قازاقستاندا ديابەتپەن اۋىراتىندار سانى ارتتى
بۇل تۋرالى الەۋمەتتىك مەديتسينالىق ساقتاندىرۋ قورى الماتى فيليالىنىڭ وكىلدەرى ايتتى، دەپ حابارلايدى قازاقپارات ءتىلشىسى.
فيليال ديرەكتورى تىلەۋحان ابىلدايەۆتىڭ ايتۋىنشا، قازاقستاندا ديابەتتەن زارداپ شەگەتىندەردىڭ سانى 2013-جىلى 208 مىڭ شاماسىندا بولسا، بۇگىنگى تاڭدا 309 مىڭعا جەتىپ وتىر.
«دۇنيەجۇزىلىك دەنساۋلىق ساقتاۋ ۇيىمىنىڭ ستاتيستيكاسىنا سۇيەنسەك، ديابەتپەن اۋىراتىندار سانى بۇكىل الەمدە ارتىپ وتىر. 1980-جىلى 108 ميلليون بولسا، 2014-جىلعا كەلىپ بۇل كورسەتكىش 422 ميلليونعا جەتكەن»، - دەيدى ول.
ديابەتپەن اۋىراتىن قازاقستاندىقتاردىڭ كوپشىلىگى (291 مىڭ ادام) ونىڭ ەكىنشى تيپىنەن زارداپ شەگەدى. حالىقارالىق مامانداردىڭ پىكىرىنشە، بۇعان قازىرگى ادامداردىڭ مول كالوريالى تاماق جەپ، از قيمىلداۋى سەبەپ بولىپ وتىر.
قازاقستاندا ديابەتتەن ەمدەۋ تەگىن. ول مەملەكەت كەپىلدەيتىن مەديتسينالىق كومەكتەر قاتارىنا كىرەدى. جاڭا مودەل ەنگىزىلۋىنە بايلانىستى، قازىرگى پاسسيۆتىك ديسپانسەرلەۋ ساياساتى بەلسەندى ديناميكالىق باقىلاۋمەن الماستىرىلادى.
«سونىمەن قاتار، دياگنوستيكالىق قىزمەتتەردىڭ، ماماندار قىزمەتتەرىنىڭ قاجەتتى بازالىق كولەمى بەرىلەدى، دارىلىك قۇرالدارمەن امبۋلاتورلىق نەگىزدە تەگىن قامتاماسىز ەتۋدىڭ قازىرگى كەپىلدەرى ساقتالادى»، - دەدى ت. ابىلدايەۆ.
قازىرگى كەزدە مەملەكەت كەپىلدەيتىن مەديتسينالىق كومەكتەر اياسىندا 48 ءدارى-دارمەك جانە مەديتسينالىق ونىمدەر، سونىڭ ىشىندە شپريتستەر، تەست-جولاقتار، گليۋكامەترلەر، ينسۋلين سورعىلارى، ينسۋليننىڭ 22 ءتۇرى بەرىلەدى.