قازاقستان ەريترەياعا قارسى سانكسيالاردى جويۋ تۋرالى ب ۇ ۇ ق ك - ءنىڭ قارارىن قولدادى

نيۋ-يورك. قازاقپارات - قازاقستان رەسپۋبليكاسى ب ۇ ۇ قاۋىپسىزدىك كەڭەسىندە ەريترەيا ەلىنە قارسى سانكسيالاردى جويۋ تۋرالى قاراردى قولدادى.

2017-جىلدىڭ قاڭتار ايىنان باستاپ قازاقستان سومالي مەن ەريترەياعا قاتىستى ب ۇ ۇ قاۋىپسىزدىك كەڭەسىنىڭ سانكسيالار جونىندەگى كوميتەتىنىڭ ءتوراعاسى بولىپ تابىلادى، دەپ حابارلايدى قازاقپارات ق ر سىرتقى ىستەر مينيسترلىگىنە سىلتەمە جاساپ.

قازاقستاننىڭ ب ۇ ۇ جانىنداعى تۇراقتى وكىلى قايرات وماروۆ افريكانىڭ مۇيىسىندە، سونىڭ ىشىندە ەريترەيا، ەفيوپيا، دجيبۋتي جانە سومالي ەلدەرىندەگى تەڭدەسسىز وڭ وزگەرىستەردى اتاپ ءوتتى. ۇستىمىزدەگى جىلدىڭ ماۋسىم ايىندا بۇكىل الەم ەريترەيا مەن ەفيوپيا اراسىنداعى تاريحي تاتۋلىققا كۋا بولدى - ەكى ەلدىڭ باسشىلارى ساياسي ەرىك-جىگەر تانىتىپ، 80 مىڭنان استام ادامنىڭ ءومىرىن قيعان 20 جىلدىق قارسىلاسۋىن توقتاتتى.

بۇل وقيعا اۋماقتىق قاقتىعىستارعا وراي 10 جىل بويى ءبولىنىپ كەلگەن ەريترەيا مەن ءدجيبۋتيدىڭ جاقىنداسۋىنا جانە جوعارى دەڭگەيدەگى العاشقى بايلانىستارعا جول اشتى. ەكىجاقتى كەلىسىمدەرمەن قاتار ەريترەيا، ەفيوپيا جانە سومالي ساياسي، ەكونوميكالىق، الەۋمەتتىك جانە مادەني بايلانىستاردى نىعايتۋعا جانە وڭىرلىك بەيبىتشىلىكتى، قاۋىپسىزدىكتى جانە دامۋدى ىنتالاندىرۋ جونىندەگى كۇش-جىگەرلەرىن ورناتۋعا كەلىستى.

ب ۇ ۇ قاۋىپسىزدىك كەڭەسىنىڭ وتىرىسىندا سويلەگەن سوزىندە ق. وماروۆ افريكانىڭ ءمۇيىسى ەلدەرى وڭىرلىك پروبلەمالاردىڭ شەشىمدەرىن تابۋعا قابىلەتتىلىگى مەن تاباندىلىعىن كورسەتكەنىن اتاپ ءوتتى. وڭىردەگى وڭ وزگەرىستەرگە حالىقارالىق قوعامداستىقتىڭ قولداۋ كورسەتۋى دە اسا ماڭىزدى.

«وڭىردەگى بەيبىتشىلىك وڭىرلىك كوشباسشىلاردىڭ باتىل شەشىمدەرىنىڭ ناتيجەسى بولدى. بۇل ۇزاققا سوزىلعان شيەلەنىستەردىڭ، قاقتىعىستار مەن باسەكەلەستىك ءداۋىرىنىڭ اياقتالۋىن كورسەتەدى جانە بەيبىت، ءوزارا ءتيىمدى ىنتىماقتاستىقتىڭ جاڭا داۋىرىنە جول اشادى»، - دەدى قازاقستان ەلشىسى.

