قازاقستاندىق ديزاينەردىڭ كيىمدەرىن گولليۆۋد اكتريسالارى كيىپ ءجۇر
دينا قابدوللا 15 جاسىندا الماتىدان انگلياعا كوشىپ بارعان. كەمبريدجدەگى كوللەدجدى Art Sciences ماماندىعىمەن بىتىرگەن بويجەتكەن كەيىننەن ا ق ش- تىڭ لوس- اندجەلەس قالاسىنا قونىس اۋدارعان.
ونەرپاز قىز ءوزىنىڭ ءتول AyaByDK برەندىن 2014 -جىلى اشتى. ءبىر جىلدان سوڭ ينتەرنەت- دۇكەن ىسكە قوسىلدى. قازىر دينانىڭ كيىمدەرى لوس- اندجەلەستەگى 6 دۇكەندە ساتىلىپ جاتىر.
قازاقستاندىق ديزاينەر جاقىندا جاڭا اسۋلاردى باعىندىرماق. اتاپ ايتقاندا، جاقىندا ديزاينەر Los Angeles fashion week اپتالىعىنا قاتىسۋعا شاقىرتۋ الدى.
«ولار ءبىزدىڭ پوچتامىزعا حات جىبەرگەن. تۇسىنگەنىم، ولار مەنىڭ شىعارماشىلىعىمدى ۇنەمى باقىلاپ وتىر ەكەن. ەندى الداعى جىلدىڭ 1-6 - ناۋرىزىندا لوس- اندجەلەستەگى ءسان اپتالىعىنا ارنايى توپتاما دايىنداپ جاتىرمىز. ءبىزدىڭ كيىمدەرىمىز قاي كۇنى پوديۋمعا شىعاتىنىن ءالى ايتا المايمىن»، - دەدى دينا قابدوللا الماتىداعى AYA جانە AL'AYA by Dina Kabdolla توپتاماسىنىڭ جابىق تانىستىرىلىمىندا.
ونىڭ ايتۋىنشا، گولليۆۋد فيلمدەرىندە قولدانىلاتىن توپتامانىڭ بارلىعى قازاقستاندا تىگىلەدى.
«ديزايندى مەن ءوز كومانداممەن جاساپ جاتىرمىن. ەسكيزدەر دە وسىندا جاسالىپ، امەريكاعا جىبەرىلەدى. مەنىڭ ماقساتىم - قازاقستاندىق ونىمدەردى ەكسپورتقا شىعارۋ. ساپاسى جاعىنان بىزدىكى ولاردىكىنەن كەم تۇسپەيدى»، - دەيدى دينا قابدوللا.
ديزاينەردىڭ كيىمدەرىن اكتريسا مارگو روببي «جىرتقىش قۇستار» كينوكوميكسىندە كيەتىن بولدى.
«ءبىز لوس- اندجەلەستەگى شوۋ- رۋمدا جۇمىس جاساپ جاتقاندا جاڭا فيلمنىڭ كوستيۋمەرلەرى كەلىپ، كوپ برەندتىڭ ىشىنەن ءبىزدىڭ برەندتى تاڭدادى. ولار 2-3 كيىمگە تاپسىرىس بەردى»، - دەدى ول.
ايتا كەتۋ كەرەك، دينا قابدوللانىڭ كيىمدەرىن امەريكاندىق اكتريسا پەريس حيلتون كيىپ ءجۇر. دينانىڭ ءبىر كويلەگىن پەريس بەرليندەگى جۋرنالعا فوتوسەسسيا ءۇشىن العان. انشىلەر Bebe Rexha، كاميلا كابەلو گاسترولدىك ساپارلارىنا دينانىڭ كيىمدەرىن كيەدى. ال، Fifth Harmony توبىنىڭ ءانشى قىزدارى ءوز بەينەكليپتەرىنە كوستيۋمدەردى ديناعا تىككىزەدى.
اۆتور: گۇلميرا عوسمانالي