وبلىس اكىمى «وڭتۇستىكتەن سولتۇستىككە كوشۋ» باعدارلاماسىن ارنايى ءتۇسىندىردى

پەتروپاۆل. قازاقپارات - سولتۇستىك قازاقستان وبلىسىنىڭ اكىمى قۇمار اقساقالوۆ «وڭتۇستىكتەن سولتۇستىككە كوشۋ» باعدارلاماسىن ءتۇسىندىرۋ ماقساتىندا شىمكەنتكە ارنايى كەلدى، دەپ حابارلايدى قازاقپارات.

«وڭتۇستىكتەن سولتۇستىككە كوشۋ» باعدارلاماسى 2013 -جىلى قابىلدانعان «جۇمىسپەن قامتۋ 2020 جول كارتاسى» باعدارلاماسى نەگىزىندە جۇزەگە اسىرىلىپ جاتىر. ماقسات - سولتۇستىك پەن شىعىستاعى جۇمىس كۇشى تاپشى ايماقتارعا وڭتۇستىكتەگى «جۇمىس كۇشى ارتىق» وبلىستاردان حالىقتى كوشىرۋ.

باعدارلاما بۇگىندە قارقىندى جۇزەگە اسۋدا. رەسپۋبليكانىڭ سولتۇستىك وبلىستارىنا ءوز ەركىمەن بارعىسى كەلەتىندەرگە مەملەكەتتەن سۋبسيديا، ودان بولەك كوپتەگەن جەڭىلدىكتەر قاراستىرىلعان. باعدارلامانىڭ حالىق ءۇشىن وڭتايلى تۇستارىن تۇسىندىرۋگە ارنايى كەلگەن س ق و اكىمى قۇمار اقساقالوۆ شىمكەنت اكىمى عابيدۋللا ابدىراحىموۆپەن جانە قالا تۇرعىندارىمەن كەزدەستى.

2016 -جىلى ەلىمىزدىڭ وزگە وڭىرلەرىنەن سولتۇستىك قازاقستان وبلىسىنا 125 وتباسى - 546 ازامات قونىس اۋداردى. ولارعا 63 ەلدى مەكەننەن باسپانا بەرىلىپ، ەڭبەككە جارامدى ازاماتتار جۇمىسپەن قامتىلدى. ال، بىلتىر  قىزىلجار وڭىرىنە 376 ازامات نەمەسە 81 وتباسى كوشىپ كەلدى. بيىل جىل باسىنان بەرى 196 وتباسى، ياعني، 682 تۇرعىن وڭتۇستىكتەن سولتۇستىككە قونىس اۋداردى.

«ءبىراز ادام كوشىپ كەلدى. ول جاققا بارساڭىزدار ءبىراز اعايىندارىڭىزدى تاباسىزدار. بيزنەستەرىن اشقان ازاماتتار، جەتىستىككە جەتكەن ازاماتتار از ەمەس. ۇكىمەت بەرىپ وتىرعان مۇمكىندىكتى جاقسى پايدالانىپ، بيزنەستەرىن اشتى. كەيبىر ماسەلەلەر بار، ارينە، كەپىلدىك جونىندە، نەسيەلەۋ جونىندە. ول ماسەلەنى شەشۋدىڭ مەحانيزمىن تابۋعا بولادى»، دەدى شىمكەنتتىكتەرمەن كەزدەسكەن س ق و اكىمى قۇمار اقساقالوۆ.

تۇركىستان وبلىسىنان بيىل قونىس اۋدارعان 263 وتباسىنىڭ 63 ى قوستاناي وبلىسىنا، 50 وتباسى شىعىس قازاقستانعا قونىس اۋدارسا، 43 جانۇيا سولتۇستىك قازاقستاندى تاڭداعان. 107 وتباسى پاۆلودار وبلىسىندا ءتۇتىن تۇتەتىپ جاتىر.

«قازاقستان - ءبىزدىڭ كەڭ بايتاق جەرىمىز. ءاربىر شارشى مەترى - ول ءبىزدىڭ جەرىمىز. ەلباسىمىز دا ايتتى عوي، حالىق موبيلدى بولۋى كەرەك. امەريكادا دا نيۋ-يوركتا تۇرىپ، سان-فرانسيسكوعا بارىپ، جۇمىستى قاتىناپ ىستەيدى. سولتۇستىك قازاقستاندا جەر وتە قۇنارلى، اۋىل شارۋاشىلىعىندا جۇرگەن ءبىزدىڭ ءبىراز ازاماتتار بارىپ، جەر السا، كارتوپ ەگىپ، باسقا نارسەلەردى ەگىپ، مال اسىراۋعا جاعداي جاسالاتىن بولسا، ول جاققا بارام دەگەن ازاماتتار كوپ بولادى»، - دەيدى شىمكەنت قالاسىنىڭ اكىمى عابيدۋللا ءابدىراحىموۆ.

مامانداردىڭ ەسەبىنشە، سولتۇستىك قازاقستان وبلىسىندا 1031 بوس جۇمىس ورنى بار. وزگە وڭىردەن تەرىسكەيگە قونىس اۋدارعانداردى 224 ەلدىمەكەن قابىلداي الادى.

«ءبىز - اگرارلى ءوڭىرمىز. سوندىقتان ەكونوميكانىڭ نەگىزگى سالاسى - اۋىل شارۋاشىلىعى. قازىر وبلىستا جاڭا تەحنيكا وتە كوپ، 1 كومبايىن شامامەن 100 ميلليون تەڭگە تۇرادى، سەبۋ كەشەنى بار تراكتوردىڭ قۇنى - 30 مىڭ ا ق ش دوللارى. سول سەبەپتى، اۋىل شارۋاشىلىعىندا ەڭبەك ەتكىسى كەلگەن ادامنىڭ دايىندىعى بولۋ كەرەك. بۇگىندە اۋىل شارۋاشىلىعى ءونىمىن وندىرۋشىلەر جۇمىس ىستەۋگە كەلگەن ادامنىڭ بۇگىن ىستەپ، ەرتەڭ كەتىپ قالمايتىنىنا سەنىمدى بولعىسى كەلەدى. بىزگە ۋاقىتشا قونىس اۋدارۋشىلار ەمەس، تۇراقتى تۇرعىندار كەرەك»، - دەيدى س ق و قۇمار اقساقالوۆ.

قىزىلجار وڭىرىنە وزگە وبلىستاردان قونىس اۋدارعان وتباسىلارعا مەيىلىنشە كومەك كورسەتىلىپ كەلەدى. ولاردىڭ جولاقىسى تولىقتاي وتەلىپ، ءۇي-جايمەن، جۇمىسپەن قامتىلۋدا. سونداي-اق، وتباسىنىڭ ءار مۇشەسىنە 35 ەسەپتىك ايلىق مولشەرىندە كوتەرمەاقى تولەنىپ جاتىر.