قۇداي مەيىرىمىن توككەن جەر

 استانا. قازاقپارات - جەر جۇماعى. سەيشەل ارالدارىنا ات باسىن تىرەپ، تابانى جەرگە تيگەن ساياحاتشى اۋەلى وسى تەڭەۋگە جۇگىنەدى.

 افريكا ماتەريگىنىڭ شىعىس ايماعىندا، ءۇندى مۇحيتىنىڭ ورتا جاعالاۋىندا جاتقان ارالدىڭ باستى قۇندىلىعى -  تابيعاتتىڭ ءوزى. جىلدىڭ ءتورت مەزگىلى ءبىر مەزگىل. ماڭگى جاز.

جان- جاعىن ءىرىلى- ۇساقتى 115 ارال قورشاپ جاتىر. باسىم كوپشىلىگى ادام كولەڭكەسى كورىنبەيتىن نۋ ورمان، تاۋ مەن تاس قىراتتار. جاي تاس ەمەس ءماجھۇر گرانيت. ەڭ ۇلكەنى مايە. ۇزىندىعى 27, ەنى -  12 شاقىرىم. سۇتقورەكتى جانۋارعا وتە- موتە جۇتاڭ. ادام بالاسىنا قاۋىپتى جىرقىش اڭدار كەزدەسپەيدى. تىلىمەن تىرشىكتەپ شاعاتىن ۋلى جىلان دا، ءزارلى قورقىنىشتى شايان تۇرلەرى دە جوق. ىزىلداپ شاعاتىن ماساڭىز بىزدەگىدەي ءتۇرلى كەسەل تاراتپايدى.

 سەيشەل ارالدارىنىڭ نەگىزگى باعىتى جاعاجاي دەمالىس ورىندارى. سۋى تاپ- تازا، ءمولدىر كەلەدى. تروپيكالىق تابيعات، اق مايدا قۇم، پالما، سالقىن تارتقان ءتۇرلى- ءتۇستى ءمارمار تاس جانە سۋ استى ءومىرى بارلىعى ءبىر جەردە توعىسقان. سەيشەل ارالدارىنا كەلىپ دەمالاتىن ساياحاتشىلار وتە اۋقاتتى وتباسىنان بولۋى ءتيىس. نەلىكتەن ولاي دەپ جار سالىپ تۇرعانىمدى تۇسىنگەن شىعارسىزدار. قىزمەت ءتۇرى، كوناقۇيلەر، اس ءمازىرى بارلىعى- بارلىعى قالتاڭىزعا سالماق ءتۇسىرىپ، شىعىنعا ۇشىراپ قالۋىڭىز مۇمكىن. ايتكەنمەن قالتالى، قىزىققۇمار ازاماتتار جازعى ۋاقىتتارىن وسى جەردە وتكىزگەندى ءجون كورەدى ەكەن. سەبەبى جەرگىلىكتى حالىق ءجاننات قونىسى تۋرالى ايتقاندا قىسقا قايىرادى: «قۇداي مەيىرىمىن توككەن جەر» .

 

2002 -جىلى «بيتلز» توبىنىڭ مۇشەسى بولعان پول ماككارتني بال ايىن تاپ وسىندا جاساعان. بۇل ايماق تۋريزم سالاسىمەن 1971 -جىلدان بەرى اينالىسىپ كەلەدى. جان- جاققا ارپاداي شاشىلعان ارالدار جەكە دارا ادامداردىڭ قولىنا وتكەن. قازىرگى تاڭدا فرانسيا ەلى قىزىعۋشىلىق تانىتىپ ينۆەستيسيا ءبولىپ جاتىر. سۋرەتتەرگە زەر سالىپ قاراساڭىزدار قۇيعان قارجىنىڭ دالاعا كەتپەگەندىگىن وڭاي بايقاۋعا بولادى. ارالعا كەلۋشىلەردىڭ % 80 ىنان كوبى ەۋروپا وداعىنان اعىلادى.

Massaget.kz