استانادا كورەي حالقىنىڭ ءداستۇرلى ماسكالارى كورمەسى اشىلدى

استانا. قازاقپارات - ۇلتتىق مۋزەيدە كورەيا رەسپۋبليكاسىنىڭ قازاقستانداعى ەلشىلىگىنىڭ ۇيىمداستىرۋىمەن «كورەي حالقىنىڭ ءداستۇرلى ماسكالارى» اتتى كورمە اشىلدى، دەپ حابارلايدى قازاقپارات ءتىلشىسى.

كورمەگە كورەي حالقىنىڭ «حاحۆە بالسينگۋت تالنوري» ، «بونسان تالچۋم» ، «سۋەن يارۋ» جانە باسقا دا تەاترلاندىرىلعان ءداستۇرلى بي قويىلىمدارىندا قولدانىلاتىن ماسكالارى قويىلدى.

باسقا حالىقتاردىڭ ماسكالارىنا قاراعاندا ۇرەي تۋدىراتىن قۇدايلار مەن جانۋارلاردى بەينەلەيتىن كورەي ماسكالارى ادام كەلبەتىن، مىنەز- قۇلقىن، كوڭىل- كۇيى مەن سەزىمدەرىن بەينەلەپ، قويىلىمداردا قاراپايىم حالىقتىڭ ءومىرىن ءازىل تۇرىندە جەتكىزەتىن قۇرال.

«بۇگىن سىزدەر كورەي حالقى مادەنيەتىنىڭ ءبىر بولىگى ءداستۇرلى ماسكا ونەرىمەن تانىساسىزدار. جىل باسىنان بەرى استانادا كوپتەگەن مادەني ءىس- شارالار وتكىزىلدى. ءار شارانىڭ وزىندىك ەرەكشەلىگى مەن ماڭىزى بار. جانە بۇل ەكى ەل اراسىنداعى تىعىز قارىم- قاتىناس پەن مادەني دوستىقتىڭ بەلگىسى» ، - دەدى قازاقستانداعى كورەيا رەسپۋبليكاسىنىڭ توتەنشە جانە وكىلەتتى ەلشىسى كيم دە سيك.

ونىڭ ايتۋىنشا، ماسكا جاساۋ ونەرى الەمنىڭ بارلىق حالقىندا بار، ياعني ماسكا مادەنيەتىن بارلىق جەردەن كەزدەستىرۋگە بولادى، الايدا ولاردىڭ ءار ەلدە وزىندىك ەرەكشەلىكتەرى بار.

سونىمەن قاتار، ەلشى تيىسىنشە قازاق مادەنيەتىنىڭ كورەيا ەلىندە دە جوعارى باعالاناتىنىن ايتا كەلە، جۋىردا قازاقستاندىق «شولپان» بيشىلەر توبىنىڭ كورەيانىڭ اندون قالاسىندا وتكەن حالىقارالىق بي فەستيۆالىنەن باس جۇلدەنى جەڭىپ العانىن قۋانا جەتكىزدى.

 ءسوز سوڭىندا ەلشى مىرزا 7-8 - جەلتوقسان كۇندەرى استانادا كورەي كينوسى كۇندەرى وتەتىنىن حابارلاپ، ەلوردا حالقىن كورەيانىڭ كينو يندۋسترياسىمەن جاقىنىراق تانىسۋعا شاقىردى.

كورەيلەردىڭ ءداستۇرلى ماسكالارىنىڭ 61 ءتۇرى قويىلعان كورمەدە چوسون ديناستياسى كەزەڭىندەگى كورەيا ەلىنىڭ بەينەسىن كورۋگە بولادى.

اتالعان شارا اياسىندا ەرتەڭ «استانا بالەت» تەاترىندا ەجەلگى كورەي حالقىنىڭ ءداستۇرلى بي ونەرىنەن ماسكالىق قويىلىم وتەدى. كورمە وسى جىلدىڭ 23 - جەلتوقسانىنا دەيىن جالعاسادى.