پوليسەيلەردى دايارلايتىن وقۋ ورىندارى قىسقارادى - ەلباسى
بۇل تۋرالى اقوردادا ىشكى ىستەر ورگاندارى قىزمەتىن جاڭعىرتۋ ماسەلەلەرى جونىندەگى كەڭەستە ق ر پرەزيدەنتى نۇرسۇلتان نازاربايەۆ ءمالىم ەتتى، دەپ حابارلايدى قازاقپارات.
قازاقستان پرەزيدەنتى ءى ءى م قاراماعىنداعى 12 وقۋ ورنىنىڭ ۇزدىك بەسەۋى قالاتىنىن، وعان ەڭ بىلىكتى دەگەن وقىتۋشىلار ىرىكتەلەتىنىن، سايكەسىنشە، وسى مامانداردىڭ دا ەڭبەكاقىسى جوعارىلايتىنىن اتاپ ءوتتى.
«قىزمەتتەگى پوليسەيلەردى كەزەكتەن تىس اتتەستاتسيا كۇتىپ تۇر. وسى ورايدا زاماناۋي ستاندارتتارعا ساي كەلەتىندەر عانا قالادى. بۇل ەمتيحاننان وتپەي قالعان قىزمەتكەرلەردىڭ ورنىنا لايىقتىلار ىرىكتەلەدى. قازاقستاندا ساپالى ىرىكتەۋ جۇرگىزۋگە مۇمكىندىكتەر بارشىلىق، جىل سايىن ءبىزدىڭ جوعارى وقۋ ورىندارىمىز 20 مىڭنان استام زاڭگەردى دايارلاپ شىعارادى» ، - دەدى نۇرسۇلتان نازاربايەۆ.
سونىمەن بىرگە ەلباسى ىشكى ىستەر ورگاندارىنان جۇمىستىڭ سەرۆيستىك مودەلىنە كوشۋدى تالاپ ەتتى.
«جىل سايىن پوليسياعا 4,5 ميلليوننان استام ازامات جۇگىنەدى، الايدا ادامداردى قابىلداۋعا ءتيىستى جاعداي جاسالماعان. قايعىسىمەن كەلگەن ادامدى جىلدام جانە سىپايى قارسى الۋ كەرەك. ءبىراق تا بۇل شارالار ءىستىڭ جارتىسى عانا. ءار ازاماتتىڭ پروبلەماسىن جەدەل ءارى زاڭعا سايكەس شەشۋ كەرەك. حالىقپەن جۇمىستىڭ زاماناۋي فورماتى وسىنداي باسىمدىقتاردى قامتيدى» ، - دەدى مەملەكەت باسشىسى.
ەسكە سالا كەتسەك، بۇدان بۇرىن مەملەكەت باسشىسى پوليسيانى رەفورمالاۋعا كىدىرمەستەن كىرىسۋ قاجەتتىگىن اتاپ وتكەن بولاتىن.