ەكسپو مۇراسى جەمىسىن بەردى - ابايەۆ استانا حاب پەن ا ح ق و بيرجاسى جايلى

استانا. قازاقپارات - ق ر اقپارات جانە كوممۋنيكاتسيالار ءمينيسترى داۋرەن ابايەۆ سوڭعى جەتى كۇننىڭ ىشىندەگى ەل ەسىندە قالعان ماڭىزدى جاڭالىقتاردى اتادى، دەپ حابارلايدى قازاقپارات ءتىلشىسى.

«رۇقسات ەتسەڭىزدەر، ەل ىشىندە شىنىمەن مەنى قىزىقتىرعان بىرنەشە اقپاراتتى اتايىن. بىرىنشىدەن، مەملەكەت باسشىسى «استانا» حالىقارالىق قارجى ورتالىعى بيرجاسىنىڭ العاشقى ساۋدا-ساتتىعىن ىسكە قوستى. ءبىزدىڭ مەملەكەت ءۇشىن بۇل العا جاسالعان اسا ۇلكەن قادام. بۇل رەتتە ەكسپو مۇراسى ءوزىنىڭ جەمىسىن ءالى دە بەرىپ جاتقانى قۋانتادى. اپتا بۇرىن عانا ءبىز بۇل جەردە «استانا حابىنىڭ» اشىلعانىن ايتىپ وتىرعان ەدىك. ال ەندى كورمەنىڭ ينفراقۇرىلىمى وزىندىك بيرجامىزدى اشۋعا مۇمىندىك بەرىپ وتىر»، - دەدى داۋرەن ابايەۆ.

مينيستر ەكىنشى ەستە قالعان ماڭىزدى جاڭالىق - پرەزيدەنتتىڭ كەلەسى جىلدى جاستار جىلى ەتىپ بەكىتۋى ەكەنىن اتاپ ءوتتى.

«بۇگىنگى تاڭدا ەلىمىزدەگى حالىقتىڭ 30 پايىزى جاستار ەكەنىن بىلەسىزدەر. جاستار - ءبىزدىڭ ەكونوميكالىق دامۋىمىزدىڭ باستى قوزعاۋشى كۇشى. پرەزيدەنت قول قويعان قۇجات - جاستار ساياساتىن العا جىلجىتۋدا ۇلكەن سەرپىن بەرەرى انىق. ءۇشىنشىسى - لاتىن الىپبيىندە وتكىزىلگەن جالپى حالىقتىڭ ديكتانت. ەلەستەتە بەرىڭىز، وعان 2 ميلليونعا جۋىق قازاقستاندىق قاتىستى. ولاردىڭ اراسىندا مادەنيەت جانە قوعام قايراتكەرلەرى، بەلسەندىلەر، جۋرناليستەر مەن فيلولوگتار، ستۋدەنتتەر، وقۋشىلار بولدى. مەنىڭ ويىمشا، بۇل ديكتانت - تاريحىمىزداعى ەڭ اۋقىمدى قازاقستاندىق فلەشموب بولدى. بۇل - تەك يميدجدىك اكسيا عانا ەمەس، جاڭا ءالىپبيدى ەنگىزۋدەگى جۇيەلى جۇمىستاردىڭ ءبىر بولىگى. سونىمەن بىرگە لاتىن الىپبيىندەگى «ءتىل قازىنا» اتتى جاڭا گازەت اشىلدى. بۇنىڭ ءبارى دە - مەملەكەت پەن قوعامنىڭ بىرلەسكەن جۇمىسىنىڭ جەمىسى. بۇل جەردە البەتتە، مادەنيەت جانە سپورت مينيسترلىگى اتقارىپ وتىرعان جۇمىستى ەرەكشە اتاپ ءوتۋىمىز كەرەك»، - دەدى داۋرەن ابايەۆ.