قازاقستان-وزبەكستان ۆيتسە-پرەمەرلەرى ىنتىماقتاستىق مەموراندۋمىنا قول قويدى

شىمكەنت. قازاقپارات - شىمكەنتتە العاش رەت ءوتىپ جاتقان قازاقستان مەن وزبەكستاننىڭ ءوڭىرارالىق ىنتىماقتاستىق فورۋمىندا ءبىرقاتار كەلىسىمدەر جاسالدى.

قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى اسقار مامين جانە وزبەكستان رەسپۋبليكاسى ۆيتسە-پرەمەرى اچيلباي راماتوۆ ارىپتەستىكتى دامىتۋ بويىنشا مەموراندۋمعا قول قويدى، دەپ حابارلايدى قازاقپارات ءتىلشىسى.

پلەنارلىق وتىرىستا ەكى ەلدىڭ وبلىس جانە قالا اكىمدەرى اراسىندا بىرلەسكەن مەموراندۋم ءتۇزىلدى. كەزدەسۋ بارىسىندا ق ر پرەمەر-ءمينيسترىنىڭ ءبىرىنشى ورىنباسارى اسقار ءمامين قازاقستانداعى وزبەكستان جىلى تابىستى اياقتالۋعا جاقىن ەكەنىن اتاپ ءوتتى.

«2018-جىل ارىپتەستىكتى دامىتۋ ءىس-شارالارىمەن ەستە قالىپ وتىر. قازاقستانداعى وزبەكستان جىلى ساۋدا-ەكونوميكالىق جانە مادەني بايلانىستاردى نىعايتۋعا كوپ ۇلەس قوستى. بۇل ماقساتتا كوپتەگەن ءىس-شارالار ءوتتى. 9 ايدا ساۋدا تاۋار اينالىمىنىڭ كولەمى 2 ميلليارد ا ق ش دوللارىنان استى. ياعني، 40 پايىزعا ۇلعايىپ وتىر. بۇل كورسەتكىشتى ودان ءارى كوبەيتۋدى كوزدەپ وتىرمىز. مىنە، ەڭ العاشقى فورۋم دا شىمكەنتتە ءوتىپ جاتىر. قالانىڭ رەسپۋبليكالىق مارتەبە الۋى بۇل باستامالاردى ودان ءارى نىعايتۋعا جاڭا سەرپىلىس بەرەدى دەپ ويلايمىن. جالپى، تۇزىلگەن مەموراندۋم ەكونوميكانىڭ ءتۇرلى سالالارىن دامىتۋعا زور ۇلەس قوسادى دەپ سەنەمىز. ەكى ەلدىڭ ۇكىمەتى تاۋار اينالىمدى كەلەسى جىلعا 5 ميلليارد ا ق ش دوللارىنا جەتكىزۋدى كوزدەپ وتىر»، - دەدى ق ر پرەمەر-ءمينيسترىنىڭ ءبىرىنشى ورىنباسارى.

ءوڭىرارالىق فورۋمنىڭ ماڭىزى - ساۋدانىڭ ءرولىن كۇشەيتۋ مەن ەكونوميكالىق ارىپتەستىكتى، ساۋدا قاتىناستارىن ايماقتار اراسىندا دامىتۋعا سەرپىن بەرۋ بولدى. تاراپتار قازاقستان مەن وزبەكستان ورتا ازياداعى ەكونوميكانى دامىتۋدىڭ لوكوموتيۆىنە اينالۋى ءتيىس ەكەنىن تىلگە تيەك ەتتى. ال، ءتۇرلى يدەيالدار مەن جوبالاردىڭ تالقىلانۋى، كەلىسىمدەر جاساۋى - بۇل ەكى ەلدىڭ ەكونوميكاسىنا زور سەرپىن بەرمەك. سونداي-اق، ەندىگى رەتتە كولىك دالىزدەرىن، ينفراقۇرىلىمدى جانە سيفرلىق تەحنولوگيالاردى بىرلەسە دامىتۋ جوسپارلانۋدا. ءوز كەزەگىندە وزبەكستان ۇكىمەت باسشىسىنىڭ ءبىرىنىشى ورىنباسارى اچيلباي راماتوۆ بۇل پىكىردى تولىق قۋاتتادى.

