ەۋروپا ليگاسى: قازاقستان قۇراماسى لاتۆيامەن تەڭ ءتۇستى

استانا. قازاقپارات - بۇگىن ەۋروپا قۇرلىعىندا ۇلتتار ليگاسى توپتىق كەزەڭىنىڭ بەسىنشى تۋر ويىندارى باستالدى.

اتالمىش باسەكەدە د ليگاسى ءبىرىنشى توپتا سىنعا ءتۇسىپ جاتقان قازاقستان قۇراماسى ءوز الاڭىندا لاتۆيامەن شەبەرلىك بايقاستى، دەپ حابارلايدى قازاقپارات ءتىلشىسى.

توپتىق كەزەڭدەگى قۇرامالار جاعدايى تۋرالى بۇدان بۇرىن حابارلاعان ەدىك. قوس قۇرامانىڭ دا ەكىنشى ورىن مۇمكىندىگى بار بولاتىن. بۇگىنگى ويىن سول ساۋالدىڭ جاۋابىن شەشەدى. سول سەبەپتى ەكى قۇراما دا بۇل ويىندا تارتىستى باسەكە وتكىزەتىنى بەلگىلى ەدى.

ۇلتتىق قۇرامالار 13- قازاندا لاتۆيادا ءبىر ويىن وتكىزگەن ەدى. كەزدەسۋ 1:1 ەسەبىمەن اياقتالدى. ودان كەيىن ءبىزدىڭ جىگىتتەر ءوز الاڭىندا اندوررانى 4:0 ەسەبىمەن ويسىراتا جەڭدى. ال لاتۆيا ءوز الاڭىندا گرۋزيادان 0:3 ەسەبىمەن ءسۇرىندى.

قازاقستان قۇراماسىنىڭ باس باپكەرى ستانيمير ستويلوۆ العاشقى مينۋتتان نەگىزگى قۇرامعا نەناد ەريچ، عافۋرجان سۇيىمبايەۆ، سەرگەي مالىي، يۋري لوگۆينەنكو، ابزال بەيسەبەكوۆ، گەورگي جۋكوۆ، باۋىرجان يسلامحان، سەرىكجان مۋجيكوۆ، باحتيەر زاينۋتدينوۆ، رومان مۋرتازايەۆ، باۋىرجان تۇرىسبەكتەردى قوستى. ال لاتۆيا قۇراماسى ساپىندا اندريس ۆانين، ۆلاديسلاۆ گابوۆ، كاسپارس دۋبرا، ۆيتالي ياگودينسكي، ۆيتالي ماكسيمەنكو، يگور تاراسوۆ، اندرەي تسيگانيك، ۆياچەسلاۆ يسايەۆ، دەنيس راكەل، ارتۋر كاراشاۋسكس، ۆالەري شابالا شىقتى.

كەزدەسۋ ءبىزدىڭ قۇراما باسىمدىعىمەن باستالدى. ولاردىڭ دەنى قاقپا تورىندا تۋلاپ جاتسا، كەزدەسۋ قازاقستاننىڭ ءىرى جەڭىسىمەن اياقتالار ەدى. دەگەنمەن قازاقستاندىق فۋتبولشىلار ول مۇمكىندىكتەردى ءوز پايداسىنا جاراتا العان جوق. قۇراما كاپيتانى مىندەتىن اتقارعان باۋىرجان يسلامحاننىڭ ءوزى گول سوعاتىن ساتتەردە مەرگەندىك كورسەتە العان جوق.

الداعى ويىنشىلارعا قورعاۋشىلار دا كومەككە كەلىپ جاتتى. وڭتايلى ساتتەردە ولار دا قارسىلاستار قاقپاشىسىن قاپى قالدىرۋ جولدارىن ىزدەدى. ۇلتتىق قۇراما مەن الماتىنىڭ «قايرات» كومانداسىندا سول قاناتتا وينايتىن عافرجان سۇيىمبايەۆ 37-مينۋتتا مەرگەندىك تانىتتى. قورعاۋشىنىڭ الىستان تەپكەن دوبى قاقپا تورىنا ءتۇستى. بۇدان كەيىن قوس قۇراما گول سوعاتىن مۇمكىندىكتەر ىزدەدى. ءبىرىنشى كەزەڭدى 1:0 ەسەبىمەن قازاقستان جەڭىسپەن اياقتادى.

ەكىنشى كەزەڭ باستالا سالىسىمەن لاتۆيا تارازى باسىن تەڭەستىرۋگە ۇمتىلدى. كوزدەگەن ماقساتىنا دا جەتتى. لاتۆيا قۇراماسى ساپىنان 49-مينۋتتا دەنيس راكەل گول سوقتى. وسىلايشا تارازى باسى تەڭەستى. بۇدان كەيىن الاڭ يەلەرى العا ۇمتىلعانمەن، ودان وڭ ناتيجە كەلە قويعان جوق. ويىن 1:1 ەسەبىمەن اياقتالدى.

اتالمىش توپتا بۇگىن تاعى ءبىر ويىن بولادى. ساعات 01:45 تە اندوررا مەن گرۋزيا قۇرامالارى شەبەرلىك بايقاسادى.