دەنيس ەكەۋمىز بىرگە ونەر كورسەتۋدى ارمانداعان ەدىك - ديماش قۇدايبەرگەن

استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلىمەن كەزدەسۋ بارىسىندا ديماش قۇدايبەرگەن استانادا دەنيس تەننىڭ كورمەسىن ۇيىمداستىرعان جاندارعا العىسىن ءبىلدىردى، دەپ حابارلايدى قازاقپارات ءتىلشىسى.

«دەنيس تەن - قازاقتىڭ ەشقاشان سونبەيتىن جارىق جۇلدىزى. تۇندەلەتىپ قازاقستانعا كەلىپ، دەنيس تەننىڭ كورمەسىن وتكىزىپ جاتقان جاندارعا العىسىمدى بىلدىرەيىن دەپ، كورمەگە باردىم. ەشكىم جوق كەزدە وزىممەن ءوزىم كورمەدە وتكەن- كەتكەندى ەسكە الدىم. دەنيستى ماقتاۋدىڭ ءوزى ارتىق. سىزدەر ونى كەرەمەت سپورتشى، دارىن يەسى رەتىندە بىلەسىزدەر، ال مەن ونى دوس تۇتتىم. ءبىز ەتەنە ارالاسىپ، سوڭعى جىلدارى جاقىن دوس بولدىق. دەنيستىڭ كىشىپەيىلدىگى ۇنايدى ماعان. وتە قاراپايىم ەدى. جالپى، بيىك بەلەستەردى باعىندىرعان ادامدار تاكاپپارلىق تانىتىپ، پەندەشىلىككە بوي الدىرادى عوي. دەنيستىڭ بويىنان وندايدى ەشقاشان كورمەدىم» ، - دەدى ديماش قۇدايبەرگەن.

ءانشى دەنيسپەن بىرگە جۇرگەن كەزدە دوستار اراسىندا «وليمپيادا چەمپيونى بىزبەن بىرگە قاراپايىم جەردە تاماق ىشە مە؟ » دەپ ازىلدەيتىنىن ەسكە الدى.

«كەيدە تۇندە دالاعا شىعىپ، ەڭ ارزان ءبىر جەرگە بارا سالاتىنبىز. ونىڭ ءاربىر ايتقان ءسوزى، جاساعان ەڭبەگى قازاقتىڭ، ەلىنىڭ مارتەبەسى ءۇشىن ەدى. ويتكەنى، وزدەرىڭىز ويلاپ قاراساڭىزدار، ول قازاقتىڭ تاريحىندا بولماعان جەتىستىكتەرگە جەتتى. ەل اتىنان وسىنداي ازاماتتار بار ەكەنىن دالەلدەۋ ءۇشىن، مانەرلەپ سىرعاناۋدان قازاقتار دا الەم چەمپيونى اتانا الاتىنىن دالەلدەۋ ءۇشىن شەتەلدە ءبىلىم الدى. الداعى ۋاقىتتا كەيىن قازاقستاندا وسى جۇيەنى قولعا الىپ، شاكىرت تاربيەلەسەم دەپ ارماندادى. مەنىڭ كەلەسى كونسەرتىمدە ەكەۋمىز بەيجىڭدە نەمەسە باسقا ەلدە ۇلكەن ستاديوندا كونسەرت بەرىپ، «S.О.S» انىمەن تاندەمدە شىعامىز دەپ ارماعانداعان بولاتىنبىز. ەندى لوندوندا ول ءاندى مەن ءوزىم عانا ورىندايمىن» ، - دەدى ديماش قۇدايبەرگەن.

ەسكە سالا كەتسەك، 10 - قاراشادا استاناداعى «MEGA Silk Way» ساۋدا، ويىن- ساۋىق ورتالىعىندا قازاقستاندىق مانەرلەپ سىرعاناۋشى دەنيس تەنگە ارنالعان «D10 WORLD» كورمەسى اشىلعان بولاتىن.