قىزىلوردادا جىراۋلىق مەكتەپ شاكىتتەرىنىڭ كونسەرتى ءوتتى

قىزىلوردا. قازاقپارات - قىزىلوردادا كورەرمەندەر سىر بويىنداعى جىراۋلىق مەكتەپ شاكىرتتەرىنىڭ ونەرلەرىن تاماشالادى، دەپ حابارلايدى قازاقپارات ءتىلشىسى.

وبلىستىق مادەنيەت، ارحيۆتەر جانە قۇجاتتاما باسقارماسىنىڭ ۇيىمداستىرۋىمەن ا. توقماعانبەتوۆ اتىنداعى مادەنيەت ۇيىندە «كەرۋەن جىردىڭ جالعاسى» اتتى كونسەرت قويىلدى. ايتا كەتەرلىگى، بۇل شارا بيىل العاش رەت وتكىزىلىپ وتىر.

سىر بويى جىراۋلىق ونەرىنىڭ وزىندىك ورنەگى بار. ولاردىڭ وزىندە ءبىر-بىرىنە ۇقساي بەرمەيتىن وزگەشەلىك كەزدەسەدى. قازىرگى تاڭدا وبلىس اۋداندارىندا سونداي جىراۋلىق مەكتەپتەرى ورەندەردى ونەرگە باۋلىپ كەلەدى. اتاپ ايتقاندا، قارماقشى اۋدانىنداعى كوشەنەي رۇستەمبەكوۆ اتىنداعى جىراۋلار ءۇيى مەن تۇرىمبەت سالقىمباي ۇلى اتىنداعى اۋەز مەكتەبىنىڭ، قازالى اۋدانىنداعى باينازار وتەپوۆ اتىنداعى جىر ۇيىرمەلەرىنىڭ، ارال اۋداندىق مادەنيەت ورتالىعىنىڭ جانە شيەلى اۋدانىنداعى نارتاي جىر مەكتەبىنىڭ جانە قىزىلوردا قالاسىنداعى جىر ۇيىرمەلەرىنىڭ شاكىرتتەرى اتالمىش شارا بارىسىندا ءوز تارتۋىن جاسادى.

جاس جىراۋلار ونەرىن باعالاۋعا وسى سالادا ۇزاق جىلدان بەرى جەمىستى قىزمەت ەتىپ كەلە جاتقان جۇمابەك اققۇلوۆ، ارنۇر كوشەنەي، بەرىك سايماعانبەتوۆ، شولپان بيىمبەتوۆا، اقمارال نوعايبايەۆا سىندى ماماندار قاتىستى.

«اتالمىش جىر كەشى ارقىلى جاس ۇرپاق بويىندا ۇلتتىق ونەرگە دەگەن قىزىعۋشىلىقتى ارتتىرۋعا ءمان بەردىك. بۇگىنگى شارا بارىسىندا ورەندەردىڭ ورەلى ونەرگە دەگەن ۇمتىلىسى ءبىزدى قۋانتتى»، - دەدى كوشەنەي رۇستەمبەكوۆتىڭ بالاسى، جىراۋ ارنۇر كوشەنەي.

بىلتىر اۋداندارداعى ونەر مەكتەپتەرىندە قوبىز ۇيىرمەلەرى اشىلدى. ەندى وعان اۋەس ورەندەردىڭ قاتارى كوبەيە تۇسپەك.