عيبرات: قوس باقانىڭ قيسساسى

 استانا. قازاقپارات - ءبىر توپ باقا قورەك ىزدەپ ورمان ىشىندە تارباڭداپ كەلە جاتادى.

كەنەت، قاپتالداس كەلە جاتقان ەكى باقا تەرەڭ شۇڭقىرعا بايقاۋسىزدا قۇلاپ كەتەدى.

مۇنى بايقاعان قالىڭ باقا شۋلاسقان كۇيى شۇڭقىردىڭ ەرنەۋىن جاعالاپ، جيىلا قالادى.

شۇڭقىر تەرەڭدىگىن كورگەن ولار بىردەن جولداستارىنىڭ امان شىعۋىنان كۇدەر ءۇزىپ، ەكەۋىنە باسۋ ايتا باستايدى.

تومەندەگى قوس باقا قاتتى قورىققاننان قاپتاعان شۋىلعا قۇلاق سالماي، بار كۇشتەرىن سالىپ شۇڭقىردان شىعۋعا تىربانىپ باعىپ جاتىر. جوعارىداعى كوپشىلىك ەكەۋىنىڭ بوس ارامتەر بولىپ جاتقانىنا جاندارى اشىپ «اقىلدارىن» جامىراسا ايتىپ، توقتار ەمەس.

ءبىر كەزدە ەكەۋدىڭ ءبىرى سەكىرۋىن دوعارىپ، كوپتىڭ سوزىنە قۇلاق قويدى. سول- اق ەكەن بىردەن بويىن ۇمىتسىزدىك بيلەپ، سالى سۋعا كەتتى دە تارباڭ ەتىپ ءتورت اياعىن جوعارى كوتەرگەن كۇيى ءولدى دە قالدى. ال ەكىنشى باقا وعان ءمان بەرگەن جوق. سەكىرۋىن دە توقتاتقان جوق.

 ال ەرنەۋدەگى باقالاردىڭ باقىلداعان ايقايى ودان ارى ۇدەپ كەتتى. «جانىڭدى قيناما!»، «ولىمگە مويىنسۇنساڭشى!»، «بولدى عوي، ەندى!»، - دەگەن «جاناشىر» سوزدەر ءار جەردەن ەستىلىپ جاتىر.

تەرەڭدەگى باقا سەكىرۋىن ارتتىرا ءتۇستى. بويىنداعى بار كۇشىن جيىپ، سوڭعى رەت ىشقىنىپ ەدى شۇڭقىر اۋزىنا كەلىپ ىلىكتى. ودان ارى ءبىر اق سەكىرىپ سىرتقا شىعىپ كەتتى.

مىنا ەرلىككە قاتتى تاڭقالعان قالىڭ باقا مۇنى قاۋمالاپ قورشاپ الدى. «سەن ءبىزدىڭ ايقايىمىزدى ەستىمەدىڭ بە؟»، - دەپ جاتىر. ول بولسا: «مەنىڭ قۇلاعىمنىڭ مۇكىستىگى بار ەدى. تار جەردە مۇلدە ەستىمەي قالامىن. باعانا، شۇڭقىر ىشىندە بولعاندا ۇزاق ۋاقىت بويى سەندەر مەنى ءومىر ءۇشىن كۇرەسۋگە جىگەرلەندىرىپ شۋلاعان بولارسىڭدار دەپ ويلادىم»، - دەگەن ەكەن.

عيبراتتى مىسالدىڭ ءۇش ءتۇرلى ساباعى بار:

 1. ءولىم مەن ءومىردىڭ كۇشى تىلدە جاسىرىنعان. قۋاتتاندىرىپ، جىگەرلەندىرۋشى ءسوز تومەندەگىنى جوعارىعا كوتەرەدى. ماقساتقا جەتۋگە جول اشىپ، ءۇمىتتى وياتادى.

 2. تۇقىرتىپ، ءۇمىت ساۋلەسىن وشىرەتىن ءسوز تومەندەگىنى ءولتىرىپ تىنادى. سول ءۇشىن اۋىزدان شىققان سوزگە اباي بول!

3. اقىلىڭمەن شەشىپ، دۇرىس دەپ تاپقان ءىسىڭدى جۇزەگە اسىرا الاسىڭ. وزگەلەردىڭ وي- پىكىرى ۇمىتسىزدىككە ۇرىندىرماسىن.

 دەرەككوزى: "پ ت" توپتاماسىنان