الپىستى القىمداسا دا قۇلاعىمەن كىر تاسىن كوتەرىپ، كولىك سۇيرەيدى

 تاراز. قازاقپارات - جامبىلداعى قوس قۇلاعىمەن كىر تاسىن كوتەرىپ، كولىك سۇيرەيتىن الپىستى القىمداعان قاراتاۋ تۇرعىنىنىڭ كۇش- قايراتى ءالى دە سول قالپىندا، دەپ حابارلايدى قازاقپارات.

  قاراتاۋدا تۇراتىن ەرەكشە ازاماتتىڭ «قۇرىش قۇلاقتى بەرىك» اتانىپ كەتكەنىنە از بولماعان. ونىڭ وزگەشە قابىلەتى ەرتەرەكتە ويانعانىمەن، وسىدان ەكى- ءۇش جىل بۇرىن الەۋمەتتىك جەلىلەردە قۇلاعىنا ءجىپ بايلاپ، جەڭىل كولىكتى تارتىپ، 25-30 كەلىگە دەيىنگى اۋىر سالماقتاعى كىر تاستارىن كوتەرگەن بەينەجازبالار مەن فوتوسۋرەتتەر تارالعان بولاتىن. سودان كوپ ۇزاماي رەسپۋبليكالىق ارنالاردا ءتۇرلى باعدارلامالارعا شاقىرتۋ الىپ، قاتىسقان.

بۇگىندە الپىستى القىمداسا دا بەرىك ءابىلحان ۇلىنىڭ كۇش- قايراتى كەمىمەگەن. قايتا جاتتىققان سايىن ءوز- وزىنە دەگەن سەنىمدىلىگى ارتا تۇسكەندەي. جۋىردا ەرەكشە قابىلەت يەسىنە حابارلاسىپ، حال- جاعدايىن سۇراعانىمىزدا ول ۇنەمى جاتتىعىپ جۇرگەندىكتەن قۇلاق شەمىرشەكتەرى بۇگىندە ودان ءارى قاتايعاندىعىن جەتكىزدى.

7 ۇل- قىزدىڭ اكەسى، نەمەرەلەرىنىڭ اتاسى ب. پىشانوۆ قاراتاۋ قالالىق سپورت مەكتەبىندە شاحمات جانە دويبى ويىندارى بويىنشا باپكەر. جۇبايى جاۋھار مەكتەپتە دەنە شىنىقتىرۋ پانىنەن ۇستازدىق قىزمەت جاسايدى.

 ءا دەگەندە تىسىمەن 10 كەلىلىك كىر تاسىن كوتەرىپ كورگەن ازامات، ۋاقىت وتە كەلە اۋەلى 16، سودان كەيىن 20 كەلىلىك كىر تاستارىن قۇلاعىنا ءجىپ ارقىلى ءىلىپ كوتەرىپ جاتتىعادى. بۇل ءادىسى ىسكە اسقان سوڭ كوڭىلى كولىك تارتىپ كورۋگە اۋا باستايدى. بىردە تاسادا تۇرعان «جيگۋلي» اۆتوكولىگىن قۇلاعىنا ءجىپ ءىلىپ، تارتىپ كورگەندە كولىك العا ءجۇرىپ كەتپەگەنىمەن، ورنىنان قوزعالعانىن اڭعارادى.

 «كەيىن تاۋەكەلگە بەل بۋىپ اكىمشىلىك عيماراتىنىڭ الدىندا جينالعان جۇرتشىلىقتىڭ كوزىنشە ءبىر كولىكتى 3 مەترگە دەيىن قۇلاعىممەن سۇيرەپ كوردىم. كوپشىلىكپەن قوسا ءوزىم دە تاڭ قالدىم. قازىر 3-5 مەترگە دەيىن تارتا بەرەمىن. جاتتىعۋلاردىڭ، دايىندىقتىڭ ارقاسىندا وسىنداي ءىستى جاساي الدىم»، - دەيدى بەرىك ءابىلحان ۇلى. جاتتىعۋدان سوڭ قۇلاقتارىنىڭ ءسال اۋىرسىناتىنىن جاسىرمايدى. بۇگىندە ونىڭ بۇل ەرەكشەلىگىن ون ءۇش جاسار بالاسى مەڭگەرۋدە.

اۆتور: عيبرات سەمباي