تاسماعامبەتوۆ رەسەيلىك ستۋدەنتتەرمەن قازاقشا سويلەستى
ەلباسى نۇرسۇلتان ءابىش ۇلى نازاربايەۆتىڭ تىكەلەي قولداۋىمەن قۇرىلعان بۇل مەكەمە وسى ۋاقىت ارالىعىندا ەكى ەل اراسىندا عانا ەمەس، جالپى رۋحانيات سالاسىنداعى ءوزىنىڭ ۇلكەن ورنى مەن ءرولىن دالەلدەدى. قازاق ءتىلى مەن مادەنيەتى ورتالىعىنىڭ 15 جىلدىق مەجەلى مەرەكەسى ەكى ەلدىڭ ىنتىماقتاستىعىنا ەلەۋلى ۇلەسىن قوسىپ وتىر.
جيىنعا كەلگەندەر الدىندا ءسوز سويلەگەن قازاقستان رەسپۋبليكاسىنىڭ رەسەي فەدەراتسياسىنداعى وكىلەتتى جانە توتەنشە ەلشىسى يمانعالي تاسماعامبەتوۆ حالىقتار اراسىنداعى مادەني قۇندىلىقتار ۇرپاقتان ۇرپاققا ءتىل ارقىلى تارايتىنىن ايتتى. «ءتىل- ەلدىگىمىزدى تانىتاتىن نەگىزگى قۇرال، بابالار وسيەتىن جالعاستىراتىن قۇندىلىق. ۇلى جازۋشى جانە فيلوسوف، نوبەل سىيلىعىنىڭ لاۋرەاتى البەر كاميۋ بىلاي ايتقان ەكەن: «ءيا، مەنىڭ تۋعان جەرىم بار. ول فرانسۋز ءتىلى» "، - دەپ ءوز ءسوزىن ساباقتادى ەلشى مىرزا.
سونداي- اق ول، يۋنەسكو ۇيىمىنىڭ مالىمەتى بويىنشا، 2030 -جىلى 20 ميلليون ادامنان كەم سويلەيتىن تىلدەر بولاشاقتا جويىلۋ ءقاۋپى بار ەكەنىن ەسكە سالىپ ءوتتى. «ءيا، تابيعاتتا ءتىل مەن مادەنيەت قانا ەمەس، بارلىعى دا جويىلۋى مۇمكىن. الايدا انا ءتىلدى ساقتاۋ، ءاربىر ادامنىڭ باستى پارىزى. ازاماتتىڭ ۇلتتىق ساناسى - ءوز تاريحىن، مادەنيەتىن بايلانىستىراتىن، ادامداردى ۇيىستىراتىن وزەگى»، - دەدى يمانعالي تاسماعامبەتوۆ.
وسى 15 جىل ىشىندە قازاق ءتىلىن مەڭگەرگەن 3 بۋىن تۇلەپ ۇشتى. ءوز كەزەگىندە، مملۋ رەكتورى يرينا كرايەۆا، وسى ۋاقىت ارالىعىندا 50 گە جۋىق ازامات قازاق ءتىلىن ءبىلىپ قانا قويماي، كاسىبي تۇرعىدا حالىقارالىق دارەجەدە كەلىسسوزدەر جۇرگىزە الاتىن مامان بولعانىن ماقتانىشپەن جەتكىزدى.
«قازاق ءتىلى كوپ مادەنيەتتى ءتىل ۇيرەنۋشىلەردىڭ ورتالىعىندا تولىققاندى مۇشەسى اتاندى» ، - دەدى رەسەي ۋنيۆەرسيتەت باسشىسى.
شارا سوڭىندا قازاقستان ەلشىسى يمانعالي تاسماعامبەتوۆ ورتالىقتىڭ ينتەراكتيۆتى تانىستىرىلىمىن كورىپ، رەسەيلىك ستۋدەنتتەرمەن قازاقشا سويلەستى.
Baq.kz