قازاقستاندا ەلباسىمەن تۇسكەن سۋرەتتەر بايقاۋى جاريالاندى
1 -جەلتوقسان - تۇڭعىش پرەزيدەنت كۇنىنە ارنالعان بايقاۋعا ەلباسىمەن بىرگە تۇسكەن فوتولار ۇستىمىزدەگى جىلدىڭ 14-30 -قاراشاسى ارالىعىندا قابىلدانادى.
بايقاۋ شارتىنا سايكەس، قاتىسۋشى ەلباسى ن. نازاربايەۆپەن تۇسكەن سۋرەتىن ءوزىنىڭ Instagram پاراقشاسىنا #ElbasyJaneMen حەشتەگىمەن جاريالاۋى ءتيىس. سونىمەن قاتار، قوعامدىق دامۋ مينيسترلىگىنىڭ @kdm.gov.kz جانە مينيسترلىككە قاراستى جاستار جانە وتباسى ىستەرى كوميتەتىنىڭ @kdms.gov، سونداي-اق، استانا قالاسىنىڭ قوعامدىق دامۋ جونىندەگى باسقارماسىنىڭ @qogamdyk_damy_astana اتتى Instagram پاراقشالارىنا تىركەلىپ، ءوز پاراقشاسىندا ولاردى بەلگىلەۋى ءتيىس.
«قاتىسۋشى ەلباسىمەن تۇسكەن سۋرەتىن جاريالاۋمەن قاتار، پرەزيدەنتپەن كەزدەسۋدەن العان اسەرىن جازۋى ءتيىس. مۇمكىن ەلباسىمەن كەزدەسۋدە قانداي دا ءبىر قىزىقتى وقيعا ورىن العان بولار نەمەسە كەزدەسۋ ونىڭ ءومىرى مەن بولاشاعىنا اسەر ەتكەن شىعار. الەۋمەتتىك جەلى بايقاۋىنا ەلىمىزدىڭ كەز كەلگەن ازاماتى جانە بارلىق وڭىردەن قاتىسا الادى، سونىمەن قاتار، جاس ەرەكشەلىگىنە ەشقانداي شەكتەۋ جوق»، - دەدى ق ر قوعامدىق دامۋ مينيسترلىگى جاستار جانە وتباسى ىستەرى كوميتەتى ءتوراعاسىنىڭ مىندەتىن اتقارۋشى اسحات ورالوۆ.
ونىڭ ايتۋىنشا، اتالعان بايقاۋ تۇڭعىش پرەزيدەنت كۇنىن اتاپ ءوتۋدى كەڭىنەن ناسيحاتتاۋدا ماڭىزدى.
«ەكىنىڭ بىرىندە ەلباسىمەن تۇسكەن سۋرەت جوق، ول كەزدە نە ىستەۋگە بولادى؟» دەگەن سۇراققا ول پرەزيدەنت قاتىسقان شارالاردا ونىمەن توپ بولىپ تۇسكەن فوتو يەلەرى دە بايقاۋعا قاتىسا الاتىنىن ايتتى.
كىمنىڭ سۋرەتى كوپ لايك جيناسا، سول ادام جۇلدەگەر اتانادى. فوتوبايقاۋ ناتيجەسى وسى جىلدىڭ 1 -جەلتوقسان كۇنى استاناداعى ءىرى ساۋدا ورتالىقتارىنىڭ بىرىندە جاريالانادى. جەڭىمپازدارعا Іphone x, Іpad جانە تاعى باسقا باعالى سىيلىقتار بەرىلەدى. ودان بولەك، ءادىلقازى القاسىنىڭ تاڭداۋىمەن ۇزدىك دەگەن 50 فوتو ارنايى كورمە گالەرەياسىنا قويىلادى.
بۇعان دەيىن حابارلاعانىمىزداي، بۇگىن استانادا جاس كوشباسشىلاردىڭ فورۋمى ءوتىپ، وندا الداعى جاستار جىلىنا ارنالعان شارالار مەن يدەيالار تالقىلانعان بولاتىن.