نازيرا بەردالى: ارىمدى ساتسام، قازىر بايلاردىڭ قاتارىندا جۇرەر ەدىم
جۋرناليست ارى مەن جانىنىڭ تارازىسى جايلى جازعان.
«مالىم - جانىمنىڭ ساداعاسى، جانىم - ارىمنىڭ ساداعاسى». قازاقتى ۇلت رەتىندە ساقتاپ كەلگەن ءدال وسى قاعيدا ەدى. قازىر... بۇل ۇعىمنىڭ ىشەك-قارىنى اقتارىلىپ، سىرتىنا شىعىپ كەتتى. مال ءۇشىن جان بەرۋگە دايارمىز-اۋ، اردى بىلاي قويعاندا. اكەم دۇنيەدەن وتكەلى بەرى اق ءولىم جايلى كوپ ويلايمىن. مەنىڭ اكەم ۇنەمى ات ۇستىندە ءجۇردى، قىزمەتتە بولدى، ءبىزدى ەشقاشان تارىقتىرعان جوق. قولىندا ءبىراز مۇمكىندىك بولا تۇرا، ەشكىمنىڭ الا ءجىبىن اتتامادى. بايلىق جيمادى. قيانات جاسامادى. اجال ءساتى كەلگەندە سويلەپ وتىرعان جەرىندە، كۇلىمدەگەن كۇيى ءجۇرىپ كەتىپتى. سارى مايدان قىل سۋىرعانداي.
ارىڭمەن كەلىسىمگە كەلسەڭ، ادام ءولتىرىپ تە مال تابۋعا بولادى. ءبارى سول ىشكى تارازىنىڭ جۇمىسىنا بايلانىستى. ار جاعى شيكى ەكەنىن سەزە تۇرا بۇگىن ءومىر ءسۇرىپ قالۋعا تىرىسىپ جانتالاساتىندار:
ا) ءوز يدەياسىنا شەكسىز سەنەتىندەر؛
ب) قۇدايدىڭ مەيىرىنەن كۇدەر ۇزگەندەر (قاتتى قيىندىق كورگەندەر) دەپ ويلايمىن. ايتپەسە، مۇمكىن ەمەس قوي - بىلە تۇرا الداۋ، ءوزىڭدى دە، وزگەنى دە...
مەن «بايمىن، باي بولامىن، بايىتا كور» دەپ دۇعا جاسامايمىن. «قايىرسىز اقشادان ساقتا» دەيمىن. قازىرگى پسيحولوگتاردىڭ پايىمىنشا بۇل كەدەيلىك پسيحولوگياسى شىعار. ميىمدا كەدەرگىلەر كوپ، بالكىم؟ بولا بەرسىن. ەلدى جىلاتىپ سالعان ءۇيى ورتەنىپ كەتكەن، جالعىز بالاسى جاماندىققا ۇشىراعان، جازىلماس دەرتكە شالدىققان تالاي بايدى كوردىم. قايىرسىز اقشادان ساقتا! قايتا ولاردى قۇدايدىڭ جاقسى كورگەنى شىعار دەپ ويلايمىن، ەسەپتى وسى دۇنيەدە تۇگەندەگەن. ماعان تاعدىر قانشا رەت وڭاي اقشا ۇسىنعانىن، اقشاعا ار ساتۋدىڭ قانشا مۇمكىندىگى بولعانىن سىزدەر بىلمەيسىزدەر! بايلىقتى تاڭداسام، قازىر سول بايلاردىڭ قاتارىندا جۇرەر ەدىم. ءسوزسىز. ميداعى كەدەرگىلەر جايلى ايتتىم عوي، سولار مەنى ۇنەمى ساقتاپ قالاتىن. باسقاشا ايتقاندا، قۇداي ساقتايتىن!
سول سەبەپتى، مەن كوزىم انىق جەتپەگەن، كۇماندى كاسىپپەن اينالىسپايمىن. تازا ەڭبەكپەن مال تاۋىپ جۇرگەندەردى قاتتى قۇرمەتتەيمىن! جالپى، كاسىپ دەگەن - ءوزىڭ جاساعان بۇيىمدى نەمەسە بويىڭداعى ونەردى ساتۋ. جۋرفاكتا جارىلقاپ اعاي ايتاتىن: ەگەر سەن گازەت شىعارىپ، سول گازەتىڭدى كوشەدە تۇرىپ ساتساڭ، كاسىپكەرسىڭ. ال، بىرەۋدىڭ شىعارعان گازەتىن ساتساڭ - الىپساتارسىڭ دەپ. اركىم جان-دۇنيەسىندەگى بوس كەڭىستىكتى ءبىر نارسەمەن تولتىرۋعا تىرىسادى. بايلىق قۋۋ دا جۇرەكتەگى جىرتىقتى جاماۋدىڭ ءبىر فورماسى. ءبارىن تۇسىنەمىن. ەشكىمدى ايىپتامايمىن. مالىم جانىمنىڭ، جانىم ارىمنىڭ ساداعاسى!» - دەپ جازعان.
دەرەككوز. Reactor