استانادا دزيۋدودان قازاقستاننىڭ جەكەلەي چەمپيوناتى مارەگە جەتتى

استانا. قازاقپارات - استانادا دزيۋدودان قازاقستاننىڭ جەكەلەي چەمپيوناتى مارەگە جەتتى، دەپ حابارلايدى قازاقپارات ءتىلشىسى.

قازاقستان دزيۋدو فەدەراتسياسىنان ءمالىم ەتكەنىندەي، ءۇش كۇنگە سوزىلعان ەل بىرىنشىلىگىنە قازاقستاننىڭ 14 وبلىسى مەن استانا، الماتى، شىمكەنت قالالارىنان 437 دزيۋدوشى قاتىسىپ، باق سىنادى.

جارىستىڭ سوڭعى كۇنىندە بەس سالماق دارەجەسى بويىنشا جەڭىمپاز-جۇلدەگەرلەر انىقتالدى.

ايەلدەر اراسىندا 78 كەلىگە دەيىنگى سالماقتا ەل نامىسىن قورعاپ جۇرگەن الماتى قالاسىنىڭ وكىلى زارينا رايفوۆا ءوزىنىڭ مىقتى ەكەندىگىن دالەلدەدى. شىعىس قازاقستاندىق نازەركە تىلەۋحانوۆا ەكىنشى، قوستانايلىق مارگاريتا گريتسەنكو مەن اتىراۋلىق ەلميرا ساميعوللايەۆا ءۇشىنشى ورىنعا يە بولدى.

78 كەلىدەن جوعارى سالماقتا اقمولالىق كاميلا بەرلىقاش ۇزدىك شىقتى. اتىراۋلىق سايدا قاپسالىقوۆا ەكىنشى، قوس قىزىلوردالىق ارۋ مەرۋەرت ابۋباكىر مەن قىمبات تۇرشابەك ءۇشىنشى ورىنعا كوتەرىلدى.

ەرلەر اراسىندا 90 كەلىگە دەيىنگى سالماقتا فينالدا گران-پري كەزەڭىنىڭ جەڭىمپازى، قاراعاندىلىق يسلام بوزبايەۆتى ۇتقان جامبىلدىق ازيز قالقامان ۇلى جەڭىمپاز اتاندى. شىمكەنتتىك ەرسۇلتان مۇزاپپاروۆ پەن قاراعاندىلىق رەگا پالكين قولا جۇلدەنى قاناعات تۇتتى.

100 كەلىگە دەيىنگى سالماقتا الماتىلىق ۆيكتور دەميانەنكو توپ جاردى. ودان جەڭىلگەن قىزىلوردالىق ءادىلحان قوزىبايەۆ كۇمىس جۇلدەنى ەنشىلەدى. اتىراۋلىق ارمان قاليەۆ پەن تاعى ءبىر قىزىلوردالىق ايبەك سەرىكبايەۆ ءۇشىنشى ورىنمەن شەكتەلدى.

اسا اۋىر سالماقتا (100+ كەلى) قازاق كۇرەسىنەن بيىلعى «قازاقستان بارىسى» تۋرنيرىنىڭ فيناليسى، جۋىردا تاشكەنتتە گران-پري كەزەڭىنىڭ قولا جۇلدەگەرى اتانعان شىعىس قازاقستاندىق ەراسىل قاجىبايەۆ ەشكىمگە جەڭىستىك بەرمەدى. قازاق كۇرەسىنەن 2017-جىلعى «قازاقستان بارىسىنىڭ» جەڭىمپازى، قىزىلوردالىق ەلامان ەرعاليەۆ ەكىنشى، باتىس قازاقستاندىق تەمىرلان كولباي مەن شىعىس قازاقستاندىق ءادىل ورازبايەۆ ءۇشىنشى ورىنعا ىلىكتى.

باتىس قازاقستان وبلىسىنان وسىعان دەيىن 73 كەلى سالماقتا 20 جاسار اڭساربەك عاينۋللين كۇمىس جۇلدەگەر اتانعان بولاتىن. ەرەسەكتەر اراسىندا العاش رەت سىنعا تۇسكەنىنە قاراماستان، اڭساربەك (باپكەرى تالعات بالماعامبەتوۆ) جارتىلاي فينالدا ريو وليمپياداسىنا قاتىسۋشى، الەمدىك گران-پري كەزەڭىنىڭ جەڭىمپازى، قاراعاندىلىق جانساي سماعۇلوۆتى جەڭدى. 100 كەلىدەن جوعارى سالماقتا قولا جۇلدەگەر اتانعان تەمىرلان كولباي اقساي قالاسىندا قاسىم قاجەنوۆتىڭ قول استىندا جاتتىعادى.

16- قاراشا كۇنى دزيۋدودان قازاقستان چەمپيوناتىنىڭ كوماندالىق سايىستارى وتەدى.

ەسكە سالا كەتەيىك، بۇدان بۇرىن ەكىنشى جارىس كۇنىندە بەس سالماق دارەجەسى بويىنشا ق ر چەمپيوندارى انىقتالعانىن جازعان بولاتىنبىز.