«وزبەكستان ۇكىمەتىنىڭ اتىنان زور العىسىمدى بىلدىرەمىن. بۇل فورۋم تەك قانا ساۋدا-ەكونوميكالىق قاتىناستاردى، ونەركاسىپ يندۋسترياسىن دامىتۋ عانا ەمەس، ەكى ەلدىڭ تۋىستىق-قارىم قاتىناستارىن، مادەني-رۋحاني بايلانىستاردى دا ارتتىرادى. قازاقستان - ءبىزدىڭ باستى ستراتەگيالىق سەرىكتەسىمىز. ءبىزدىڭ دوستىق قارىم-قاتىناسىمىز نىعايىپ كەلەدى. ءبىر جىلدىڭ ىشىندە ءبىزدىڭ ەلىمىز ەكونوميكانىڭ ءتۇرلى سالالارىندا جەتىستىككە جەتتى. 2018-جىلى تاۋار اينالىمى ءوستى. ءالى دە جىل سوڭىنا دەيىن 3 ميلليارد دوللارعا جەتكىزۋگە مۇمكىندىك بار. بۇل - ناقتى مەجە. بۇعان دەيىنگى وتكەن بيزنەس- فورۋم دا ءوز جەمىسىن بەردى»، - دەدى اچيلباي راماتوۆ.

كەزدەسۋگە قاتىسقاندار شىمكەنت پەن تاشكەنت قالالارى بىرلەسە دامىتۋعا ۋاعدالاستى. بۇل رەتتە شىم شاھاردىڭ اكىمى عابيدوللا ءابدىراحىموۆ العاشقى فورۋمنىڭ شىمكەنتتە ءوتىپ جاتقانىنا العىسىن ايتىپ، كورشىلەس قوس مەگاپوليس قالانىڭ بىرلەسە داميتىنىنا سەنىم ءبىلدىردى.

«العاشقى فورۋمنىڭ شىمكەنتتە ءوتىپ جاتقانى - ءبىز ءۇشىن ۇلكەن مارتەبە. 15- ناۋرىزدا استانا قالاسىنان باستالعان قازاقستانداعى وزبەكستان جىلى كوپتەگەن ءىس-شارالارعا ۇيىتقى بولدى. ەلباسى اتاپ وتكەندەي، وزبەكستان ءبىزدىڭ باستى ستراتەگيالىق ارىپتەس ەلدەردىڭ ءبىرى. باستى كەلىسىم - ول ەكى ەلدىڭ دوستىعى جانە ستراتەگيالىق ارىپتەستىگى. شىمكەنت پەن تاشكەنت بىرلەسە دامي بەرمەك. ەڭ باستىسى، ەكى مەگاپوليس قالانىڭ اراسى بار-جوعى 100 شاقىرىمنان ءسال اسادى. بۇل بىزگە بىرلەسە دامۋعا زور مۇمكىندىك بەرەدى»، - دەدى عابيدوللا راحماتوللا ۇلى.

جيىن سوڭىندا اسقار مامين مەن الچيباي راماتوۆ ىنتىماقتاستىقتى دامىتۋ بويىنشا مەموراندۋمعا قول قويدى. شىمكەنت قالاسى اكىمى عابيدوللا ءابدىراحىموۆ پەن جىزاق وبلىسىنىڭ اكىمى ەرگاش سوليەۆ تە ارىپتەستىكتى دامىتۋ بويىنشا مەموراندۋم ءتۇزدى.

ايتا كەتەيىك، ءوڭىرارالىق العاشقى فورۋم بارىسىندا ەكى تاراپتىڭ اۋىل شارۋاشىلىعى تەحنيكالارى، ونەركاسىپ، جەڭىل جانە تاعام ونەركاسىبى، قۇرىلىس، جيھاز ءوندىرىسىنىڭ كورمەسى ءوتتى. كوپشىلىك نازارىنا اسىل تۇقىمدى شارۋاشىلىق، توقىما بۇيىمدارى، فارماتسيەۆتيكا ونىمدەرى ۇسىنىلدى.