قازاقستان ارقىلى وتەتىن ترانزيتتىك جولاۋشىلار سانى ارتىپ كەلەدى

استانا. قازاقپارات - قازاقستان ارقىلى وتەتىن ترانزيتتىك جولاۋشىلار سانى ارتىپ كەلەدى.

بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا اتالعان باعدارلامانىڭ ىسكە اسىرىلۋى جونىندە بايانداعان ق ر ينۆەستيتسيالار جانە دامۋ ءمينيسترى جەڭىس قاسىمبەك ايتتى، دەپ حابارلايدى قازاقپارات ءتىلشىسى.

«ازاماتتىق اۆياتسيا سالاسىندا بيىل كورسەتكىشتەر ءوسىمىنىڭ وڭ قارقىنى ساقتالۋدا. قاڭتار-قازان ايلارىندا اۋە كولىگىمەن 6,7 ميلليون جولاۋشى تاسىمالداندى. بۇل وتكەن جىلدىڭ سايكەس كەزەڭىمەن سالىستىرعاندا 9,6 پايىزعا كوپ. 10 ايدا ەلىمىزدىڭ اۋەجايلارى 12,7 ميلليون ادامعا قىزمەت كورسەتتى. بۇل 2017-جىلعى سايكەس كەزەڭمەن سالىستىرعاندا 6 پايىزعا جوعارى»، - دەدى مينيستر.

ونىڭ دەرەگىنشە، 2018-جىلعى قاڭتار-قازان كەزەڭىندەگى ترانزيتتىك ۇشاق-شاقىرىمى 2017-جىلعى سايكەس كەزەڭمەن سالىستىرعاندا 4 پايىزعا وسكەنى بايقالادى. بيىل قاڭتار-قازان ايلارىندا ترانزيتتىك اۆياجولاۋشىلار سانى 764442 ادامعا جەتتى. بۇل وتكەن جىلعى سايكەس كەزەڭمەن سالىستىرعاندا 47 پايىزعا ارتىق.

«جىل باسىنان بەرى قازاقستاندىق جانە شەتەلدىك اۋە تاسىمالداۋشىلاردىڭ قاتىسۋىمەن 13 جاڭا باعىت اشىلدى. ولار: حەلسينكىدەن - استاناعا، استانادان - ۆيلنيۋسكە، قازانعا، سوچيگە، چەليابينسككە، كراسنودارعا، تيۋمەنگە، تومسكىگە. ريگا مەن كراسنوياردان - الماتىعا، اتىراۋدان - فرانكفۋرتقا، ماسكەۋدەن - قىزىلورداعا جانە نوۆوسىبىردەن - پاۆلودارعا»، - دەدى مينيستر.

سونىمەن قاتار، ول قازىرگى ۋاقىتتا سەمەي قالاسى اۋەجايىنىڭ ۇشۋ-قونۋ جانە جەرمەن ءجۇرۋ جولاعىن، اەروۆوكزالىن رەكونسترۋكتسيالاۋ جوباسىن ىسكە اسىرۋ جۇمىستارى جالعاسىپ جاتقانىن ايتتى.

«جۇمىستى بيىل جىل سوڭىنا دەيىن اياقتاۋ جوسپارلانىپ وتىر. سونىمەن بىرگە، بيىل قوستاناي قالاسى اۋەجايىنىڭ ۇشۋ-قونۋ جولاعىن قايتا جاڭعىرتۋ باستالدى. 2019-جىلى اياقتالادى»، - دەدى جەڭىس قاسىمبەك.