سوت ترامپ اكىمشىلىگىنىڭ جۋرناليستى اق ۇيگە كىرگىزبەۋىن زاڭسىز دەپ تاپتى
اق ءۇيدىڭ باسپا ءسوز قىزمەتى اكوستانىڭ اككرەديتاتسياسىن قاراشانىڭ 8- كۇنى الىپ قويعان. اق ءۇيدىڭ باسپا ءسوز حاتشىسى سارا ساندەرس سوت شەشىمى ورىندالادى، ءبىراق ول «ۋاقىتشا» دەپ مالىمدەگەن. ا ق ش اكىمشىلىگىنىڭ باسپا ءسوز قىزمەتى اق ۇيدە جۋرناليستەردىڭ جۇمىس ىستەۋ ءتارتىبى تۋرالى ەرەجەنى جەتىلدىرمەك.
جۋرناليست دجيم اكوستانى ا ق ش پرەزيدەنتى دونالد ترامپقا باسپا ءسوز ءماسليحاتى كەزىندە بىرنەشە سۇراق قويعاننان كەيىن اككرەديتاتسياسىنان ايىرعان بولاتىن.
ا ق ش شەكاراسىنا ميگرانتتار «كەرۋەنى» تاقاپ قالعانى تۋرالى ساۋال قويۋدان باستاعان اكوستا ترامپتان رەسەيدىڭ ا ق ش پرەزيدەنتى سايلاۋىنا ىقتيمال كيلىگۋىنە قاتىستى ارنايى پروكۋرور روبەرت ميۋللەر جۇرگىزىپ جاتقان تەرگەۋ جالعاسا ما دەپ سۇراعان.
ترامپقا ءتىلشىنىڭ سۇراقتارى جاقپاي قالعان. «مەن ەلدى باسقارايىن، ال ءسىز CNN- مەن اينالىسىڭىز» دەپ مالىمدەگەن پرەزيدەنت كومەكشىسىنە جۋرناليستەن ميكروفوندى الۋدى تاپسىرعان. كومەكشى قارسىلىق تانىتقان جۋرناليستەن ميكروفوندى قايتارىپ العان.
اق ءۇي اككوستانى اككرەديتاتسيادان ايىرۋدىڭ سەبەبىن ول وزىنەن ميكروفوندى الماقشى بولعان ايەل ادامدى يتەرىپ نەمەسە جولىن بوگەپ، «قول جۇمسادى» دەپ تۇسىندىرگەن.
«CNN سىزدەي ادام جۇمىس ىستەيتىنى ءۇشىن ۇيالۋى ءتيىس. ءسىز دورەكى ءارى سۇمدىق ادامسىز. ءسىز CNN- دە جۇمىس ىستەمەۋىڭىز كەرەك»، - دەپ مالىمدەگەن ترامپ كومەكشىسى ميكروفوندى الىپ قويعاننان كەيىن اكوستاعا.
اق ءۇي ءوزىن اككرەديتاتسيادان ايىرعانى تۋرالى دجيم اكوستا كەلەسى كۇنى كۇزەت قىزمەتى ونى عيماراتقا كىرگىزبەي قويعان كەزدە ءبىر- اق بىلگەن.
سۋديا تيموتي كەلليدىڭ (ونى بۇل قىزمەتكە ترامپتىڭ ءوزى تاعايىنداعان) شەشىمىنە سايكەس، اكوستانىڭ اككرەديتاتسياسى «دەرەۋ» قالپىنا كەلتىرىلىپ، جۋرناليستىڭ اق ۇيگە بريفينگتەر مەن وزگە دە شارالارعا قاتىسۋىنا تىيىم سالىنباۋى ءتيىس. سونىمەن بىرگە اككرەديتاتسيادان ايىرۋ تىلشىگە «ورنى تولماس زالال» كەلتىردى دەپ شەشكەن سۋديا اق ءۇي وكىلىنىڭ CNN تاپسىرماعا كەز كەلگەن باسقا تىلشىگە جىبەرە الار ەدى دەگەن ءۋاجىن نازارعا الماعان.
جۋرناليست دجيم اكوستا جۇمىس ىستەيتىن CNN تەلەارناسى ءتىلشىسىنىڭ اككرەديتاتسياسىن الىپ قويعانى ءۇشىن اق ءۇي اكىمشىلىگىن سوتقا بەرگەن، ءبىراق سوت ونى ءالى قاراعان جوق.
www.azattyq.org