تۇركىستان تۇركى الەمىنىڭ مادەني-رۋحاني ورتالىعىنا اينالادى

تۇركىستان. قازاقپارات - تۇركىستان تۇركى الەمىنىڭ مادەني-رۋحاني ورتالىعىنا اينالادى. بۇل تۋرالى بۇگىن تۇركىستاندا وتكەن «كيەلى تۇركىستان جانە تۇركى دۇنيەسىنىڭ رۋحاني جاڭعىرۋى» اتتى عىلىمي-تەوريالىق كونفەرەنسياسىندا ايتىلدى، دەپ حابارلايدى قازاقپارات ءتىلشىسى.

مەملەكەت باسشىسى نۇرسۇلتان نازاربايەۆتىڭ تۇركى كەڭەسىنىڭ VI سامميتىندە كوتەرگەن «تۇركى دۇنيەسىنىڭ تۇعىرلى تۇلعالارى» جانە «تۇركى الەمىنىڭ كيەلى جەرلەرى» باستامالارىن جۇزەگە اسىرۋ باعىتىندا ۇيىمداستىرىلعان عىلىمي باسقوسۋدا تۇركى دۇنيەسىنىڭ عىلىمى، مادەنيەتى مەن ادەبيەتى، تۇركى تىلدەرى، كيەلى جەرلەر مەن تۇعىرلى تۇلعالارى تۋرالى ايتىلدى.

«تۇركى الەمىنىڭ كيەلى جەرلەرى» دەپ اتالاتىن سەكسياسىندا تۇركى دۇنيەسىنىڭ كيەلى جەرلەرىن انىقتاۋ جوباسىن ازىرلەۋ مەن ونىڭ كريتەريلەرىن بەلگىلەۋ جايى ءسوز بولدى. اتالعان جوبانى ىسكە اسىرۋ مەرىزىمى مەن كەزەڭدەرى، جۇزەگە اسىرۋ ءتارتىبى جانە وزگە دە ماسەلەلەر تالقىلاندى. ال، «تۇركى دۇنيەسىنىڭ اتاقتى تۇلعالارى» سەكسياسىندا تۇلعالاردى انىقتاۋ كريتەريلەرى مەن وسى جوبانى جۇزەگە اسىرۋدىڭ تەتىكتەرى تالقىلاندى.

سونداي-اق، «تۇركى تىلدەرى مەن جازۋى» تاقىرىبىنداعى ءۇشىنشى سەكتسيادا تۇركى ءتىلى، تۇركى ادەبيەتى، تۇركى تىلدەس ەلدەردىڭ لاتىن گرافيكاسىنا كوشۋى تۋرالى ماسەلەلەر كوتەرىلدى. كونفەرەنتسياعا قاتىسۋشىلار تۇركىستاننىڭ تۇركى الەمىنىڭ رۋحاني ورتالىعىنا اينالۋعا تولىق مۇمكىندىگى بار ەكەنىنە توقتالىپ، وسى باعىتتاعى جۇمىستارعا ۇلەس قوسۋعا داينى ەكەندەرىن جەتكىزدى.

تۇركىستان تورىندە وتكەن كونفەرەنسيادا حاليل اكىندجى (تۇركيا)، ۆيكتور بۋتانايەۆ (رەسەي)، مەكەمتاس مىرزاحمەتوۆ (قازاقستان)، كيۋرشاد زورلۋ (تۇركيا)، قانىبەك يماناليەۆ (قىرعىز رەسپۋبليكاسى)، راميز اسكەروۆ (ازەربايجان)، ءومىرزاق ايتبايەۆ (قازاقستان)، باحتيەر كاريموۆ (وزبەكستان)، راحمويل سافاروۆ (تاجىكستان)، الەكساندر ۆاسيليەۆ (رەسەي) جانە تاعى باسقا تاريحشىلار مەن عالىمدار، پروفەسسورلار مەن تۋركولوگتار بىلگەندەرىن ورتاعا سالدى.

ايتا كەتەيىك، بۇگىن تۇركىستان قالاسىندا «كيەلى تۇركىستان جانە تۇركى دۇنيەسىنىڭ رۋحاني جاڭعىرۋى» اتتى عىلىمي-تەوريالىق كونفەرەنتسيا وتۋدە. «رۋحاني جاڭعىرۋ» باعدارلاماسى اياسىنداعى ماڭىزدى جيىندى تۇركىستان وبلىسىنىڭ اكىمدىگى مەن حالىقارالىق تۇركى اكادەمياسى ۇيىمداستىرىپ وتىر. جيىنعا ەلىمىزدەن بولەك ازەربايجان، رەسەي، تۇركيا، قىرعىز رەسپۋبليكاسى، وزبەكستان،  ا ق ش، تاجىكستان، ءۇندىستان مەملەكەتتەرىنەن تۋركولوگتار مەن عالىمدار جانە ديپلوماتيالىق وكىلدىكتەردەن دە قوناقتار قاتىسۋدا.

كونفەرەنسيانى حالىقارالىق تۇركى اكادەمياسىنىڭ پرەزيدەنتى دارحان قىدىرالى جۇرگىزىپ وتىر.