وڭتۇستىكتە تۇرمىستىق زورلىق-زومبىلىق ءورشىپ تۇر
بۇل تۋرالى ق ر باس پروكۋرورىنىڭ اسا ماڭىزدى تاپسىرمالار جونىندەگى اعا كومەكشىسى سالتانات تۇرسىنبەكوۆا ايتتى، دەپ حابارلايدى قازاقپارات ءتىلشىسى.
«بۇگىن حالىق ءۇشىن اسا ماڭىزدى ماسەلەلەردىڭ ءبىرى - تۇرمىستىق زورلىق-زومبىلىقتىڭ الدىن الۋ جايىن قارايمىز. وڭتۇستىك قازاقستاننىڭ، ال بۇگىنگى شىمكەنت قالاسى مەن تۇركىستان وبلىسىنىڭ اۋماعىندا سوڭعى 2 جىلدا جۇرگىزىلگەن «وتباسىنداعى زورلىق-زومبىلىقسىز قازاقستان» جوباسىنىڭ قورىتىندىسىن تالقىلايمىز»، - دەدى ول ق ر پرەزيدەنتى جانىنداعى ايەلدەر ىستەرى جانە وتباسى-دەموگرافيالىق ساياسات جونىندەگى ۇلتتىق كوميسسيا وتىرىسى اياسىندا ب ا ق وكىلدەرىنە بەرگەن سۇحباتىندا.
ونىڭ ايتۋىنشا، جوبانىڭ باستى ماقساتى - وتباسىلىق-تۇرمىستىق سالادا ورىن الاتىن قۇقىق بۇزۋشىلىقتاردىڭ سانىن بارىنشا تومەندەتۋ بولعان. بۇگىندە جوبا اياسىندا ناقتى جەتىستىكتەر دە بار دەۋگە بولادى. دەگەنمەن، وڭتۇستىك وڭىردە تۇرمىستىق زورلىق-زومبىلىقتىڭ ءوسىپ وتىرعانىن دا اتاپ وتكەن ءجون.
«وكىنىشكە قاراي، بۇگىنگى كۇنى وڭتۇستىك قازاقستاندا وتباسى-تۇرمىستىق سالاداعى قۇقىق بۇزۋشىلىقتىڭ سانى 280 پايىزعا ارتىپ وتىر. ءبىر جاعىنان بۇل جوبامىزدىڭ ارقاسىندا ادامداردىڭ ءۇنسىز قالماي، جۇگىنۋگە بەت العانىن كورسەتەدى. ياعني، بۇل سالاداعى اعارتۋشىلىق جۇمىستاردىڭ ناتيجەسىندە حالىق تۇرمىستىق زورلىق-زومبىلىق فاكتىلەرىن ايتىپ، ءجيى جۇگىنە باستادى. مۇنداي جوبانىڭ العاشقى ناتيجەسى - بارلىق ۋاقىتتا دا قۇقىق بۇزۋشىلىقتىڭ ارتۋى. قازىر مۇنداي فاكتىلەردى كوپتەپ انىقتالا باستادى. دەگەنمەن، بۇل جۇمىستى بايالاتۋ كەرەك دەگەن ءسوز ەمەس»، - دەدى سالتانات تۇرسىنبەكوۆا.