پرەزيدەنت: زاڭ بۇزعان سۋدياعا ەڭ قاتال جازا قولدانىلۋى كەرەك

استانا. قازاقپارات - كەشە قازاقستان پرەزيدەنتى نۇرسۇلتان نازاربايەۆ قازاقستاندىق سۋديالاردىڭ بويىندا بولۋى ءتيىس قاسيەتتەردى اتادى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

نۇرسۇلتان نازاربايەۆ ءوز سوزىندە، قازىرگى تاڭدا سۋديالاردى ىرىكتەۋ ءتارتىبى قاتايا تۇسكەنىن تىلگە تيەك ەتتى. وسىلايشا، سۋديا لاۋازىمىنا 100 ۇمىتكەردىڭ بەسەۋى عانا سىننان سۇرىنبەي وتكەن. اتالمىش شارالار كۇردەلى ىستەردى قاراۋدا سۋديالىق جۇمىسقا بىلىكتىلىگى جوعارى زاڭگەرلەردى تارتۋعا جول اشقان. مۇنداي ماماندار ءۇشىن ءتيىستى جاعداي جاسالىپ، ايتارلىقتاي جوعارى اقى تولەنبەك.

«انت بەرگەن سۋديالارعا ايتارىم، انت دەگەنىمىز - جاي عانا ءسوز ەمەس. ءوز ءىس- ارەكەتتەرىڭىزدە انتتى باسشىلىققا الۋلارىڭىز كەرەك. سۋديالاردىڭ جالاقىسى مەن ولاردى قامتاماسىز ەتۋ ماسەلەسى سالىق تولەۋشىلەر قاراجاتى ەسەبىنەن شەشىلەدى. سوندىقتان، سۋديالار ءتيىمدى جۇمىس ىستەۋگە ءتيىس. زاڭ بۇزعان سۋدياعا ەڭ قاتال جازا قولدانىلۋى كەرەك»، - دەدى مەملەكەت باسشىسى.

 قازاقستان پرەزيدەنتى كادرلىق ماسەلەلەردىڭ ءبارىن جوعارى سوتتان جوعارى سوت كەڭەسىنە بەرۋدى ۇيعاردى. سۋديالاردىڭ مانساپتىق ىلگەرىلەۋى قوعام تاراپىنان باعالاناتىن كاسىبي بىلىكتىلىگى مەن ادالدىعىنا عانا بايلانىستى بولۋعا ءتيىس. ەلباسى سوت كادرلارىن ساپالى تۇرعىدا جاڭارتۋعا باعىتتالعان زاڭ جوباسىن ازىرلەپ، پارلامەنتتىڭ قاراۋىنا ەنگىزۋدى تاپسىردى. قازاقستان رەسپۋبليكاسىنىڭ سوت جۇيەسى جانە سۋديالارىنىڭ مارتەبەسى تۋرالى» كونستيتۋتسيالىق زاڭعا سايكەس، 2019 -جىلى 470 سۋديا كاسىبي باعالاۋدان وتكىزىلەدى. وسىعان وراي، نۇرسۇلتان نازاربايەۆ جوعارعى سوت پەن جوعارى سوت كەڭەسىنىڭ باسشىلىعىنا بۇل ماسەلەنىڭ شىنايىلىعىن قامتاماسىز ەتۋدى تاپسىردى.

«قوعامدا سوتتارعا دەگەن نىق سەنىم بولعاندا عانا سوت جۇيەسىن جاڭعىرتا الامىز. ءبىزدىڭ تۇپكى ماقساتىمىز - تاۋەلسىز ءارى ساتىلمايتىن سوت بيلىگى. سوتتار ستاتيستيكالىق ادىستەرمەن عانا ەمەس، سونداي- اق تاۋەلسىز الەۋمەتتىك زەرتتەۋلەر جۇرگىزۋ ارقىلى باعالاناتىن بولادى. سوت قۇرامى سۋديالاردىڭ قانشالىقتى ادال قىزمەت ەتىپ، سەنىمگە يە بولعانىنا بايلانىستى باعالاناتىنىن تۇسىنۋگە ءتيىس. زاڭنامانى قاتاڭ ساقتاۋعا نەگىزدەلگەن شۇعىل ءارى اشىق سوت تورەلىگى قوعامىمىزدىڭ نەگىزى مۇددەسى مەن ەلىمىزدىڭ ستراتەگيالىق دامۋ باعىتىنا ساي كەلەدى، - دەدى مەملەكەت باسشىسى.

قازاقستان پرەزيدەنتى سوت ءىسىن جۇرگىزۋدە جانە ەلەكتروندىق سەرۆيستەر جۇمىسىندا جاڭا فورماتتار ەنگىزۋدى، سونداي- اق سوت عيماراتتارىندا فرونت- كەڭسەلەر قۇرۋدى تاپسىردى. بەلگىلەنگەن مىندەتتەردىڭ جۇزەگە اسىرىلۋىنا باقىلاۋ جاساۋدى قامتاماسىز ەتۋ پرەزيدەنت اكىمشىلىگىنە جۇكتەلدى. بۇل ورايدا، سوت ىستەرىنىڭ ساپالى ءارى ۋاقتىلى قارالۋىنا، سونداي- اق ازاماتتاردىڭ تالابىن قاناعاتتاندىرۋعا باسا ءمان بەرىلۋى كەرەك.

اۆتور: ايان بەكەن ۇلى