ق ر پرەزيدەنتى: بىزگە جاڭا فورماتسيانىڭ پوليتسەيلەرى كەرەك

 استانا. قازاقپارات - قازاقستان پرەزيدەنتى نۇرسۇلتان نازاربايەۆ پوليسيا قىزمەتىنىڭ جاڭا فورماتسياسىن قۇرۋ قاجەتتىگىن ءمالىم ەتتى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

«بارلىق ارتىق تۇستاردان ارىلىپ، قىلمىسپەن كۇرەسكە جانە قۇقىقتىق تارتىپكە جۇمىلۋ كەرەك. بولىمدەر وڭتايلاندىرىلىپ، سونىڭ ارقاسىندا ءبىر ادامنىڭ جەتەكشىلىگىندە ءۇش ادامنان ەمەس، بەس ادامنان اينالاتىن بولادى. شتاتتىق سان 10 پايىزعا قىسقارادى. اتالمىش شارالار 100 مىڭ ادامعا شاققاندا پوليسەيلەردى 471 دەن 424 كە ازايتادى. بۇل ەۋروپالىق دەڭگەيمەن تەڭدەس ەكەنىن ايتا كەتۋ كەرەك. وسىنىڭ ارقاسىندا 16 ميلليارد تەڭگە ۇنەمدەلەدى» ، - دەدى مەملەكەت باسشىسى ىشكى ىستەر ورگاندارىنىڭ جۇمىسىن جاڭعىرتۋ ماسەلەلەرى بويىنشا وتكەن وتىرىستا.

پرەزيدەنت جاڭعىرتۋدىڭ ماڭىزدىلىعىنا توقتالىپ، كەيبىر قۇرىلىمداردى وڭتايلاندىرۋ جانە پوليسيانىڭ قىزمەتىنە ساي كەلمەيتىن قىزمەتتەردى قىسقارتۋ ماسەلەسىنە نازار اۋداردى. قازاقستان پرەزيدەنتى وسىدان ۇنەمدەلگەن قاراجاتتى قىزمەتكەرلەردىڭ ەڭبەكاقى جۇيەسىن جاقسارتۋ جانە الەۋمەتتىك قورعالۋىنا باعىتتاۋ كەرەكتىگىن تاپسىردى. پرەزيدەنت سونىمەن بىرگە قوسىمشا ىشكى رەزەرۆتەردى ىزدەۋ بويىنشا جۇيەلى جۇمىس جۇرگىزۋگە جانە ءتيىمسىز اكىمشىلىك شىعىستاردى قىسقارتۋ قاجەتتىگىنە توقتالدى.

«پوليسەيلەردىڭ ەڭبەكاقىسىن ارتتىرۋعا قوسىمشا 21,4 ميلليارد تەڭگە جۇمسالادى. ونىڭ ءبارى دە - حالىقتىڭ اقشاسى. سالىق تولەۋشىلەردىڭ قاراجاتى ەسەبىنەن ءبىز پوليسيانى، ارميا مەن سوتتاردى ۇستاپ وتىرمىز. مىنە، سوندىقتان ازاماتتار قۇقىققورعاۋ ورگاندارىنىڭ قىزمەتكەرلەرى ءوز مىندەتىن لايىقتى اتقارۋىن تالاپ ەتەدى» ، - دەدى مەملەكەت باسشىسى.

نۇرسۇلتان نازاربايەۆ سونىمەن قاتار قىلمىسپەن كۇرەسىپ، قۇقىقتىق ءتارتىپتى قاداعالاپ جۇرگەن قىزمەتكەرلەردىڭ تۇرعىن ءۇي ماسەلەسىن شەشۋ جۇمىسىنا جەكە توقتالدى. پرەزيدەنتتىڭ ايتۋىنا قاراعاندا، بۇل شارالار قوسىمشا بىلىكتى كادرلاردى تارتۋعا مۇمكىندىك بەرىپ، بولىمشەلەردى كۇشەيتۋگە جول اشادى. مەملەكەت باسشىسى ءوز سوزىندە پوليتسيا ساپىنان قىزمەتكەر كەتىپ قالعان جاعدايدا وعان بەرىلگەن بارلىق جەڭىلدىكتەر الىنىپ تاستالاتىنىن حابارلادى.

«بىزگە جاڭا فورماتسيانىڭ پوليسەيلەرى كەرەك. كادرلاردى ىرىكتەۋ، دايارلاۋ جانە العا جىلجىتۋدىڭ جۇيەسى قايتا قارالاتىن بولادى. ۆەدومستۆولىق بىلىمگە ۇلكەن وزگەرىستەر ەنگىزىلەدى. دايارلىق ساپاسى الەمدىك ستاندارتتارعا ساي كەلەتىن زامانعا لايىق پوليتسيا اكادەميالارى كەرەك» ، - دەدى ەلباسى.

ەسكە سالا كەتسەك، مەملەكەت باسشىسى سونداي- اق پوليسيانى رەفورمالاۋعا كىدىرمەستەن كىرىسۋ قاجەتتىگىن اتاپ وتكەن بولاتىن.