قازىر سپورت دەگەنىڭىز شوۋعا اينالىپ بارادى - ارىستانبەك مۇحامەدي ۇلى
بۇل سۇراق ارىستانبەك مۇحامەدي ۇلى مەن مۇحتارحان دىلدابەكوۆتىڭ بۇگىنگى كەزدەسۋىندە دە كوتەرىلدى، دەپ حابارلايدى قازاقپارات ءتىلشىسى.
«كوكپاردىڭ قازاندىعى تۋرالى ايتىپ جاتىرمىز عوي. قازاندىققا سالۋ نەمەسە سالماۋ تۋرالى كوكپار وينايتىن ءار مەملەكەتتىڭ ءوز ەرەجەسى بار. كوكپار عانا ەمەس، ءار سپورتتىڭ وزىندىك قاتەرى بار ەكەنىن ەسكەرۋ كەرەك. شاڭعى بولسىن، بيىككە سەكىرۋ بولسىن - ءار سپورتتا قاۋىپ از ەمەس. سوندىقتان، مەنىڭ ويىمشا، ەگەر قازاندىققا سالۋ تۋرالى شەشىم شىعىپ جاتسا، ونى تراگەديا قىلۋدىڭ قاجەتى جوق»، - دەدى ارىستانبەك مۇحامەدي ۇلى «كوكپار» فەدەراتسياسىنىڭ پرەزيدەنتى مۇحتارحان دىلدابەكوۆپەن كەزدەسۋ بارىسىندا.
ءمينيستردىڭ ايتۋىنا قاراعاندا، ءبىر كەزدەرى جابىق وتەتىن م م ا سايىستارى قازىر ۇلكەن چەمپيوناتتارعا ۇلاسىپ كەتكەن.
«بىلاي قاراساڭىز، توكيودان كەيىن م م ا وليمپيادا سپورت تۇرلەرىنىڭ قاتارىنا دا كىرۋى مۇمكىن. قازىر سپورت شوۋ بولىپ بارا جاتىر. بۇرىن تەلەديداردا مۋزىكالىق ارنالار كوپ ەدى، قازىر كوبىسى سپورتقا قىزىعادى. بۇگىنگى تاڭدا سپورتتىڭ بارلىق تۇرلەرىن حالىققا قىزىقتى ەتۋ ءۇشىن كۇردەلى دۇنيەلەر جاساپ جاتىر. سوندىقتان، حالىقارالىق قاۋىمداستىقپەن كەلىسىپ، العا جىلجۋ كەرەك»، - دەدى مينيستر.
ەسكە سالا كەتسەك، بۇگىن ق ر مادەنيەت جانە سپورت ءمينيسترى ارىستانبەك مۇحامەدي ۇلى «كوكپار» فەدەراتسياسىنىڭ پرەزيدەنتى مۇحتارحان دىلدابەكوۆتى قابىلداپ، كەزدەسۋ بارىسىندا كوكپاردىڭ كەلەشەگى، الداعى جارىستارعا دايىندىق ماسەلەسىن تالقىلاعان بولاتىن.