شىعىس قازاقستاندا اڭشىلار مالعا شاپقان «قارا قاسقىر» اتىپ الدى
اۋەلى اۋىل ماڭىن قارا قاسقىر ءۇيىرى تورۋىلداپ جۇرگەنى تۋرالى اقپارات تاراعان. ونداي اڭگىمەنىڭ تۋىنداۋىنا تايلان قىستاعىندا وتىرعان بىرنەشە ءۇيدىڭ مالى كۇندە شىعىنعا ۇشىراۋى سەبەپ بولعان. ءتۇز تاعىلارى ءتىپتى اۋلاداعى ازىن- اۋلاق قاز بەن تاۋىققا دا اۋىز سالا باستاعان. العاشىندا قىستاق تۇرعىندارى مۇنى ءوز يتتەرىنەن كورىپ، بىرنەشەۋىن اتىپ تا كورەدى. كەيىن «باۋكەسپەلەر» «قىلمىس ۇستىندە» كوزگە تۇسەدى. قارا قاسقىردى تەك كينودان عانا كورەتىن قىستاق تۇرعىندارى تاعىلارعا قارسى ەشقانداي ارەكەت جاساي الماعان. العاشقى اياز تۇسكەندە قارا قاسقىرلار ودان بەتەر قۇتىرىپ، شوپاننىڭ كوزىنشە قويعا شاپقان. اقىرى مالشىلار سارجالداعى ءسالىم اكىمبايەۆ باستاعان اڭشىلاردان كومەك سۇرايدى.
«ەلدىڭ قارا قاسقىر دەپ جۇرگەنى يت پەن كوكبورىنىڭ شاتىسىنان تۋعان بۋدان بولىپ شىقتى. قاسقىر ءبىر رەت مال العان جەرىنە ايلاپ شاپپايدى. ال بۇلار كۇن سايىن قىرعىن سالعان. داۋرەن مايقانوۆ، ازامات جانە جانپەيىس ىبىرايەۆ سياقتى تۇرعىنداردىڭ بىرنەشە باس قويىن تاماقتاپ، سيىرىن تارتىپ كەتكەن ەكەن. ادامنىڭ كوزىنشە مالعا شابۋ دا سيرەك كەزدەسەتىن جاعداي. اڭشىلىق تاجىريبەمدە ءبىرىنشى رەت بۋدان اتىپ تۇرمىن» - دەيدى ءسالىم اكىمبايەۆ.
اڭشىلار بۋدان ۇيىردەن 5 قاسقىردى وققا بايلاپ ۇلگەرىپتى. تەك بىرەۋى عانا امان قۇتىلعان.
«قىستاق مالشىلارى كومەك سۇراعان سوڭ. ءوز كولىگىمىزبەن شىعىپ، ءۇيىردىڭ ىزىنە تۇستىك. ءبىرىنشى كۇنى تەك بىرەۋىن عانا اتتىق. قالعاندارى قاراعاننىڭ اراسىنا تاسالاپ، اتقىزبادى. ەكىنشى كۇن ولجالى بولىپ، 4 قاسقىر الدىق. مالشىلار دا ريزا. اياز تۇسپەي جاتىپ بۇلايشا ەركىنسىگەن قاسقىرلار ەندى كەشىكسەك، بۇدان كوپ شىعىن كەلتىرۋى مۇمكىن عوي» - دەيدى اڭشى.
وبلىس بويىنشا قاسقىر اتۋعا بەرىلگەن ليميت ۋاقىتى 31- جەلتوقسانعا دەيىن جالعاسادى.
«بيىل شىعىس قازاقستان بويىنشا 415 قاسقىرعا ليميت بار. ءبىر ادام 3 قاسقىر اتا الادى. ودان اسسا، زاڭبۇزۋشىلىق دەپ سانالادى» - دەيدى وبلىستىق ورمان جانە جانۋارلار دۇنيەسىن قورعاۋ جونىندەگى باسقارما مامانى سامات ديداحماتەوۆ.
اۆتور: ەسىمجان ناقتىباي