شەتەلدە تۇراتىن قانداستار قازاقستاندا ەش قيىندىقسىز جۇمىس ىستەي الادى

 استانا. قازاقپارات - شەتەلدە ءومىر سۇرەتىن ەتنيكالىق قازاقتارعا رۇقسات قۇجاتتارىنسىز قازاقستان اۋماعىندا جۇمىس ىستەۋ مۇمكىندىگى بەرىلمەك.

بۇل تۋرالى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيانىڭ كەزەكتى وتىرىسىندا ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى نۇرجان التايەۆ ءمالىم ەتتى، دەپ حابارلايدى قازاقپارات ءتىلشىسى.

اتاپ ايتقاندا، كوميسسيا وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كوشى- قون پروتسەستەرىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تۇجىرىمداماسى قاراستىرىلدى.

«شەتەلدە تۇراتىن ەتنيكالىق قازاقتارعا ءتيىستى رۇقساتسىز قازاقستان رەسپۋبليكاسىندا ۋاقىتشا ەڭبەك ەتۋ مۇمكىندىگىن بەرۋ ۇسىنىلادى. ورالماندار مەن قونىس اۋدارۋشىلاردى قابىلداۋدىڭ وڭىرلىك كۆوتاسىن انىقتاۋ بويىنشا قۇزىرەتتى قايتا ءبولىپ، بۇل قىزمەتتى ميگراتسيا ماسەلەلەرى بويىنشا وكىلەتتى ورگانعا بەكىتۋ ەسكەرىلگەن. قازىرگى كەزدە وسى قۇزىرەت ۇكىمەتكە تيەسىلى» ، - دەدى ۆيتسە- مينيستر.

ەڭبەك مينيسترلىگى ورالمان مارتەبەسىنە قاراماستان، ەتنيكالىق قازاقتارعا جەڭىلدەتىلگەن تارتىپتە ق ر ازاماتتىعىن بەرۋ قۇقىعىن ەسكەرۋدى ۇسىنىپ وتىر.

«ەتنيكالىق قازاقتار نيەت بىلدىرسە، تۇراقتى قونىستانۋعا جانە قازاقستان ازاماتتىعىن يەلەنۋگە رۇقساتتى الۋعا ونىڭ ءوتىنىش حاتىن قاتار قاراستىرۋ مۇمكىندىگى ۇسىنىلادى. بۇگىندە ادامدار ءدال سول پاكەتپەن وكىلەتتى مەمورگاندارعا ەكى رەت بارۋى ءتيىس» ، - دەدى ول.

سونىمەن قاتار، ۆەدومستۆو ورالمان مارتەبەسىن نەمەسە تۇراقتى قونىستانۋعا رۇقسات پەن ق ر ازاماتتىعىن الۋعا ۇمىتكەر ادامداردىڭ ۇلتىن انىقتاۋ تەتىگىن قايتا قاراستىرۋدى ۇسىنىپ وتىر.