«ديپلوماتيا، دەلدالدىق، سەنىمدى نىعايتۋ جانە ديالوگ، دامۋداعى ينۆەستيتسيالارمەن قاتار ەلدەر اراسىنداعى داۋلى ماسەلەلەردى شەشۋدىڭ سەنىمدى جولى بولىپ تابىلادى. ءبىز دجيبۋتي مەن ەريترەيا اراسىنداعى ءوزارا ءىس-قيمىلدى قولدايمىز جانە ولاردى ەكىجاقتى قارىم-قاتىناستاردا قالعان ماسەلەلەردى شەشۋ ءۇشىن ودان ءارى كۇش-جىگەر جۇمساۋعا شاقىرامىز»، - دەپ قوستى ق. وماروۆ.

قازاقستان ەريترەياعا قارسى سانكتسيالاردى الىپ تاستاۋ تۋرالى شەشىم ءۇشىن داۋىس بەرگەن كەزدە، ءوزىنىڭ افريكادا بەيبىتشىلىك پەن قاۋىپسىزدىكتى ورناتۋعا دەگەن ۇمتىلىسىن باسشىلىققا الدى. ەلىمىزدىڭ قاۋىپسىزدىك كەڭەسىندەگى جۇمىسىنىڭ وسى باعىتى پرەزيدەنت نۇرسۇلتان نازاربايەۆتىڭ ب ۇ ۇ قاۋىپسىزدىك كەڭەسىنە ءوزىنىڭ ساياسي جولداۋىندا انىقتاعان 7 باسىمدىقتارىنىڭ ءبىرى بولدى.

ب ۇ ۇ قاۋىپسىزدىك كەڭەسىنىڭ سومالي جانە ەريترەياعا قاتىستى سانكسيالار جونىندەگى كوميتەتىنىڭ ءتوراعاسى رەتىندە قازاقستان ەريترەيادان سانكسيالاردى الىپ تاستاۋ تۋرالى كەڭەس مۇشەلەرىنىڭ شەشىمىنە ەلەۋلى ۇلەس قوستى. ەريترەيانىڭ حالىقارالىق وقشاۋلانۋ جىلدارى بۇل ەلدىڭ رەسمي تۇلعالاردىڭ وسى جىلدىڭ قىركۇيەك جانە قازان ايلارىندا نيۋ-يوركتە سانكسيالىق كوميتەتتىڭ توراعاسىمەن العاشقى بايلانىستارمەن اياقتالدى. قازاقستاننىڭ ەريترەيامەن ىنتىماقتاستىقتى نىعايتۋ جونىندەگى كۇش-جىگەرى وسى ەلگە قارسى 9 جىلدىق سانكسيالار رەجيمى اياقتالۋىنىڭ ماڭىزدى العىشارتى بولدى.

قازاقستاندىق دەلەگاتسيانىڭ سانكسيالىق كوميتەتتىڭ باسشىسى رەتىندە اتقارعان جۇمىسىنىڭ قورىتىندىلارى قاۋىپسىزدىك كەڭەس مۇشەلەرىتاراپىنان جوعارى باعا يە بولدى. وتىرىس بارىسىندا ەريترەيا مەن دجيبۋتي دەلەگاتسيالارى قازاقستانعا وڭىردەگى تۇراقتى بەيبىتشىلىكتى ورناتۋعا تولىققاندى قولداۋ كورسەتكەنى ءۇشىن العىسىن ءبىلدىردى.

ەريترەياعا قارسى سانكتسيالار 2009 -جىلى ەنگىزىلگەن بولاتىن.

ب ۇ ۇ قاۋىپسىزدىك كەڭەسى قابىلداعان قارارعا قارۋ-جاراق ەمبارگوسىن الىپ تاستاۋ، جول جۇرۋگە تىيىم سالۋدى، اكتيۆتەردى توقتاتۋدى جانە ماقساتتى سانكسيالاردى جويۋ كىرەدى.