فۋتبول: قازاقستان ۇلتتار ليگاسىنىڭ سوڭعى ماتچىندا گرۋزياعا ەسە جىبەردى
ءتورتىنشى تۋردان كەيىن-اق گرۋزيا توپ جەڭىمپازى بولىپ ۇلگەرگەندىكتەن، بۇل ماتچ ەشتەڭەنى شەشپەيتىن ەدى. سوندىقتان قازاقستان قۇراماسىنىڭ باس باپكەرى ستانيمير ستويلوۆ ءبىرقاتار فۋتبولشىلارعا ءوز ونەرلەرىن كورسەتۋىنە مۇمكىندىك بەردى.
تبيليسي قالاسىندا وتكەن كەزدەسۋدە «توبىلدىڭ» قاقپاشىسى، 30 جاسار دميتري نەپوگودوۆ العاش رەت ەل نامىسىن قورعاسا، تاعى ءبىر قوستانايلىق، جارتىلاي قورعاۋشى ماكسيم فەدين دە بىردەن الاڭعا شىقتى.
ءبىرىنشى تايمدا الاڭ يەلەرى كوبىرەك شابۋىلداعانىمەن، ناعىز گول سوعاتىن مۇمكىندىك قازاقستاندىقتاردا بولدى. سەرىكجان مۇجىقوۆ ءدال پاس بەرىپ، رومان مۋرتازايەۆ گرۋزيالىق قاقپاشى گەورگي لوريامەن بەتپە-بەت شىققانىمەن، ايلاسىن اسىرا المادى.
ەكىنشى تايمدا گرۋزيالىقتار دەگەنىنە جەتتى. سول قاناتتان قۇستاي ۇشقان بەلگيالىق «گەنت» كلۋبىنىڭ جارتىلاي قورعاۋشىسى، 19 جاسار گەورگي چاكۆەتادزەنى ابزال بەيسەبەكوۆ ۇستاي المادى. چاكۆەتادزەنىڭ بەرگەن پاسىنان كەيىن گەورگي مەرەباشبيلي باسپەن سوققاندا، دوپ عافۋرجان سۇيىمبايەۆتىڭ ارقاسىنا ءتيىپ، قاقپاعا ەندى دە كەتتى. ال 83-مينۋتتا گ. چاكۆەتادزەنىڭ ءوزى ورتا تۇستان قاقپا بۇرىشىن ءدال كوزدەي ءبىلدى - 2:0.
گ. چاكۆەتادزە 6- قىركۇيەك كۇنى استانادا وتكەن ءبىرىنشى كەزدەسۋدە دە مەرگەندىك تانىتىپ، ۇلتتار ليگاسىنداعى العاشقى گولدى سوققان ەدى. بۇل جولى دا ول ۇزدىك ويىنشى ەكەندىگىن تانىتا ءبىلىپ، جەڭىس گولىنىڭ اۆتورى اتاندى.
س. ستويلوۆ ماتچ تاعدىرى شەشىلگەننەن كەيىن عانا، 89-مينۋتتا الاڭعا قاراعاندىلىق «شاحتەردىڭ» 20 جاسار شابۋىلشىسى ورالحان ومىرتايەۆتى شىعاردى. ءبىر-اق مينۋتتان كەيىن ورالحان ايىپ الاڭىندا كەۋدەسىمەن دوپتى قابىلداپ الىپ، ءدال سوققى جاساي الدى. بۇل ونىڭ قازاقستان ۇلتتىق قۇراماسى ءۇشىن العاشقى گولى ەدى.
وسىلايشا گرۋزيا قۇراماسى 2:1 ەسەبىمەن جەڭىسكە جەتتى.
ءبىرىنشى توپتا 16 ۇپايمەن گرۋزيا قۇراماسى كوش باسىنا كوتەرىلسە، قازاقستاندىقتار التى ۇپايمەن ەكىنشى ورىنعا يە بولدى. اندوررا مەن لاتۆيا قۇرامالارى 0:0 ەسەبىمەن تەڭ تارقاستى. بۇل ەكەۋىنىڭ ۇپايلارى (4) تەڭ بولعانىمەن، لاتۆيالىقتار ءۇشىنشى، اندوررالىقتار ءتورتىنشى ورىنعا تۇراقتادى.
گرۋزيا قۇراماسى كەلەسى ۇلتتار ليگاسىندا C ديۆيزيونىندا وينايدى. ءسويتىپ ولار 2020-جىلى وتەتىن ەۋروپا چەمپيوناتىنا بەرىلەتىن جولداما ءۇشىن كۇرەستى جالعاستىرادى.
ەسكە سالايىق، ءبىزدىڭ قۇراما د ليگاسىنىڭ ءبىرىنشى توبىندا گرۋزيا، لاتۆيا جانە اندوررا قۇرامالارىمەن باسەكەگە ءتۇستى. ق ر ۇلتتىق قۇراماسى العاشقى تۋردا ءوز الاڭىندا گرۋزيادان 0:2 ەسەبىمەن جەڭىلسە، ودان كەيىن الدىمەن اندوررا، سوسىن لاتۆيامەن 1:1 ەسەبىمەن تەڭ ناتيجە تىركەلدى. ال ءتورتىنشى تۋردا ەلوردادا اندوررانى 4:0 ەسەبىمەن جەڭگەنىمەن، بەسىنشى تۋردا ءوز الاڭىندا لاتۆيامەن تاعى دا 1:1 ەسەبىمەن تەڭ ءتۇستى.