەڭ باعالاي بىلگەن بۇقارا الدىندا قازاق اندەرىن ورىنداپ، ءبىر ارمانىما جەتتىم دەپ ەسەپتەيمىن. وتە قۋانىشتىمىن. العان اسەرىمدى ءالى تولىق سەزىنىپ بىتە الار ەمەسپىن، - دەدى ديماش.
ەسكە سالا كەتسەك، وسىدان ءتورت كۇن بۇرىن ديماش قۇدايبەرگەن ق ر مادەنيەت جانە سپورت ءمينيسترى ارىستانبەك مۇحامەدي ۇلىمەن كەزدەسۋىندە لوندوندا ورىندالاتىن اندەردىڭ 60 پايىزى قازاق تىلىندە بولاتىنىن ايتقان ەدى.
ودان بولەك، ءانشىنى بريتان استاناسىنداعى اۋەجايدا الەمنىڭ تۇكپىر- تۇكپىرىنەن كەلگەن جانكۇيەرلەرى قالاي كۇتىپ العانىن حابارلاعان بولاتىنبىز.
3000 ادامدى سىيدىرا الاتىن «Indigo at the O2» كەشەنىندە وتكەن كونسەرتتىڭ بيلەتتەرى الدىن- الا ينتەرنەت ارقىلى ساتىلىپ قويعان. ءتىپتى، بيلەت ساتاتىن ينتەرنەت سايتى ديماشتىڭ كوتسەرتىنىڭ بيلەتىن ساۋداعا شىعارعان كۇنى قاراۋشى ادامداردىڭ سانىننىڭ كوپتىگىنەن ىستەن شىقتى.
كونسەرتتى تاماشالاۋعا الەمنىڭ 50-گە جۋىق ەلىنەن ديماشتىڭ جانكۇيەرلەرى جينالدى. قازاقستاننان دا ارنايى ءبىر قاۋىم ەل تەمزا جاعالاۋىنا جەتىپ، ەل ماقتانىشى بولعان ديماشتىڭ ورىنداۋىنداعى اندەردى قۇلاق قۇرىشى قانعانشا تىڭداپ قايتتى.
اۆتور: ايان بەكەن ۇلى