17:53, 15 - قاراشا 2018 | GMT +6
تۇركىستان وبلىسىندا تاعى ءبىر مۇناي وڭدەۋ زاۋىتى سالىنادى
تۇركىستان. قازاقپارات - تۇركىستان وبلىسىندا جىلىنا 2 ميلليون توننا مۇناي وڭدەيتىن زاۋىت سالىنادى. جالپى قۇنى 95 ميلليارد تەڭگە بولاتىن ينۆەستيتسيالىق جوبا اياسىندا مىڭعا تارتا جۇمىس ورنى اشىلماق، دەپ حابارلايدى قازاقپارات ءتىلشىسى.
«Turkistan Invest» ينۆەستيتسيالىق كومپانياسى باسپا ءسوز قىزمەتىنىڭ مالىمەتىنشە، جاڭا زاۋىتتىڭ قۇرىلىسى ورداباسى اۋدانىندا جۇرگىزىلمەك. ونى سالۋعا قازاقستاندىق «Standard Petroleum Co LLP» كومپانياسى قاراجات جۇمسايدى. بۇگىنگى كۇنى 250 گەكتار اۋماقتا ورنالاستىرۋ جۇمىستارى جۇرگىزىلىپ، قورشاۋلار قويىلىپ جاتىر. سونداي- اق، ەلەكتر جەلىلەرى تارتىلىپ، جول سالىنۋدا.
«تۇركىستان» ا ك ك» ا ق فيليالى - «Turkistan Invest» ينۆەستيتسيالىق كومپانياسىنىڭ قولداۋىمەن جۇزەگە اسىرىلاتىن جوبا 2021 -جىلى ىسكە قوسىلادى دەپ كۇتىلۋدە. دايىن ءونىم ەل اۋماعىندا ساتىلىپ، قوسىمشا ت م د ەلدەرىنە ەكسپورتتالاتىن بولادى.
