قازاقستاننىڭ جوباسى ەۋروپالىق پوشتالار قاۋىمداستىعىنىڭ سىيلىعىن يەلەندى
«ءبىزدىڭ «سالەمدەمەلەر سۋپەرماركەتى» جوباسى PostEurop Innovation Award 2018 سىيلىعىندا ەڭ ۇزدىك يننوۆاتسيالىق جوبا سىيلىعىنا يە بولدى. بۇگىندە قازاقستان بويىنشا 214 سالەمدەمە سۋپەرماركەتى جۇمىس ىستەيدى. جاڭا تەحنولوگيانىڭ ارقاسىندا سالەمدەمەنى جىبەرۋ مەن الۋ جانە بەرۋ ۋاقىتى 2-3 مينۋتقا دەيىن قىسقاردى»، - دەپ جازدى «قازپوشتا» ا ق- نىڭ باسقارما ءتوراعاسى ساكەن سارسەنوۆ فەيسبۋكتەگى پاراقشاسىندا.
ايتا كەتسەك، PostEurop Innovation Award سىيلىعى بۇكىل الەمدىك پوشتا وداعىنىڭ قۇرىلتايشىسى ەۋروپالىق قوعامدىق پوشتالىق وپەراتورلار قاۋىمداستىعىنىڭ ۇيىمداستىرۋىمەن 2017-جىلدان باستاپ بەرىلەدى. سىيلىق پوشتا يندۋسترياسىنا قاجەتتى جاڭا تۇجىرىمدامالار، يدەيالار الماسۋ مەن PostEurop مۇشەلەرىنىڭ ۇزدىكسىز ءوزارا ارەكەتتەسۋىن قامتاماسىز ەتۋگە باعىتتالعان.
بۇعان دەيىن، قازپوشتا باسشىسى بۇگىندە ەلىمىزدە 111 فرانچايزينگ نۇكتەلەرىنىڭ اشىلعانىن حابارلاعان بولاتىن. ونداعى ماقسات - حالىقتى قولجەتىمدى جەردەن پوشتا قىزمەتىمەن قامتۋ.
ونىڭ سوزىنە قاراعاندا ەندى پوشتا بولىمشەلەرىنە بارماي-اق، سالەمدەمەلەردى الۋعا نەمەسە جىبەرۋگە، اۋە جانە تەمىرجول بيلەتتەرىن ساتىپ الۋعا، سونداي-اق، كوممۋنالدىق تولەمدەردى جانە سالىقتاردى تولەۋگە بولادى. سونىمەن قاتار، جەكە كاسىپكەرلەر دۇكەندەرىندە، جانار- جاعارماي قۇيۋ ستانتسيالارىندا جانە باسقا دا جەرلەردە قازپوشتانىڭ قىزمەتتەرىن پايدالانىپ، سونداي-اق ءوز تاۋارلارىن ساتا الادى.